PASALṬHATE KHAWVÊL 11

'PASALṬHATE KHAWVÊL'

BUNG SAWMPAKHATNA

'Luah loh di zûn ngaiin chhuithangvala ar ang a vai!'

Tlangkhumi chu a rawn harh leh meuh chuan sakei pawh a lo insaseng daih tawh a, hmanhmawh takin a tho chhuak a, a phur pawh ngaihsak lo leh Tlangkhuma ruang pawh ngaihven ta lo chuan khawlam panin a tlân chho ta chiam mai a ni. Kawtchhuahah chuan mi ṭhenkhat an lo awm a. Hlauh nei tih hriat fahrana Tlangkhumi rawn tlânchhia an hmuh chuan ngaihṭhat loh hmêl zetin an lo thlîr ṭaih mai a. An awmna lai a rawn thlen chuan an zinga pakhat chuan, "Khumi, engtizia nge ni ta?" tiin a lo zâwt thuai a. Tlangkhumi chuan, "Khuuu tah..khuan...sa..sakeiin Tlangkhuma a seh," tiin sehchilh nawk nawk chungin a han sawi a. Thu dang pawh sawi leh tawh chuang lêm lovin khaw lam pan bawk chuan a tlân ta chîam a. Tlangvâlho chu hmanhmawh takin Tlangkhumi sawina lam pan chuan an tlân thla ve nghal a.

Lal in lamah Lakhuma leh a upate an lo tîti laih laih laiin 'Tlangkhuma sakeiin a seh' tih thu chuan a rawn dêng ta dawt mai le. Lalkhuma chu a ngawi vang vang a, chutah muang cherh chawrh hian, "An thu tiam ang ngeiin a chungah a thleng ta a nih chu," a han ti churh churh a. Zonuam khaw lal upa ṭhenkhat an thu leh hla hre ve lo te hnenah chuan Tlangkhuma leh Lianchhingi'n sakei ngho seha thu an tiam dân te chu a han sawi charh charh a. Mak an tih viau rualin Tlangkhuma chuan dâwt a sawi vângin ama ânchhia chu a chungah a tla ta ngei a ni tih erawh an pawm thlap thung mai. Puithuna leh chhechhamnate hi an ngai urhsunin an la thutak êm êm a ni.

Tlangvâl hovin Tlangkhuma ruang chu an zâwn a, daiah thlân an lai sawk sawk a, an phum ta thuai mai a ni. Sakei seh rêng rêng hi chu khua an luhpui ngai lo va, daiah an phûm nghal mai ṭhin. Tin, an thlân pawh zan thum tlaivarin an invên chhâwk ṭhin a ni.

Lalkhuma chuan sakei sual chu an tihhlum thuai loh zawngin mi leh sa an pamhmai lutuk palh ang tih a hlau va, a upate nên chuan tih dân tûr an sawiho va. Chumi zan la la chuan khawchhung mipuite chu an chhuak khawm a, dar khuang leh thil ri thei zawng zawng an khawng ri a, sakei sual chu an ṭhenawm Zolur khaw ram lamah an hnawt sawn ta nge nge a!

Challura chu rilru baihvai tak chungin khuaah chuan a lût leh ta nge nge a. Pasalṭha Darbuta hnenah chuan thil awmzia zawng zawng chu hrilhin, ama thiam loh vek a nih dân te chu a han sawi a, "Khami zân khân muhil tûr ka ni hauh lo asin le, ka thiam loh vek a ni," a han ti chuai deuh raih a. Darbuta chuan, "E, i thiam loh a âwm rêng rêng lo ve. Tumahin an dem hek lovang che. I tihtheih chin ang ang chu i hlen tawh alâwm. Vanduaina hi tu tân mah pumpelh theih a ni lo ve. Kan chunga thleng tûra khuanu ruat hi zawng pumpelh theih a ni ngai lo ve. Lianchhingi nên hian khuanu ruat in ni lo pawh a ni mahna," tiin Challura chu a han hnêm a.

Challura erawh chuan, "Keimah hi ka inthiam thei ngai dâwn lo zawng a nih hi," a ti deuh raih a. Darbuta chuan, "Khai, hmeichhia ang maia awm tûr a ni ngai lo, pasalṭha takin awm ta che. Thil kal tawh hnu chu eng ang pawhin siamṭhat tum mah ila kan siamṭha thei tawh chuang lo. Kan hmalam hun atâna kan inbuatsaih hi a paeimawh zâwk fo a nia. Lianchhingi chunchâng thu zawng i duhtâwk teh ang. Hei, tunah zawng kan râlmuang chho ṭan viau tawh a, i peih chuan zan hnih khat riakin Tlaksih ngaw lamah kan ramchhuak dâwn em ni ang?" tiin thu dangah a pakaipui ta daih a. 

Challura pawh chuan, "E, a châkawm khawp alâwm, kumin chu kan ramchhuak hman meuh bawk si lo. Pawltlak hma hian vawikhat tal ramchhuah chu a châkawm khawp mai," a lo ti ve ta thuai a. Tichuan, a tûk lama ramchhuak tûr chuan thu an rêl fel nghal a. Mi dang sawm pawh an tum chuang lo, Darbuta hian Challura rilru lâkpên nâna ramchhuah hi rawtpui mai a ni a, mi dang sâwm kher hi ṭul a ti lêm lo a ni.

A tûkah chuan Darbuta te pahnih chu Tlaksih ngaw lam panin an chhuak ta nge nge a. Chawhnu thlang her vêlah an tum ram chu thlengin riah bûk tûr an sual hmasa tê tê a. Darbuta chuan, "Chala, tikhân lo awm hahdam la, zanriah hmeh tûr ka'n zawng ang e," ati a, silai nen chuan an a inpu chhuak leh nghal a. Challura pawh awm mai mai lovin thing ro te a fawm khâwm a, rawng a bâwl zui nghal mawlh mawlh a. Ni chu la tla fel chiah lo mah se an awmna lai chu a thim ṭan deuh ruih tawh a. Luite tui luanna bul lawka riah bûk sual an ni bawk a, a vawt viau mai. 

Nakinah chuan an awmna lai ruam khâwk rum rum khawpin silai a puak ta dur mai le. Challura chu a nui deuh sak a, Darbuta chuan a lo a thlâwnin thal a thlah hauh lovang tih chu a hre chiang hle si a. A rin ang chiahin Darbuta chuan sakhi patuai a lo kâphlum hlauh mai a, an hlim dun kher mai. 

Sakhi sa chu an puah sawk sawk a, a sa tui lai lai chu lain zanriah hmeh atân an siam nghal zung zung a. A bâk erawh chu rêp theih tûrin an buatsaih thung a. Chumi tlai chuan el euhvin zanriah chu an ei dun a, an puar dun kher mai a, Challura pawh a irh deuh ak ak reng mai. Darbuta chuan vaibel han pak talh talh pahin, "Khuti lai mual thlang chiahah khuan sih lian zet mai a lo awm reng alâwm maw le. A rak viau a ni ang, sa hnu pawh a chiar dep dup mai. Tumpang hnu ni ngei tûr pawh ka hmu nghe nghe asin, naktûk varṭianah i zuk châng chhin dâwn em ni ang?" a ti charh charh a. 

Challura chuan, "A pawi hleinem; mahse, tinge nangman i chân zâwk mai loh ang ni?" a ti a. Darbuta chuan, "Thangchhuah sa zingah Tumpang chiah hi i la kâp lo a ni lâwm ni? I kah atân ka khêk deuh maw le," tiin Challura chu duhsak takin a han chhâng a. 

Challura chu a lâwm rilru hle mai a. A pa anga a tlangval lai ngeia ram lama thangchhuah chu a tum rilrûk ber a ni rêng a. Chumi zân chuan an mu hma hle mai a, chhûn lamah an kal chau deuh bawk nên an mutui hle a ni.

A tûk zîng hmâ takah Challura chu a tho va, a silai te chu a enfel leh tê tê a, chumi hnu chuan sih awmna lam pan chuan a chhuak ta nghal a. A la hmâ êm a, ngawpui hnuai phei chu a la thim deuh riai ruai a, a vawt vur mai leh nghal. Challura pawh a khûr bauh bauh thei hial a ni. 

Sih awmna lai chu a thleng ta thuai a. Chân khân tûr a melh nghal zung zung a. A piah lawkah chuan ram theihai kung lian zet mai hi a ding khung mai a. A zâr chu han ṭhutna atâna ṭha fahran mai hi a ni a, remchâng dâwn hlein a hria a. Ram theihai kûngah chuan a lâwn ta sawk sawk a. Ngawi rengin a ṭhu ta vang vang mai le. 

Khua a lo vâr ṭan riai riai a, sava zan riak pawh an thâwm hriat tûr a awm ṭan ta. Sih tui al tlân tûrin ramsate pawh an rawn inlâr ṭan ta. Sakhi leh sazuk te pawh an rawn lang sap sap mai. Challura chuan a kah tum ber Tumpang a la rawn lan ve loh avângin a la ṭhu veng veng a, chûng sazuk leh sakhite chu hmuhnawm ti takin a thlîr vang vang a. Nakînah chuan le, chûng ramsate chuan hlauhawm hria ni âwm takin an beng an tun hru hru a, an dâk vual vual hlawm a. Chutah le, a ṭhutna piah lawk aṭang chuan hnim chu a rawn ri san san a, Challura chuan sahu sual a nei nge ni a khûr der der mai le. 

Thâwm chu a lo hnai zêl a, nakinah chuan le, Tumpang chal ngei mai chu a rawn lang ta ruau mai le! A chal ṭha tâwk hle tih hriat takin a ki berah pawh bak alâwi thei antih ang hi a ni a. A ki chu a kual mâwiin, Challura phei chuan chhimbal a zâm kual ruihin a hre nghe nghe a ni. Tumpang chaldamah tak chuan kah tumin a silai chuan a han tin vang vang a. Tumpang lah chu a fîmkhurin hlauhawm a hnai nge hnai lo tih hriat tum ni âwm fahran hian a hawi leh vual vual ṭhin a. Challura chuan kah ṭhelh mawlh chu a hlau ber mai. Pasalṭha Darbuta'n a duhsakna kha hre rengin kah ṭhelh zawng a tum lo chiang kher mai le. 

Tumpang chuan sih awmna lai chu rawn thlengin sih tui chu a dâwt hruih hruih a. Challura chuan uluk fahranin a silai chuan a han tin vang vang a, chulai ruam nghawr dawt khawp chuan a silai chu a hmet puak ta dur mai le. Sava an thlâwk darh chum chum a, sakhi leh sazuk te pawh chu an tlânchhe hum hum mai. Tumpang chal chu âwn ruai ruai a, hreh hmêl zetin a tlu ta nge nge a. 

Challura hlim lutuk chu a su dup dupin a inhria a, a lâwnna thingkung aṭang chuan a chhuk sawk sawk a, Tumpang awmna lam pan chuan a tlânphei nghal a. Tumpang chu a thih chian leh chian loh a fiah hmasa tê tê a, a thi chiang ngei tih a hriat hnu chuan Tumpang chungah chuan a ding ang rên râwn a, hlado a chham ta vang vang mai le. 

Darbuta pawh hmanhmawh zetin a rawn chhuk thla ve sawk sawk a. Tumpang lo tlu ruau mai a han hmuh chuan hlim tih hriat fahran mai hian Challura darah chuan a han bêng thak thak a, "Challur, tunah chuan pasalṭha, ram lama thangchhuah i lo ni ve ta reng mai, ka lawmpui a che," a ti a. Challura pawh chuan, "Ka pa Dar, hêng zawng zawng hi min duhsakna avâng veka thleng thei a nih hi. I chungah hian ka lâwm takzet a ni," a ti ve bawk a. Darbuta chuan Tumpang ki chu a han teh vêl a, mâwi a tiin a ki chu nalh a ti kher mai. Muang cherh churh hian, "Hetiang khawpa Tumpang chal leh ki ṭha hi ka la hmu lo ve," a han ti charh charh a. 

Mi pahnih chauh tân chuan chuti ang ramsa lian chu buaipui tham fê hi a ni mai a. An riah bûk pawh an sawn ta ngawt mai a ni. Tumpang sa chu an phawk hlawk hlawk a, a rêpna tûr an siamah chuan an dah nghal zêl a. An ṭhu hahchawl hman lo a ni ber e. Ni hnih zet an buaipui hnu chuan an rêp fel thei ta hrâm a. Zân lamah sa rêp vil pahin bawmrâng an tah a, an pahnih chauh chuan an phur sêng dâwn lo tih lah an hre chiang ngang mai a, an phurh theih bâk zawng chu a duh duhin an phur ve tawh mai a ni ang chu.

Chumi zân chuan Challura chuan a mumangah Lianchhingi kha a lo hmu a. Lianchhingi chuan, "E khai, Chala, i Tumpang kah chu a lian ngei mai! A ki te lah chu a ṭhain a mâwi bawk si a, sa lû lawm dun a va châkawm êm," a lo ti a. Challura ṭhangharh chuan a mumang chu mak a ti êm êm mai a, 'Lianchhingi hi a la dam em ni dâwn chu aw?' tiin a ngaihtuah rilru hial a. Mahse, chu zawng thil ni thei a ni mawlh si lo. A khua a har ta êm êm mai a, Lianchhingi chu a ngai ru ta veng veng mai a ni.

Tunah chuan an duh ang zânin sa pawh an rêp zo ta a. Zing chaw ei kham chuan haw tûrin an insiam mawlh mawlh a. Bawmrâng khat tehmeuhin Tumpang sa rêp chu an phur dun a, Challura phei chuan a lû a la phur tel cheu leh nghal, rit a ti ru khawp mai. An sa rêp phurh bâng zawng chu ṭha takin an dah a. An bûk kiangah chuan lei an lai khuar a, a chhûngah changel hnah an phah chhuak vek a, chutah chuan sa rêp chu an dah vûm thur mai a ni. Changel hnah bawkin an khuh leh a, ṭha takin an vûr a. Hriat a awlsam zâwk nân a bulah chuan perh an zep nghe nghe a ni. Tichuan, an phur rit tak nên khawlam pan chuan an chhuak dun ta hnak hnak a. 

Zanriah ei kham hun âwm vêlah kawtchhuah an thleng a, Darbuta chuan hlado a han chham vang vang a, chutah an silai chu a rualin an kâp puak dur a. Chumi hnuah zawng muangchângin khaw chhûng chu an lut ta a. An hlado chham ri hria khân naupang leh tlangvâl ṭhenkhat an lo tlân khâwm a, naupang hovin sa lû chu an zâwn a, tlangvâl ṭhenkhatin an bawmrâng phurh chu an chhâwksak bawk a. Ri hlut chungin khua chu an lût chho ta zêl a. 

Tumpang lû chu Challura inah chuan an zâwn lût a, ṭhenawm hnai leh pa upa lampang an rawn chuangkai nak nak a. Challura pawhin a sa rêp hawn chu a sem den den hlawm a. Tin, a tûk lamah an duh phawt chuan Tumpang sa rêp phurh tûr an dah ṭhat thute chu a han hrilh a. An hlim kher mai. Chumi zân chuan sa lû lâwmin zan rei tak thleng an meng a, upa hovin nuam an tifâl bik hle niin alang.

Hetih lai hian Zolur khuaah chuan sakei sual a rawn inlâr ṭan ta a. An ranvulhte chu a seh a seh ta mai a. Tlai khat chu khawnbawl upa Zahnuna se ki kheh tir chu, se rual zingah a  rawn haw ve lo tawp mai a. Sakei seh anih an ring vek a. Manguka pa ramvâk lo haw chuan nikum chul lamah se âwn thâwm a hriat thu a rawn thlen bawk a. Zolur tlangvalho chu tlai thim dawn ruaiah nikum chul lam panin fei leh silai nen an tlanchhuak sung sung hlawm a. Nikum chul an thlen meuh chuan khua pawh a thimfel viau tawh a, sial chu chhuhsak ngei an tum ruh hle mai. Meichher an siam a, ngawrh takin sakei chêtna chu an bawhzui zêl a. Rokhuma pa thlâm zâwn an thlen chuan mipui thâwm hlauvin sakei chuan a sa seh lai chu a tlansan ta a ni. 

Sakei sual chu a huangtau sawt hle a, dai hnaiah an hmu ta fo mai a. Thingphur ngam pawh an awm mang lo va. Lal leh upate rilru pawh a buai ru viau mai. An tih nek nek chhûngin pawl an tla fel a, vahsân lâk a hun chho leh mai dâwn a ni si a. Lalvunga chuan, "Hetia kan sa sual kawl, tihlum lo va kan lêntîr reng zawngin nunau rêng an khawngaihthlâk tawh e. Pasalṭhaten rem ruat se la, a rang thei ang berin tihhlum thuai rawh se," a ti charh charh a. 

Chumi ni tlaiah chuan Darbuta hovin kar pahnih kam tûrin an chhuak ta a. Pakhat zâwk chu kawtchhuah bul lawkah an kam a, a dang chu nikum chul, Thangkunga chul kâwnah an kam thung a. Anduhthusâma ṭhaa an kam zawh hnu ni tlâk dâwn ṭêpin an hawsan ta a. 

Zânah chuan lal inah paho an lengkhawm a, an tî ti mam mam a. Darbuta chuan an kar rinawmzia lrh an kam lai pawha sakei thâwm ni âwm tak leh rim a hriat thute chu a han sawi charh charh a. Ṭhenkhatin sakei hliam hlauhawmzia te, tuna an sa sual kawl huangtauzia te sawiin an tîti mam mam hlawm a. Thim hlim mai a la nih lai chuan zan dang ang lo takin ar an khuang chiam mai a, a ṭhen an kawk-kaw-dak bawk nen. Upaho chuan, "Sapuiin dai a hêl a nih chu," an ti a. Ṭhenkhatin, "Karin sakei a kâp dâwn a ni ang," an ti thung a. Chûng ar khuangte chuan engemaw tak hrilh in an ring ṭheuh va. Chutih laiin Zawlbûkah tlangvâl ṭhenkhat chuan kar a per veleh tlân hmasak ber nih tumin meichher nen inring ranin an lo awm ve bawk a. Chumi zân chuan tlangval nula rîm pawh an awm lo hial a tih theih âwm e.

Lalvunga chuan a upate hnenah chuan, "Kan sapui sual kawl hi sa danglam tak zawng a ni phawt mai. Chuvangin zaninah pawh kar a per a nih pawhin tumah kar perna lamah kal loh tûr, tiin tlangau au tîr ila a ang. Chuti lo zawng mi leh sa kan inchân phah reu reu ang e," a ti a. Hualzakunga chuan, "Lalpa, i sawi chu ṭha ka ti e. Zan lama sakei hliam beih chu mahni lu zawrh nen a dang chuang nêm maw," tiin an lal thusawi chu a lo tuihnih ve thuai a. Tichuan, Tlangaupa chu lal thu chhuak ang ang chu hrilhin chumi zân la la a au nghal turin an ti a. Ani pawh lal in aṭang chuan chhuakin thlertin suartluan chuan a au ta vo vo a, "Khai khai! Ka ṭawng lo ngaithla rawh u khai, zaninah kar a per a nih pawhin khawvar hma chuan tumah tlãn loh tur, tlân lui in awm chuan lal thu awih lo in ni ang a, salâm in chawi ang, hei hi kan lal thu chhuak a ni e," tiin. Mahse, zawlbuka riakho tlangval chu kar a per veleha tlân nghal thei turin an inring ru vek a. Tuma tlân khalh loh nih tumin puan hnuaiah puan an veng ru sa vek tho mai. Challura pawh zantina a dan angin chumi zan pawh chuan kar a per veleha tlan nghal vat thei turin a inring ve ran a.  

Tichuan zan a lo rei deuh deuh a, men lai hun chhung chuan engmah thawm a awm lo va. Tlangval ṭhenkhat phei chu an mu hman hial tawh mai. Mahse, tumah muhil zawng an la awm bik hauh lo mai, a rûkin beng an chhi kar hlawm a. Kar chu a per dâwn lo em maw ni chu le, an tih rilrûk rauh rauh laiin kawtchhuah lama an kar kam zâwk chu a per ta dur mai a. Chuveleh Zawlbûk tlangvalho chuan an meichher chhiin an chhuak a, pachang leh upaho te an lo zuang chhuak bawk a. Kar puahna lam pan chuan tlan liam an han tum hlawm a. Mahse, vâl upaten an lo dang a. "Tumah tlan liam suh u, lal thuawi tur a ni e," an lo ti a. An indang thei hram a. Tlangvalho kal châk lutuk chu an phi chung mai a, ṭhenkhat phei chuan an lalpa chu an haw lek lek zawk mai. 

Silai ri a hriat veleh Challura chu zawhte sazu hmu ang maiin thawm nei miah lovin a tho vat a. Silai pawh keng duh lovin kâwlhnâm a keng a, meichher pawh chhi duh lovin amah chauh chuan a liam nghal ta vang vang a. Khaw páwn a thlen chuan thâwm riva ngaithlain a han ding vang vang a. Râlkhat hla taka chingpirinu hram dut dut mai lo chu thawm dang engmah a hriat loh avangin tlangval dangten an rawn nan hman hlauin an kar rawlhna hmun lam chu pan chuan a kal leh nghal sawk sawk a. A hmun a thlen chuan kar chu a lo per na meuh mai a. A kâp fuh ngei tih hriat tak hian sakei thi chu a baw nuai a. Duh anga khua a la en si loh avangin a tihngaihna dang vak a hre bîk lo hle a. Sapui hliam awmna àwm lah chu khawthim hnuaiah hriat rual a ni bawk si lo. Riva dang engmah hriat tur awm lovin chingpirinu hram bak chu thâwm dang chu a reh hian a reh vung vung mai a. A han nghâk hlek a, leilung a lang ṭan ta a. Fimkhur takin sapui hliam hnu chu a chhui thei ṭan ta a.  

Sakei chuan nikum chul kawng chu a zawh tih hriat tak hian a thisen far pawh hmuhtur a awm zauh zauh reng a. Saikapa pa lo hlui a hruihzawlah chuan a lo bawk leh a. An inhnaih tawh hle mai a, a bawhna pawh a lo la lum vung vung danah a thâwm hriain a insaseng tih a hriat reng mai a. Chuta ṭang chuan a hnu chu a rulchuk ta a, Challura pawh a fîmkhur sawt mai.

Thui pawh a la chhui hman lo, naurual leipui fîng chen vel pawh a la tling lo ang e ; ṭhang hmun aṭangin sakei chuan a rawn zuan ta thut mai a. Mahse, Challura pawh inring pen pawn reng ngang anih avangin sír lamah a persawn lawp a. Chumi pah chuan a kâwlhnâm chuan a han vai nghal lawp mai a. Sakei chu a hûk tuarh mai a. Ril baw nuaihin leiah chuan a tla thum ṭawk mai a. Challura khân a dul thuarah tak a lo sât fuh hlauh mai hi a ni a. Keipui hliam tuar chu a bawk rûn a, thinrimin a rûm hum hum a. Challura chuan chu keipui chu a chesawn thei tawh dawn lo tih hriain tihhlum kher ṭulin a hre lo va. Mi dangin an rawn hmuh hunan tihlum mai rawhse, a ti rilru deuh a ni! Tichuan ngawi rengin a kîr leh nal nal a, tuma hmuh lovin a inah chuan a lût a, a mu leh ta veng veng a! 

Leilung a lang ṭan tihin tlangvalho chu an kar kamna lam pan chuan an tlân thla hum hum a. An hnung deuhah vâl upate leh patling ṭhenkhatin an zui ve bawk a. A hmun an zuk thlen chuan an kar kamna bul vêla thisen lo baw nuaih te chu an hmu a. Kar chuan a kâp fuu ngei a ni tih hriain fimkhur takin an chhui ṭan nghal a. 

Nikum chul lamah chhui chhovin Saikapa pa lo hluiah an inchhui chhuak a, chuta ṭanga hla lo têah chuan sakei hliam tuar che thei tawh si lo chu a lo inhrosa kûk kûk a. A thâwm hriain an inaukhawm zung zung a. Darbuta chuan hma hruaiin sakei hliam awmna lai chu a zuk thleng hmasa ber a. Sakei chuan a lo nger chhur chhur mai a. Darbuta chuan engkhaw sawi set set lova han kah nghal thawr mai hi a tum hman zuau a; mahse, chu sakei chu a chesawn thei tawh lo a ni tih a hriatin a silai chu a la thla leh ta zâwk a. Sakei hliam chu mak ti âwm tak hian a en deuh vang vang a. Chutih lai chuan tlangvalho an lo thleng a. Darbuta chuan, "Khaile, Zo khawpui tlangvalte u, kan sahuai chu he ta hi a awm e. A chhun ngatin va chhun hlum rawh u le," a ti a. Chuveleh tlangvalho chuan sakei chu an bawh rawn huk a, an fei ken chuan an chhun ta thawih thawih a. Keipui hliam tuar chesawn thei tawh si lo chu a hûm dum dum a, mahse, rei lo têah tlangvalho chuan an chhun hlum ta mai a. Chumi hnuah a zâwnna tûr hlang an siam a, khawlam panin an zawn chho va, an ri chho ta bung bung a.

Darbuta khân Challura hmel hmuh tumin a mit a lên ru deuh reng a; mahse, chumi tûk kher kher chuan Challura hmel hmuh tûr rêng rêng a awm hauh lo mai a, 'Engtizia nge maw ni le aw, ani hi a nuamsam lo emaw ni dâwn le?' tia ngaihtuah rilru neuh neuh chungin khua an luh veleh Challura in lam chu a pan nghal vat a. 

Kawngkhar chu sawi nawk nawk pahin a han au va, "Chala, i la tho na nge, engtizia nge ni ngai?" tiin a han au lung lung a. Challura chu a rawn tho va, kawngkhar chu hawn pahin, "Khatia min tih mualpho tum kher angai em ni le," tih pahin a nui deuh var var a. Darbuta chuan, "Engtiziaa chuti chen chen i han mut chu ni aw? Sa hliam beihnaah i kal ve ang chu ka lo ti rilru deuh va. Mahse, i hmel ka hmu si lo, ka ngaihṭha lovin ka rawn pan ta ngawt che a nih hi. I dam lo em ni chu le?"a ti a. 

Challura chuan, "Ka pa Dar, ka ṭha e. Engmah damsam lohna pawh ka nei lo. Tlangau khân 'khawvar hma chu lal'n tumah kal loh tur a ti' kha a ti bawk si a! Ka lo hmanhmawh vak lêm hlei law," tih pahin a nui ruh ruh a. Darbuta chuan, "A khai aw! Sakei kha karin a lo kâp hliama, tlangvâl hovin an chhun hlum ta a nih kha," vawiinah kan lalpain a ai nghalin ka ring e," a ti a. 

Challura chuan, "A tihzia hlauh chu. Chuti vaeiin chu awmni kan kham dâwn tihna a va nih hmêl ve aw," a ti a. Darbuta chuan, "A nih mai loh nâkah, nilêngin zû leh sa kan tlân anga ti nia," tih pahin a han nui deuh hak hak a. Amah bawk chuan, "A nih leh khawnge ka han chho ta'ng e, tûkṭhuante pawh rawn ei chho zâwk mai ta che," a han ti a. Challura chuan, "A nih leh phawt le, ni dangah ka la rawn ei zâwk dâwn nia," a ti a. Darbuta pawh chuan lal in lam chu a pansan leh ta nghal a. 

Lalvunga chuan sakei chu sialin a ai nghal a. Chumi ni chu hlim tak leh kham lo tak chungin an hmang liam a. Sakei huai ber an tihhlum tâkah chuan mipui pawh an thawveng huai mai a ni. Naupangho pawh an pawnto leh ngam ṭan ta, sapui sual kawl zet zawng nunau an lo ralṭi ṭhin rêng a ni.

Challura chuan a mumangah Lianchhingi kha a lo hmu leh ṭhin a, chu chuan a lung a tilêngin a khua a tihar thei kher mai. Tunah chuan tlangval puitling tak tak, nupui nei rual hial a lo ni ve ta. Nupui man tûr na nâ nà chu a huphurh bîk lo; mahse, an khaw nula zingah hian a rilru han la deuh eihtu pawh an awm si lo. Lianchhingi chauh kha a rilru luahtu awmchhun chu a ni si a. Chutiang chuan hun leh ni a chhiar a, khawhar takin Lianchhingi te lo lamah te khân a va ramvâk leh rak rak ṭhin. 

"Chhuihthangvala ar ang ka vai e Parte,

In sawmfang hmun leh in buk thlam chul hnu;

Mahten ka fang leh awmhar hnemah." 

tiin a zai vawng vawng mai a. A lunglênna leh khawharna te chu tu'n an hriatpui ve tawh si lo. Chutiang chuan mal leh khawhar tak chungin hun leh nite chu a chhiar ve bek bek zêl a. Tunah chuan le, Pawl an tla fel tawhin vahsân lâk pawh a lo hun leh dâwn ta reng mai. Lal leh upa hovin ram tuk an rêl a, 'khawii lai hi nge ṭheh ila ṭha ang' tin ram ṭheh tur an ngaihtuah chho ṭan a. An duh dan chuan khua aṭanga hla lutuk lo ni thei se an ti rilru deuh a ni. 

Lal leh upa hovin an ram ṭhehna lai tûr an en kual vêl a, a tawpah zawng pangpui ram chu ṭheh an rêl thlu ta nge nge a. Pangpui ram hi zawng lo atâna an neih ngai loh a nih avângin a ram pawh a la chang ṭha hle mai a, buh leh thlai pawhin an ngeih hlein a rinawm a ni. 

Zolur khaw mipa puitling hnathawk thei tawh phawt chu lo vâtin an hmanhlel hle hlawm a. Chhûn lamah phei chuan khaw chhûng chu a reh phah ruih thei hial a ni. Challura pawhin ṭin hmun dâwn a pawm ve nghe nghe a. A lo neihna lai hi lo bing an tih ang deuhvin ri pawh a nei mumal lova, mi dang lo vahna aṭang pawhin a fâl nalh reng a. Ani tân zawng riah mai kha a remchâng zâwk bawk a, bûk sain a riak ta rêng a. 

Tlai ni tla tûrin Pangpui khâm puallawi vêl a han chhun tle sur mai ṭhinte chu khawhar takin a thlîr leh vang vang ṭhin a. Sa kah châkna pawh a nei lova, khawhar hnêmah tiin silai erawh a riahpui ve hrâm chauh zâwk a. Ramvah lampang erawh a rilruah a awm hlawl lo a ni ber e. 

Zan khat chu thla a êng nuam hle mai a, Challura lunglêng chuan a bûk kawtah chuan rawchhêm hi a tum vêl mai mai a. Chutih lai chuan khawi aṭang nge tih pawh hriat loh hian hmeichhe nui ri ni àwm tak hi a hre ta phut mai a. Mak ti takin a rawchhem tum lai chu a tâwp chawt a. Chuveleh nui ri pawh chu a tâwp ve nghal hmak a. Challura chu a hawi kual vêl ruai ruai a. Thla êng hnuaiah chuan a lo vahna lai vêl chu thui tak a hmuh theih nghe nghe a. Mahse, mihring hmêl erawh hmuhtur a awm hauh thung si lo. A nih chuan nichina nui ri a hriat kha tunge ni ta ang le? Lasi hi an awm tak tak leh awm tak tak loh chu a hre bik lo va, an sawi fo ṭhin dânah erawh an lo awm ve tawh ṭhin ngeiin niin alang. A pa pawh khân an chanchin hi a sawi zauh zauh tawh ṭhin, "Bawiha, heng lasi an tihte hi an awm tak tak ngei a; amaherawhchu, mi inthlahrung leh zakzum tak an ni ve a, a nazawngin an inlar duh ngai lo. Biak ṭhiam chuan mihringte tan ṭhian ṭha tak an ni thei a, tihlungawi loh hlauh erawh chuan hmelma hlauhawm tak an ni thei bawk. Anmahni hian thiltihtheihna mak tak an nei a, ramsate hi an thunun thei viau bawk a ni. 

"Heng lasi an tih te hi hmeichhia an ni tlangpui ṭhin a. Hmêl ṭha tak leh ngaihnobei tak mai, zàwlaidi an nei emaw tih mai tûr khawpin mi hîp theihna eng emaw riau an nei a, an zûna uai a na hle bawk a ni. Pasalṭha tam tak chuan sa kâpthei nih duh vangin heng lasite hi an zâwl ṭhin a; nang chuan lo zâwl ve miah suh ang che. Tin, an pawi sawi zâwngin khawsa lo la, i mumang lamah an lo inlâr a, eng thu emaw an lo hrilh che a nih chuan ngai thutak viau ṭhin ang che," 

tiin a pa khân a lo hrilh fo tawh ṭhin rêng a. Lasi zâwl nih chu eng ang chiah nge maw a nih a, 'lasi nula' an tih fo te pawh chu eng ang taka hmelṭha nge maw an lo nih chiah le? Challura chuan lasi chungchâng chu a ngaihven ṭan ta riau mai!