NUNHLUI ṬAHNA

AW KA NGAI, NUNHLUI ZAMUAL LIAM HNU....

Mizote hi hnam rilru no tak, lunglêng thei tak leh ṭhian in ngaina tak hnam kan ni awm e. Reilote pawh han awmho ila kan in ngaina hman em em a, kan han inṭhen dawn meuh hi chuan kan lung a lêng lawk vawng vawng ṭhin. Ṭhiante nena han inṭhen dawn meuh hi chuan a ruka kan lo ngei em em te pawh kha an ngaihawm thar leh riau ṭhin!

Zep nâk  emaw keini 2nd Batch, DDEO Trainee's te pawh thla ruk tehmeuh kan awmho hnuah kan inṭhen darh a lo ṭul veleh dawn ta. He ṭhenna ram khawvelah hian kan la inṭhen leh fo ṭhin dawn zawng a nih hi.

"Ka ngai ka rual duhte khawvel ṭhenna ramah hian,

Ṭhena kawl a lo herchhuak;

Dawn chang ni hian ka ngai nunhlui liam hnu,

Kohkir theih chang si lo."

A ni teh tak e! He ṭhenna ramah hian lungrualpui ṭhiante kha an ngaihawm leh fo ṭhin dawn zawng a ni. Kan thuhnuaia kan dah theih hauh loh hun chuan kan inṭhenna ni tur chu a rawn herchhuahpui ta ruai ruai mai si a le. Duh loh vang emaw, peih loh vang ngawta mahni duhthu a awm theih lah a ni si lo. Hemi ni hi ṭhian tha tak tak te nena kan inṭhenna ni, ṭhenkhat tan phei chuan an hmangaih te nena an inṭhenna ni a ni ta reng mai si a. Engtikah nge kan inhmuh khawm leh dawn tih lah chu sawilawk theih a ni si lo. Ṭhenkhat chu mittui nen a rukin an inṭhen a ang a, ṭhekhat erawh chu hlim taka in nuih ver ver chungin an la in mangṭha mahna! Nunhlui kohkir theih tawh lohna khawvelah hian nunhlui ngaiin kan hlimni te kha kan dawn kir leh vawng vawng ṭhin dawn zawng a ni e.

Lei hringnun dawn changin duhaisam kim thei si lo,

Hlimni kawlah liam leh ṭhin;

Damchhung nite a inher danglam zel a,

Chung khuanu ruat angin.

He khawvel hi chu beiseina khawvel, duhthusam ram mai a ni ṭhin. Kan duhthusam te hi a takin a rawn thleng diak diak thei ṭhin si lo. Kan hlimni te pawhin mual min liamsan a, nunhlui mai min chansan leh ṭhin. He hringnun hi Siamtu remruat dan ang zelin hun bi inthlak rualin a inthlak ve zel a, ni leh thla te an liam rualin a liam ve zel ṭhin a lo ni. Ni leh thla te hi chu a ngai te in a rawn herchhuak leh mai ṭhin. Nunhlui erawh chu herchhuak leh tura duan a ni ve si lo. Vawikhat a liam tawh chuan chatuan atan a ni tawh si a. Chutiang a nih avang chu nge nunhlui ngaih hi a nât bik em em ni?

"Hmanlai chang turin ni leh thla,

Kumpui an her;

Hai ang kan tar hun chuan kan la ngai ngei ang par ang kan vul lai ni,

Ṭhakhua a sei dawn ngei."

Kumpuisul vawi tam a lo vei hunah meuh chuan tuna kan hringnun te pawh hian hmanlai an chang zo tawh ang a, kan sakruang mawina leh duhawmna te pawh pangpar angin an chuai ve tawh ang. Chung ang hunah chuan kan vanglai nite hi kan la ngai vawng vawng ṭhin dawn a ni. Ni e, kan taksa mawina a lo chuai hret hret ang a, kan hmai vun te pawh a lo chuar ve ṭing ṭeng tawh ang. Kan taksa te pawh a lo awngrawp zo tawh ang a, duh duhna hmunah kan kal thei tawh hek lovang. Awmhmunah kan nunhlui zamual liam tawh hnu kha kan dawnkir rauh rauh ang a, kan vanglai hun ngaiin kan mittui pawh a sur mahna le. Chung ang hunah chuan a ni, vanglai nite hi kan la ngai ngei ang..

Kum bi hun inthlak a lo her ang a, ṭuahpui leh vau ten vul zai an rawn rel leh ang a, tlangtin bawmin romei a lo zam paw leh chii chiai ang. Favang boruak thengthaw nuam tak te, fûr khawthiang tak kara tlai ni tla tur êng mawi tak te chuan nunhlui min la hriatchhuah thar tir leh fo ṭhin dawn a ni. Chutih hunah meuh chuan ṭhiante kha hmuhtur an awm tawh lovang a, hlim taka an nui ri te kha bengah a rawn cham nawn leh fo ṭhin ang. Nunhlui hi a hlui thei tak tak ngai dawn si lo va. 

"Aw ka ngai, nunhlui zamual liam hnu,

Hmanlai an chang ta maw?

Dawn chang ni hian ka ngai nun hlui liam hnu,

Kohkir theih chang si lo."

tiin lunglêng takin kan la zai vawng ṭhin mahna..