PASALṬHATE KHAWVÊL 10
BUNG KUANA
'Arsi e, thlapa chawl law,
Râlvawn âr khuanan e,
Zân thim e, zing hman se law,
Kei chu e, rimnampa ka tlun e.'
Laiveta teho chuan Zonuam khua chu ni tlâk hma hretin an lût a. Lal in lam pan chuan an inzui chho duah duah a, mite lah chuan an lo hmu duh hle mai a. An lo thlîr ṭai hlawm mai.
Lal Vankunga chuan a pasalṭhate chu a lo lâwm thiam hle mai a, hah zû te a lo zûk hmasa tê tê a, Laiveta chuan râlho nena an inbeih dân te chu kimchang takin a han sawi a. Chumi hnuah an râllâk sum te chu an insem tlâng hlawm a.
Lalkhuma chuan a rohlu chân tawh zawng zawng a hmu kîr leh vek mai chu a hlim kher mai. Chu a chhapah, an sal mante an rawn hruaikîr leh bawk si a. A pa hnenah chuan, "Naktuk chu râl lû kan ai ang chu maw?" a han ti a. Lal Vankunga chuan, "Ai tehreng e maw le, a ropui thei ang berin kan ti a ni ang chu," a lo ti thuai a. Lal Vankunga chuan a pasalṭhate chu hahchawl tûrin a ti a. A tûk lama râl lu aih an tum bawk si avangin Laiveta te pawh chuan lal in chu chhuahsanin anmahni in lam ṭheuh chu an pan leh ta sang sang a.
A tûk khua a lo vâr a, tûk ṭhuan ei kham chuan mipui chu an mi lû lâmna hmun tûr, lal mualah chuan an pungkhâwm mup mup a. Lal leh upaho pawh an thuam ṭha ber ber nena rawn infam chhuakin dârkhuang, dârbu, dârmang leh tumphîtte nên an lo chhuak khâwm ta nguah nguah mai a. Thatho leh phûr êm êmin pathlâwi leh tlangvâlte hrâng lâm tûrte chuan an puan ṭha ber an rawn kawrtawnghâk a, arkeziak an bânah leh an ngalrêkahte an rawn bun a. Tin, lênchhâwn leh chhâwndawlte an tawn bawk a. An ruala lâm ve tûra thlan chhuah nula ṭhenkhatte pawhin puandum an ârchempai a, tuirual an tawn a, ârkeziak an khim bawk a. Mipui chuan mâwi ti êm êmin an thlîr ṭhup hlawm a.
Chutah le, mi hrâng muallâm tûrho chu an lo chhuak ta nguah nguah mai a, ṭhangtêa an mi lû dah chu an han kal huam phawt a. Lâm hmahruaitu chuan artui chhum hmin a ken chu a chanve a keih a, a chanve dang chu a kut veilamin a hmet sawm a. Tin, lampeia an chawṭhing dah dah chu a kut veilam bawkin a zuk phul a, a phul pah chuan :
"Hei malchaw ka vei lamin ka pe a che,
Lamthlang i rap ang a,
Lamchhak ka rap zêl ang;
I meithal chawi kha zawp sela,
Keia meithal chawi i thin leh lungah tla rawh se,"
a ti a, bawh hla a chham nghâl a. Dârkhuang a lo ri vû vû a. Chutah dârbu leh tumphît chu, "Râl hâwlna in dâl e, râl sial hâwlna in dâl e," tiin an han tum a. Chu veleh mi hrâng rualte chuan, "Leido râl ṭhuam ang kan do, thlangpui thlunglu kan lâm e," an han ti a. Dârbu leh dârmang tumtute chuan:
"Râlin sial hâwl nâ maw e,
Hâwl nâ maw e;
Râl chalin sial hâwl nâ maw e,
Hâwl nâ maw e..."
tiin an han tum chhuai chhuai a. Chuti ang bawkin tumphît chuan a lo ti ve bawk a. Mi hrâng rualte chu uar lehzualin an han lâm thle nghial nghial a.
Mual laia an zu dah chu an inkhâwn chhâwk reng a. Mi ṭhenkhat chuan râl lû chu an rawn sât leh sawk sawk ṭhin a. Pa ṭhenkhat chuan an fapate chu râl thahtîr ve ngei tumin chempui an humtîr a, râl lû chu an sahtîr ve bawk a.
Mi hrâng rualte chu an lâm uarin an lâm ngawrh tulh tulh a. Dârkhuang ri nên, dârbu leh dârmang ri nên, tumphît leh khuang ri nên, diriam leh inhrosa au thâwm ri nên, a rîk hian an ri bung bung mai a ni.
Tlai lamah chuan hmeichhia leh nûnau nâwlpui chu an ṭin ta a. Tlangvalho chuan an râl thah lû chu sahlamâh chuan an khai ta nawlh nawlh mai a ni.
Vankunga chuan a fate chu chah khâwmin an awm zêl dan tûr a sawipui hlawm a. Vankunga chuan a fate hnenah chuan tihian a han ti a, "Hei le, ka lo upa ve tain zankhat mitchhîn pawh tâwk maithei dinhmuna ding ka lo ni ve ta. In unauho hi ṭangrual zêl ula, puih in ngaihna apiangah in ṭanpui tawn zêl ang che u.
"Tunah hian in û Lalkhuma chuan râlho kut tuarin a khua pawh an hâlsak vek a ni a. Tihian ka ngaihtuah a, Lalkhuma hian ka lalna tlang hi ṭhut mai se la, ka aiawhin ro a rêl ang a, upa ber a nih bâkah rorel kawngah pawh a fing ber bawk a. Nangni pawhinin û thu leh hla chu in ngaichângṭhin dâwn nia.
"Ka lo boral ta thut a nih pawhin Zolur khua saw rawn theihnghilh rêng rêng suh u. Phuba in rawn la ngei tûr a ni,"
a ti charh charh a. Lalkhuma unaute pawhin an pa thusawi chu pawm tih hriat takin an lo bu nghauh nghauh hlawm a. Tun aṭang chuan Lalkhuma chu Zonuam khaw lal a ni tawh dâwn a ni.
Vankunga chuan a khawnbawl upate, a khua leh tuite hnenah chuan a fapa Lalkhuma chu a aiawha lal ni tûra a ruat thu chu a puang zui nghal a. Lalkhuma chuan Bukpui khuaa a khawnbawl upate pawh kha a dinhmun ṭheuhvah a dah leh vek bawk a ni.
Tunah chuan Zonuam khua chu an tam tawh hle mai a, nula leh tlangvâl tân pawh a nuam viau mai. Amaherawhchu, mi tam tak chuan râl kutah an nupui pasal, an fate an chân avângin an hlim a kim thei tak tak lo a ni.
Lianchhingi nu pawh kha râlin an thahte zingah a tel ve hlauh mai a, a fanu lah chu Sukte pasalṭha Ngunlinga khân an khaw lamah a hawpui daih bawk si a. Bukpui tlangval tam takte chuan an khaw nula hmelṭha Lianchhingi chu an hre chhuak fo ṭhin a ni.
Zolur khua pawh an insingsa fel leh nual tawh a. An khua chu kulhin an hung ṭha leh vek a, râl tâna han luhchhuah huphurhawm khawpin an hung ṭha viau mai. Tun dinhmunah chuan an thla pawh a muang ṭan ta deuh va, Zonuam khaw lam chanchin te pawh engtin tin emaw an lo hre ve zêl a. Vankunga fapa upa berin Zonuam khua chu a ṭhut tih te, Bukpui khua Sukte râlin an rûn thute thlengin an hre ve vek mai a ni.
Challura chuan Bukpui khua râlin an rûn tih a hriat meuh chuan, a rilru a buai ru kher mai. Lianchhingi te nupa kha a hre chhuak zawk a, engtin awm tak ang maw, tiin angaihtuah ru neuh neuh a. Bukpui khua chu an rauhsan tawh tih pawh a hai hek lo. Mak tak maiin Bukpui khua va tlawh chu a châk ta et et mai a ni. A thiltum chu pasalṭha Darbuta hnenah chuan a han sawi a. Darbuta chuan a hlauhthâwnpui rilru viau mai a; mahse, Challura tumruh zia a hmuhin hnial chi-ah angai ta lo a ni ang chu, heti hian a han ti a, "I thil tum chu ṭhulhtîr thei che ka ni lo ve. I va kal poh a ni ang chu. Mahse, va fimkhur hle ang che," a ti ta nge nge a.
Challura chu Bukpui khaw lam pan tûr chuan a chhuak ta nge nge a. Lianchhingi te nufa kha a ngaihtuah rilru deuh hle mai a. Râlho chuan an lo man emaw, an lo that palh hlauh ang tih chu a hlauhthâwn ber a ni.
Bukpui khua a va thlen chuan khawharthlak khawpin a lo reh ruih mai a. In ding lai hmuh tûr pawh a lo awm tawh mang lo. In tam tak chu a kâng ral vek a, lal mual lamah erawh in thum vêl chu kâng lo a awm ve hram a. Zâwlbûk pawh chu a lo la him pial mai! Challura chuan râlho chêt dân tûr âwm vêl chu a chhût thiam nghal mai a, a chêk tlawk tlawk mai a ni.
Khuaah chuan tihtur a nei lo va, awm reng lahin awmzia a nri hek lo. Ni tla tûr kâwl sen phût mai leh thereng hrâm chiah chiah te chuan an lung an tileng vawng vawng a. Bukpui khaw chul rup mai chu thlîr pahin thil tam tak a ngaihtuah a. Indo leh inrûn ṭhat loh zia te, pawisawi lo tam takin an tawrh ṭhin dânte chu a ngaihtuah chho zêl a, tute emaw duhâm vâng mai maiin mi tam takin nunna an chân phah chu a ni si a.
Chu khawram leh hmun khawhara awm reng chu atân pawh awmzia a awm si lo. Lianchhingi te thlawhhma awmna lam pan chuan a kal leh ta hnek hnek a. A zuk thlen meuh chuan ni pawh a pil ruai ruai tawh a. Savate pawhin riahrûn rem tumin thingzâr an bel leh sap sap tawh mai.
Lianchhingi te thlawhhma chu enkawl loh tih hriat takin a chul rup a, a hnim hle bawk a ni. Challura chu thlâmah chuan a han lût a, a lo ruak huai mai a. Ngaihtuahna a kal thui duh ngei mai. Lianchhingi te nufain an enkawl laite kha a han ngaihtuah chhuak a, tunah lah chuan khawiah nge an awm pawh a hre tawh si lo. Damin a hmu leh ang em tih lah chu thil hriat harsa tak a ni bawk si. Engvânga Lianchhingi chu ngaihtuah viau nge maw a nih le? Hmeichhia hi a ngaihtuah khât hle si; a nu tih chauh loh kha chu!
Zankhat na rêng rêng chu Lianchhingi te thlâmah chuan a riak ta nge nge a. A tûk zing hma takah thovin an khaw lam pan chuan a haw leh ta hnak hnak mai a ni.
Challura chu pasalṭha Darbuta te inah lêngin, a va kalna lam chanchin te chu a sawi charh charh a. Darbuta chuan, "Tîti thangva ka hriat danin Lianchhingi chu Sukte pasalṭha Ngunlinga'n a man a, an khaw lamah a hawpui daih a ni âwm e," a han ti a. Challura chuan makti âwm zet hian, "Tak tak maw? Ka va khawngaih tak êm!" a ti chuai deuh raih a.
Darbuta chuan, "Nula hmelṭha deuh hi zawng an vanduai duh bik teh ania!" a ti duh lek fang a. Challura pawh chuan, "Ni e ti raw, Lianchhingi zawng a hmêl te a ṭha si a, an that phal hauhvin ka ring lo," a ti a.
Challura bawk chuan, "Ka pa Dar, eng nge i ngaihdan phei zawng ka hre lo va, Lianchhingi chu han zawn chhuah ka duh deuh riau mai. Amah ngaihventu tûr a nei lo a nih phei chuan, a damchhungin mi ramah salah aṭang kumkhua emaw kha a ni âwm si a. Ka khawngaih riau mai," a ti chhuak phawng mai a. Darbuta chu a han ngawi deuh vang vang a, a hmaa tlangval huaisen hmel tak chu a mitsirin a han melh zauh zauh a. Chutah muang churh hian, “Nangma mimal thil a ni a, I thu thu a ni e. I kal hmain thil awmzia chiang taka hriat hmasak phawt tum la, hmalak pawh a awlsam zawk ngei ang,” a ti a. Challura pawh chuan, “Ni e, I sawi ang chuan thil awmzia chu hriat ka tum hmasa phawt dawn nia. Bukpui mi leh sa tu emaw ber chu ka biak angai dawn tihna ania. Chuti a nih si chuan Zonuam khaw lamah ka va kal hmasa phawt mai a ni ang chu,” a ti a.
Darbuta chuan, “Fimkhur hle ang che, tunge I nih tih an hriat chhuah hlauh chuan engkhaw sawi set set lovin an lo that duh nghal ngei ang che,” a ti a. Challura pawh chuan, “Ka theih tawka fimkhur ka tum ang e,” a ti ve bawk a. Tichuan Challura chu Zonuam khaw lam pan chuan a chhuak zui leh ta nghal a. Lianchhingi avanga chutia a buai ta viau mai chu angaihtuahin mak a inti rilru kher mai. Mahse, a chhia leh tha hriatna chuan chutiang thil ti tur chuan a tur lui tlat si a.
Challura chuan losul haw rualin Zonuam khua chu a lut ve nghal a. Khawtual mi ni awm fahran hian ngampa takin a lut ve rawih mai a ni. Veng tawntirha in sak thar diai mai chu a pan nghal a. Chung insak tharte chu Bukpui khaw mi leh sa, Zonuam khuaa pem ta te an nih ngei pawh a ring a ni. Challura chuan inthahrung deuh tak chung hian thlen a han dil a. In neitunu chuan hawihhawm takin a lo chhawn a. Challura chuan zan khat lek riah a tum thu leh a tuk lama chhuah leh nghal a tum thute chu a han sawi a. In neitunu chuan, “A ni maw, I va hmanhmawh leh awm si ve? Tu khua nge I nih reng reng le?” tiin a han zawt a. Challura chuan, “Ka pi, dik takin ka hrilh mai ang che, kei hi Challura ka ni a, Lalvunga khua atanga lo kal ka ni e. Bukpui khaw mi leh sa I nih ngei pawh ka ring a, Lianchhingi te nufa chanchin kha ka rawn ngaihven a ni e,” tiin a kal chhan dik tak chu a han sawi a.
In neitunu chuan ngaihthat hmel vak loh hian Challura chu a han melh vang vang a, Lalvunga khuate nen chuan leido an ni si a, a hlauthawng rilru viau pawh chu a demawm hran lo ve. Challura pawhin in neitunu ngaihtuahna chu hria ni awm takin, “Ka pi, min hlau duh suh, ral ka ni lo va, buaina siam tuma rawn kal lah ka ni hek lo. Lianchhingi te nufa chanchin kha ka rawn ngaihven mai a ni e,” a ti leh ta thuai a.
Chutah zawng in neitunu pawh chu a rawn tawng chhuak ve ta nge nge a, “Lianchhingi te nufa chu engvanga ngaihven nge maw I nih chiah le? In inchhung em ni?” tiin a han zawt hmasa te te a. Challura chuan, “Chhung khat zawng kan ni hauh lo mai. Mahse, vawi khat chu an nufain min lo tanpui tawh a, tunah hian tanpui ve theihna ka neih takin tih thuah ka rawn ngaihven tawp mai a ni e,” tiin a chhang a.
In neitunu chuan, “A nih tak chu maw le, Lianchhingi nu kha ral kutah a vanduai zingah a tang ve ta a nih kha. A fanu lah chu ralin an man a, a chanchin engmah kan hre zui bik lo. An sawi dan chuan ral hovin an khaw lamah an hruai haw daih a ni awm e,” tiin a hriat ang ang chu a han hrilh a. Challura chuan, “A nih leh ka pi, ralho chu tute nge an nih in hre mial em?” tia a han zawh chuan, in neitunu chuan, “An sawi dan chuan Sukteho ni awm tak a ni. An hotupa hming kha Ngunlinga an ti thanin ka hria,” a ti a. Challura chuan a hriat duh tlangpui chu a hre ta, chu bak chu han hriat belh vak ngaihna a hre tawh bik lo.
Challura chuan, “Ka pi, ka hriat duh ber min hrilh avangin ka lawm e. Ka riak leh lo zawk mai ang e, kan khaw lamah ka kir leh ang a, Lianchhingi chu ka han zawng hrim hrim ang e,” a ti a. In neitunu chuan, “Chuti tur maw? A nih leh chaw tal hi fun rawh khai, kawng lakah I ril a tam lutuk dah ang e,” a ti a. Challura chaw fun tur chu a siamsak ta mawlh mawlh a.
Challura chuan in neitunuin chaw fun a pek chu lak pahin, “A nih leh ka pi, ka lawm lutuk e, kan la inhmu leh thuai dawn nia,” a ti a. An khaw lam pan tur chuan a chhuak leh ta hnak hnak a.
Challura chu khuaah a haw leh phawt a, kawng laka a mamawh turte lain a inpuahchah hmasa phawt a ni. Pasaltha Darbuta hnenah Lianchhingi zawng tura kal a tum thu chu a hrilh a. Darbuta chuan,”Ral ramah I han kal dawn a ni a, han fimkhur hle ang che. Ka hriat danin Lianchhingi mantu hi Bawmzo khaw pasaltha Ngunlinga a ni awm a. Pasaltha huaisen leh ralhrat zet mai a ni a, in inhmachhawn a nih chuan fimkhur viau ang che,” tiin a chah mawlh mawlh a. Bawmzo khaw awmna lai leh kal dan tur vel chu a hriat ang angin a hrilh pah nghal a. Challura chuan, “Ni e, ka theihtawpin ka han fimkhur ang e. Tin, Lianchhingi pawh a la dam a nih ngai chuan rawn hruai haw ngei ka tum bawk ang,” a ti a.
A tukah chuan hma takah a tho va, Lianchhingi zawng tur chuan silai nen a inpu chhuak ta nge nge a. Bukpui khua kha a pan hmasa leh phawt a. Chuta tang chuan Tiau lui lam panin a kal ta ngat ngat a. Zan thum zet a kal hnuah Tiau lui chu a thleng a. Harsa vak lovin Tiau lui chu a kan a, tunah chuan ral ramah a awm a ni ta si a, a fimkhur angai takzet a ni. Pawih hovin an rawn hmuh fuh palh hlauh phei chuan, engkhaw sawi set set lovin an that duh nghal ngei dawn a ni.
Pawihho khua chu chhunpelh zelin ramhnuaiah chuan a kal ngar ngar a. Khawchhak lam chu a rinai daihin a lo vawt leh nghal, zan lamah phei chuan a vawh dan chu a namai lo hle a, puan sin tur mumal a lo keng bawk si lo nen, vawt tiin a khur boh boh thin a ni. Mahse le, mi sehhel tak a ni ve a, khaw vawt mai mai chu eng tehchiamah angai duh lo lui tlat a. Hei leh chen hi a kal tawh a, hlawhchhama kir leh chu a tum lo chiang kher mai.
Ni eng emaw zat a kal leh hnu chuan Bawmzo khua pawh a lut ta hlawl mai le. A inthuam dan chu thlakin Sukteho inthuam dan ang thei ber tur chuan a han inthuam a. A silai erawh chu ramhnuaiah thukruin, khaw en lai ngei mai chuan hlauhthawnna pawh nei hlek lovin khua chu a lut ta theuh theuh mai le!
Ngunlinga te chu an thin a rim em em mai a, Lianchhingi pawh chu sawi set set lova thah ve nghal mai an duh rum rum hial a ni. Mahse, Lianchhingi zawng a hmel a tha em a, an lalpa tih lawm nan an duh bawk si avangin an that phal ngang si lo. An thiante tam zawk chu Lusei pasalthaten an that tawh a, silai leh an rallak sum zawng zawng an chan vek bawk si avangin khua luh leh pawh an huphurh hle a ni.
Huphurh teh mah se khua chu an lut lo thei si lova. Ni tlak hnu hretah khua chu an lut ta nge nge a. Lalin lam chu an pan ding nghal nalh a. Zapauva chuan a pasalthate hmel a han hmu chu hlim takin a lo nuih vur vur a, “E khai, in rawn kir leh ta maw? In zuk hlawhtling chek ang chu maw?” a lo ti soh soh a. Ngunlinga chuan, “Lalpa, tun tum zawng kan vanduai a ni e. A tir lamah chuan kan hlawhtling viau a, rallak sum thahnem tak leh sal eng emaw zat nen kan rawn kir leh hman a; mahse, Tiau lui kan thlen hma hretin Lusei pasalthaten min lo bei thut a, min tam hneh em avangin kan tan pawh insaseng mai loh chu duhthlan tur dang a awm si lo, kan insaseng ta ringawt mai a ni. Kan thiante tam zawk erawh chu min rawn zui haw tur an awm ve ta lo,” a ti a.
Zapauva chuan, “A pawi lo ve, nungdama in lo kir leh thei hi a lawmawm tak meuh meuh a ni. Hlawhtlin chang a awm ang a, hlawhchham tum pawh a awm tur a ni,” a ti ta hlauh mai a. Ngunlinga teho chu an lawm ru kher mai. Ngunlinga chuan, “Lalpa, engmah rawn hawnsak loh ngawt che chu ka inthiam loh dawn em avangin Lusei hmeichhia pakhat chu I duh duha I tih atan ka rawn hawn tak asin. Pawnah sawn ka dah e,” a han ti a.
Zapauva chuan, “Ngunlinga nge nge, in hlawhchham tum pawhin ka tan thil min la tihsak hram zel chu ania, ka hre reng ang che,” a ti a. Ngunlinga chu a tho va, Lianchhingi chu a va kai lut ta a ni. Zapauva chuan mit tla dawn dawn hian a lo thlir vung vung a, chu Lusei hmeichhia chu a hmel tha kher mai lah tak a! A pian a thiamin a hleitling tha bawk si a, belhchian a dawl ru riau a ni.
Zapauva chuan, “Ngunling, hei a va hmeltha ve? Nupui atan I duh zawl lo’m ni?” a han ti a. Ngunlinga chuan, “Lalpa I tana ka rawn hawn a ni a, kei chuan nupui ka nei tawh a, ka mamawh belh lo ve. I duh leh salah I chhawr ang a, I duh leh I hmeiah I hmang dawn nia,” a lo ti thuai a. Zapauva pawh chu a bu nghut nghut a.
Chutiang chuan Lianchhingi chu Bawmzo khaw lal inah chuan a awm tan ta a. Zapauva chuan tha takin a enkawl a, a duat viau nghe nghe a ni. Lianchhingi chu a hmel te a tha em a, engtikah emaw Lusei pasalthaten an la rawn ngaihvenin a ring rilru deuh tlat a. Heti ang nula hmeltha hi chu to taka hralh emaw tlanchhuahtir emaw a tum rilru deuh a ni.
Lianchingi eraw a khua a harin an ram lam chu angai thei em em mai a, a bik takin a nu chu angai ngawih ngawih mai a ni. Ralho khan an that ve ta mai nge a la dam zawk, tih pawh a hre si lo. Ralho kut tuara a boral a nih hlauh phei chuan ani zawng tuma ngaihsak a hlawh tawh lovang a, amah rawn ngaihventu tur pawh a nei hek lovang. Chutiang thil vel angaihtuah chuan Lianchhingi rilru chu a mangang takzet a ni. Zanah te hian muthilh harsa a ti thin. A mumangah lah chuan Challura kha a lo hmu fo thin a, amah rawn chhanchuak tur ang tein a suangtuah fo thin a ni. Mahse, Challura chuan rawn chhanchhuah chu sawi loh a chanchin pawh hi a hre ve kher dawn em ni? Chutiang thil vel mai mai ngaihtuah chuan hun leh nite chu a her liam ve bek bek a. Lianchhingi chuan ama thua tlanchhuah dan tur angaihtuah tan ta. Thawthuah pawh an sawi fo va, saltang tlanchhuak an awm zeuh zeuh thin. Mi pawh an tlanchhuah theih chuan eng nge a theih loh bik ang ni?
Challura chu khawchhûngah chuan a teihawi vêl mai mai a. An khaw inrem dante chu ngun takin a en kual vêl a. He khua hi khaw liab tak zawng an ni ngei ang, mihring pawh an tam hle ngei ang maw le, ti tein angaihtuah vêl a. An khawsak danah an lungmuang tâwk hle niin a lang.
Challura chu lal in kawt bulah chuan a ding vang vang a, chhûn lai a ni a, mi tam zâwk chu hnathawkin an chhuak fai deuh vek a, lal in pawh chu a reh deuh ruih mai. Chutia lal in kawta a din veng veng lai chuan Lusei hmeichhia ni âwmvtak hi a lo chhuak a, Challura chuan ngun fahran mai hian a lo thlîr reng a, Lianchhingi ang hlein a hre nghe nghe a, mahse a hmuh lohna a rei tawh êm a, Lianchhingi a ni ngei em tih erawh zawng a chiang ngam chiah bik lo a ni.
Chu hmeichhia chu a lo kal phei zêl a, Challura zâwn a thlen chuan a ding deuh chat a, Challura chuan a lo thlîr ve reng bawk a. Tunah chuan a hre chiang ta, hmuh tuma a zawn Lianchhingi ngei mai chu a lo ni a. Lianchhingi pawhin Challura chu makti âwm tak hian a han en a. A tîrah chuan tunge a nih tih a hre mai bik lo niin a lang. Challura zâwk chuan, "Liani, keimah Challura kha ka nia. Ka rawn zawng che a ni," zâwi deuh sap hian a han ti a.
Lianchhingi chu a phu deuh zawk a, a beisei phâk loh leh a rin loh tak maia Challura hmêl a han hmu chu mumang te pawh ang rum rumin a hre hial a ni. Challura hnenah chuan, "Fimkhur hle rawh, lal inah sâwn an awmkhâwm a nia. Khaw pâwnah min lo nghâk rawh," a ti a. Hmanhmawh takin a kal leh nghal sawk sawk a. Challura chuan a thlîr zui vang vang a. Chutih lai chuan a awmna lam panin mi ṭhenkhat hi an lo kal a. Challura pawh rang takin a kalsawn nghal a. Chûngho nêna intawh chu a duh lo a ni.
Kawtchhuah lam pan chuan a kal nghal thuai a. Hlauthâwng tak anga lan a duh loh avângin pangngai takin a kal hram hram a. A chêt ziaah rinhlelh tûr awmin a lang lo. Amah lo hmutu pawh awm se, khawtual mi ve maiah an ngai ngei ang.
Challura chu kawtchhuah a thlen veleh kawng chhak hnim buk zingah a biru nghal thuai a. Lianchhingi lo thlen hun tûr chu a nghâk ta veng veng a.
Khua chu a tlai zêl a, Lianchhingi hmêl lah a rawn lang theih bawk si lo. Challura chu a ngaih a ṭha lo rilru hial tawh mai. Lianchhingi chuan harsatna a tâwk nge tlanchhuah a tum tih an hre chhuak zâwk ni? Chutiang thil chu a thleng a nih vaih chuan Lianchhingi dinhmun chu a ngaihtuahawm hle dâwn a ni.
Comments
Post a Comment