PASALṬHATE KHAWVÊL 4

BUNG LINA

'KA NU, KHAWNGE I AWM?'

Zolur khaw lamah ve thung chuan, Pasalṭha Chalkhenga leh a hote râlin an thah fai vek thu chu tîti thangva aṭangin an lo hre ve a. Chu thu zet chuan Zolur khaw mipuite thin a ṭhâwng takzet a ni. Thudik ngei a ni tih an han hriat hnu phei chuan an thin a rim takzet a, pasalṭhate chuan an ṭhiante phuba la ngei turin chhia an chham a, Zonuam khua nena an inbeihna chu a bul ṭanna ang chauh a ni. Tunah chuan anmahni zâwkin Zonuam khua chu va rûn an duh tawh a, indo lo thei lovin an awm tawh a, a che hmasa zâwka ṭan chu an duh tawh a ni.

Ni hnih chhûng zet chu pasalṭhate sûn nân awmni an kham a, tumah ram chhuak reng an awm lo. Mitin mai chu an ngui nghuai a, naupang takngial pawh in chhûngah an ṭhu ngui nghiai hlawm mai. Chalkhenga nupui phei chuan a tuar thiam lovin khui lovin a ṭap hâwm hâwm reng a, a pasal tel lo chuan engtinnge a khawsak chhoh tâk ang a, engtinnge a fate hi a enkawl chhoh tâk ang ni? Ni e, pasalṭhate khawvêl hi zawng a nun a râwng lua a ni e. Mahni in chhûng lum leh nupui fanaute pawh ngaihsak hman lovin, an tâna hlâwkna leh ṭangkaina awm hauh lovah, mahni nun thap tak meuh meuhin an rammu a, vanneihnain a hum sêng zozai bîk si lo. An hmangaih an nupui fanaute hmu leh tawh ngai lo tûrin ramdaiah, tu khawkhah hriat leh ngaihsak pawh hlawh lovin an arte thih mai mai chu a ni si a. Pasalṭhate nun hi zawngin hahdamna leh chawimawina a zawng lo va, miten an fak leh fak lovah an buai hek lo. An hmêlmaten dinhmun derthâwng taka an rawn siam a, an nupui fanaute thlabâra an awm a nih chuan, pasalṭhate chu an râlthuam ṭha ber ber nen hmêlmate bei tûrin an che chhuak mai ṭhin. An thiltih chu miten hria se, min fak se la, chawimawina min hlân se, an ti ve lêm lo. Ngawi rengin an che chhuak mai ṭhin a ni. Thihna hi an tân chuan ṭhianṭha ang a ni a, hahdam taka an chawlhna hun leh chawimawi an hlawhna nî a ni si a! 

Chutianga ṭah leh nuih fâwma Zolur khaw mipuiten hun leh ni an chhiar bek bek chhûng chuan khuangchawi thla te hial a lo her chhuak leh ta. Mahse, hemi kum zet erawh hi chuan pa neinung leh khawsa thei deuhte pawhin khuangchawi tumna rêng an nei lo. An nun a nguai a, pasalṭhate thihna chuan a la nghawng takzet si a. Chu lo rengah pawh, an hmêlmate chuan englai pawhin an rawn rûn thut thei reng a ni si a. An tân chuan inthlahdahna hun rêng a awm lo. 

Challura nu Kapchhungi chu kum upa tawh tak mai hi a ni a. A hriselna a pan viau tawhin, zan khat mitchhin tâwk maithei dinhmunah a ding reng a ni. Chutih lai kârah a fapa Challura thih thu chuan a rawn dêng leh ta bawk si a. Ani tar lam tawh, taksa chak bawk si lo chuan a tuar zo thlâwt lo va, a fapa thih thu a hriat tûk lawkah awmlaiin a boral ve ta nge nge a ni. 

Chumi tlai chuan Zolur khaw lal inah Lal leh khawnbawl upate chu an tîti ho a, Lalvunga chuan Challura nu thih thu chu rawn phuh chhuakin, "Challura nu chuan min peih loh san ta nge nge a ni maw?" zawh bîk pawh nei chuang lêm lo chuan a han ti liam puat a. Hualzakunga chuan, "A nih tak kha maw le, a bawrhsawm ve tawh hrim hrim a, a fapa boral thu a han hre leh nghal vei nen, a tlin ta ngang lo a ni e. Vanduaina hi a lo thlen tawh vêk vêk hi chuan sal khat khatin a lo thleng ngai lo, an tih ṭhin khaw maw. Saikapa te chhûng zawng an van a duai takzet a ni," a lo ti boh boh a. 

Darchheuva pa an tih mai Darruma chuan, "Challura chu ka ui tak tak a ni. Amah a la naupangin a huaisen bawk si a, kan khaw tihmingṭhatu a la rawn ni chho dâwn chauh asin maw le," a lo ti ve charh charh bawk a. Lalvunga pawh chuan, "A pamhmai teh zawng a ni e. Mi huaisente hi zawng thihna nen inngheng riala khawsa ang mai hi an ni si a," a han ti charh charh a. Challura chu a la thi lo a ni tih leh an khaw lam panin a lo haw mêk a ni tih chu hre ngat se zawng, mak an va ti dâwn rua tak êm!

Hetih lai hian Challura pawhin an khaw ram chhûng chu a lo dai lût ṭan mêk a. Ni hnih zet mai chu ngawpui hnuaiah hun a hmang tawh a, a chau tawh takzet a ni. An khaw ram chhûng a han lût a, tunhmâa a pa nena an lo ramchhuahna hmun Keisah ngawpui dai ruih mai a thlen meuh chuan hah rêng a hre chang tawh lo. Chu keisah ngawpui chhûngah chuan a pa nen sazukte pawh an lo pel tawh ṭhinin, tumpang sih tlânte pawh an lo châng ve tawh ṭhin kha a ni si a. A lung a lêng thar leh ngei mai. 

Keisah ngawpui aṭang hi chuan khua pawh a hla tawh lutuk lova, zanriah bawp man hman tâwkin khua chu a luh hman a inbeisei ru deuh a. A nu kha a la dam a nih ngai chuan a lo ngaihtuah tawh viau maithei a ni. Chutiang thil vêl ngaihtuah chung chuan phur tak maiin an khaw lam pan chuan a kal sauh sauh a.

Zanriah ei hun lai vêl a ni tawh âwm e, Challura pawhin an khaw kawtchhuah chu a thleng ve ta hlawl mai a. A chauh êm avângin lal lungdawhah chuan a ṭhu nghal hnawk a, a taksate chu a rawl ṭhem ṭhum mai. Mahni in lum ngeia mut hahdam der der a thlahlel takzet tawh a ni. A pum lah chu a ri rawk rawk reng a, a ril a ṭâm viau tawh reng a ni. Lianpuii te nufain eitur an paite lah chu kawng lakah a ei zo vel tawh bawk si a. 'Hm, in thlen hunah duhtâwkin buhchangrum leh sa kan la ei dâwn alâwm!' tih sap pahin a pum chu a beng thak thak a.

Chumi ni a Darbuta ramvâk chu a hlawhchham chiang kher mai. A sa kah tum ber zukchal lah chu a fimkhur loh luatah a ti tlân palh hlauh mai si a, beidawngin a haw leh ta ringawt mai a ni. Hlawhcham hian a haw khât viau ṭhin asin maw le, vawiin kher kher chu a ṭum fuh loh ni pawh a ni mahna. Ramsate pawh an fingin an fimkhur ve tawh viau mai a, kah mai mai tûrin an inlar duh tawh meuh lo. 

Darbuta chu chau âwm takin a kal hnak hnak a, kawtchhuah a han thleng a, lal lungdawhah chuan tu emaw ni hi a lo ṭhu veng veng a. Khua a thim deuh riai ruai tawh a, râl aṭang mai chuan mi leh sa pawh hriat hran a har tawh fu mai. Darbuta pawhin a mi hmuh chu tual nge râl tih a hre mai bik lo, chu vang chuan a silai ken chu hman mai inpeih sa atin a han lek chhuak a. Hmalam pan chuan fimkhur takin a pen chho ta a.

Challura chuan a lam pana mi tu emaw lo kal chho mêk chu hmuin a lo thlîr ve reng a. A lo hnaih deuh hnu chuan amah rawn pantu chu, tudang ni lovin Pasalṭha Darbuta a ni tih a hre thei ta a. Challura chuan aw fiah kâk mai hian, "Ka pa Dar," a han ti a. Chu veleh Darbuta pawh chu a ding chawt a. Chu aw chu a hriat ṭhan tak aw a ni tlat mai. Inthlahdah chuang miah si lo hian, "Eng nge ni? Tunge min ko?" a han ti thum chhur mai a. 

Challura chuan, "Ka pa Dar, keimah Challura ka ni e," a han ti a. Chutah zawng Darbuta pawhin a silai chu dah thlain Challura lam pan chuan a pên ta sawk sawk a. Challura chuan ding chung hian a lo nghâk a. Darbuta lo thleng chu lo nuih var var pahin, "Ka pa Dar, i va haw tlai ve? Kha, i ramvâk em ni?" tiin a lo zâwt nghal thuai a. Darbuta erawh chuan engtinmah a chhâng lo, Challura chu a en tlawk tlawk a, mak a tih zia chu a hmêlah pawh a lang chhuak thei hial a ni. 

Challura chuan angaihna a hre lo kher mai, "Ka pa Dar, i ṭha maw?" a la ti ta deuh deuh a! Darbuta pawh chu a rawn harh chhuak ve zawk a, inthiam lo deuh tak chung hian, "E, aw, ka ṭha e," a ti bah deuh nak a. Amah bawk chuan, "Ka han hmu thut che kha ka hamhaih deuh atin a ni e. Eng nge maw a awmzia ni le, râl kutah khân i boral ve emaw tia? Hei lah, i la thi hauh si lo?" tiin thil awmzia chu hriat chian châk hmêl tak hian a han zâwt a. 

Challura chuan, "Ni e, ka ṭhiante ruala thi ve ngei tûr zawng ka ni chiang alâwm. Mahse, ka tlanchhe ta a ni," a han ti ban deuh charh a. Chu thu zet chuan pasalṭha Darbuta thin chu a tiling chiang kher mai. Challura hnenah chuan, "I tlânchhia a maw? I ṭhiante chhan ngam lovin i rawn tlânchhiatsan a maw?" a ti ta sek sek mai a. A thu hriat chu awih harsa a ti takzet a ni. Challura chu a lo chhuang ru ve êm êm ṭhin si a. 

Challura chuan, "Ni e, ka ṭhiante kha ka tlânchhiatsan ta a ni. Ka pa Dar, ka duh vâng rênga tlânchhia erawh ka ni lo tih hi min hriatsak dâwn nia. Ka ṭhiante tlânchhiatsan kha ka hreh lutuk asin; mahse, kan hotupain tlânchhe tûr leh khaw lama chanchin thlen tûrin min tilui tlat si a. Hreh tak chungin ka ṭhiante kha ka kalsan ta a ni. An ruala thih ve kha ka châk lutuk asin," a ti a. A rilru a nat êm avângin a thu sawi zâwng pawh chuan a mittui a tla lek lek thei hial a ni. 

Tunah zawng Darbuta pawhin thil awmzia chu a hrethiam ve ta kuar mai. Chalkhenga chuan an vaia thih vek chu ngaingam lovin leh an chanchin a chhia a ṭha thlentu tur tal chu awm se a tih avângin Challura chu tlânchhe tûrin a ti a ni ngei ang. Chuti ni lo se chuan Challura hian engvang mahin a ṭhiante chu a phatsan hauh lovang le. A thinurnate chu a bo ta duak a, Challura darah chuan a kut chu a han nghat a, aw dam tak mai hian, "Ka nau, inthiam lo duh rêng rêng suh, i tihtûr dik tak i ti a ni e. Kan hnena chanchin thlen tûra i la dam hi a lâwmawm takzet a ni. Chu zawng aia pawimawh zâwk chu, i ṭhiante phuba la thei tûra i la dam hi a ni. Lungngai suh la, i rilru tina duh hlek suh ang che. I ṭhiante phuba chu kan la mawlh ang," a han ti charh charh a. Challura pawh a awm a nuam sawt mai. Dik tak chuan a ṭhiante an thih vek laia mahni chauha, nungdama khua han luh bîk chu a hrehin a zak takzet a ni si a. 

Darbuta chuan, "Titeh, hei khua a tlai chhe zo takngial dâwn e. Khua i lût phawt teh ang," a ti a. Challura chuan hmâ a hruai a, khaw lam pan chuan an inzui chho ta hnak hnak a. 

Khua an luh hnu chuan Darbuta bawk chuan, "Tirawh, kan in lam i pan hmasa phawt mai teh ang. Zanriah te pawh kan bâr hmasa zet a ni ang chu," a ti a. Challura chuan, "Ka pa Dar, kan in lam ka pan hmasa phawt ang chu ka lo ti deuh mai asin. Ka nu ka ngaihtuah tawh êm a ni," a tih chuan Darbuta chu a ngawi rauh rauh a. A tawpah zawng Challura hnenah chuan, "I nu zawng ngaihtuah duh suh, a ngaihtuahawm lovang. Kan in lamah i lût hmasa phawt teh ang," a han ti leh a. Chutah zawng Challura pawhin a aia upa thu chu a hnial zui zêl duh ta bîk lova. Darbuta te in lam pana an kal lai chuan, "Ka pa Dar, ka nu chu a dam ṭha maw? Râlho khán an that palh ang tih hlauin ka ngaihtuah khawp asin," tiin a nu chanchin chu a han zâwt a. Darbuta erawh chuan, "In kan thlen hunah kan la sawi dâwn nia," tiin a lo chhâng duh lek fang a. Challura pawhin engmah a sawi zui duh ta bîk êm lo va. Darbuta hnungah chuan ngawi rengin a kal ve ta hnak hnak a. 

Darbuta te in an thleng ta thuai a, Darbuta nupui Kungliani chuan a pasal chu a lo chiau au va. A beisei loh tak maia Challura hmêl a han hmu thut erawh zawng, ramhuai a hmu ta emaw tih mai tûr khawpa nasain zuk han phu dawrh a maw le! 

Kungliani chuan, "Awi, Ka nu!" tih pahin a pasal bânah chuan a han vuan a. Darbuta chuan, "Kapkima nu, Challura hi a lo la thi awzâwng hleinem maw le, hlauh tûr a ni lo ve," tiin a nupui chu a han thlamuan a. Kungliani pawh chu a inthiam lo deuh tak chung hian a kalsawn ta thuai a. Zanriah a buatsaih zui nghal mawlh mawlh a. Darbuta chuan Challura hnenah chuan, "Tirawh le, pum lam i han hnawh puar phawt teh ang. Chaw ei khamah i nu chanchin chu ka hrilh dâwn che a nia," a ti a. 

Ngawi rengin chaw chu an bâr dun mawlh mawlh a. Rei pawh ei lovin an kham dun ta thuai a. Darbuta chuan dawhthlenga ṭhut pahin vaibel a han ṭan a, tui ti âwm tak hian a fâwp vang vang a. Chutah a han khuh deuh kharh kharh a, a thusawi tûr chu a huphurh ve takzet a ni. Engtinnge Challura hnenah chuan a nu thih thu chu a na lo thei ang ber tûra a hrilh tâk ang le? Chutia angaihtuah lai tak chuan Challura chuan, "Ka pa Dar, ka nu chanchin chu min hrilh tawh ta che," a lo ti khauh mai a. Darbuta pawh chuan pehhel si sê lova a nih ang anga hrilh tawp mai chu ṭha berin a hria a. A chil han lem rîk khulh pahin, "I nu zawngin a nghâk chhuak zo ve ta lo che a ni e. Tunah chuan i pa hnenah hlim takin a awm tawh ngei ang," a ti chhuak ta nge nge a.

Challura chu hnuai lam bihin a kûn tlat a, a ṭap a ni tih zawng hai rual a ni lo. Ni e, pasalṭhate meuh pawh hi an mittui a tla ve ṭhin asin. Challura chuan a nu chu amah vânga thiah riak ngaiin, a inhaw ru ngawih ngawih mai a, 'Aw, hetiang tûr tih hriat a ka ṭhiante rual khán lo thih ve law law mai tûr hi a nia le! Tunah zawng nu leh pa nei lo, fahrah mai ka nih tâk hi. Ka nu, ka pa, tinge heti mai tûra min kalsan ni le? In tel lova dam hi ka châk bik lo asin. Fahrah ni mai tûrin maw min kalsan le? Ka nu, nang tal chuan ngatinge min lo nghah loh ni? Min lo nghâktu i awm si loh chuan, keimah chauh chuan ka lo haw ngam dâwn em ni le?' tiin a inngaihtuah a, a mittui chu dan rual lovin a biangah chuan a rawn far thla zawih zawih a. Nâ zawng zawngah hian a va na ber mai âwm êm! 

Mipa mah ni se, a insûm zo thlâwt lo a ni. A inhnît hlawp hlawp a, awrâwl chhuah meuha ṭah chhuah hâwm hâwm mai chu a duh a ni; mahse a ṭap chhuak thei tlat si lo. A hrawkah chuan hnawhtu awm ang tlat hi a ni si a. 

Darbuta te nupa pawhin khawngaih tih hriat tak mai hian Challura chu an thlîr dun ngawih ngawih a. Han hnem dan vak an hriat loh avângin an thlîr mawl tawp mai a ni. Nakinah zawng Darbuta chuan Challura dara han ben thak thak pahin, "Chala, mipa i nih kha maw, intipachang hrâm hrâm ang che aw. I nu zawng keini ngaihtuah ngai tawh lo tûrin i pa kiangah a awm tawh a, nangmah zâwk hi an rawn ngaihtuah viau zâwk ang che. Chuvangchuan, intipachang la, mipa takin awm rawh khai," a han ti churh churh a. Chutiang bâka han hnem dân vak chu a hre si lo. 

Kungliani pawh chuan, "Ni e, Chala, hmeichhia ang maia ṭah tûr a ni ngai lo ve. I pa ang maia huaisen leh pasalṭha i nih kha maw? Inti pachang la, i hmalam hun atân i rilru buatsaih zâwk rawh khai," a lo ti ve bawk a. Challura pawh chuan a mittui han hrûk sawk sawk pahin, "Ka nu, Kung, i sawi dik khawp mai. Hmeichhia ang maia ka'n ṭah chu ni! Ka pa Dar, tirawh le, kan in lam chu mi han panpui phawt teh le," a rawn tichhuak ta nge nge a. 

Darbuta pawh chuan, "Khati tûr kha a ni reng a ni, ṭah te hi zawng hmeichhe tih âwm tâwk lek hi ania, pasalṭhate hi chuan kan mittui hi kan luan chhuahtîr  mai mai tûr a ni ngai lo ve," tih charh charh pahin a tho ta nghal a. Challura te in lam pan chuan an inzui chhuak ta nghal a. Kungliani chuan kawngka aṭangin a thlîr zui vang vang a.

Challura'n an in a han thleng zet chu, a hrilh a hai chiang ngei mai. An in chhûng chu a lo thim ṭhiap a, thâwm hriat tûr reng a awm lo. Hmânah, hlim taka an chhungkuaa an lo chênna in kha tunah zawng luah loh rûn ang maiin a ṭhing zo ta. Challura chuan insûm har a va ti tehreng êm. Kut khur der der chungin kawngka tlengrel chu a han nem tawlh a, an in chhûng thim ṭhiapah chuan a pên lût ta a. 

"Ka nu?" tiin a han phun chhuak sep a, chutah, a aia ring zâwk hian, "Ka nu, khawnge i awm? I fapa ka lo haw leh tawh asin. Ka nu, ngatinge min lo kalsan tâk mai ni le?" a ti a, a mittui chu a rawn hnâm chhuak ṭiam ṭiam a. Chhuatah chuan a ṭhu hnawk a, insûm hman lêk lovin a ṭap chhuak ta a ni. 

An thâwmah ṭhenawm hnai a mi te an rawn tlân lût thuai a. An rin loh tak maia Challura hmel an han hmu leh ta si chu, mak an ti hlawm ngei mai. Thil awmzia hriat châkin an rawn luh belh zêl a, rei lo têah in chhûng chu an khat titih dêr mai le. Pasalṭha Darbuta chuan a thiam ang angin thil awmzia chu a lo hrilh zung zung a. Ṭhenawm nuho chuan Challura chu an khawngaihin êm êm mai a, insûm har an tiin, an rilru chuan Challura nu chu an au mawlh mawlh a ni ber mai e. 

Challura a lo kîr leh tih thu chuan khua a khah rang kher mai a, lal beng hial a thleng ta thuai mai a ni. Lal leh upate chuan mak an ti hle mai a, Challura chu thi tawh tûr riakah an lo ngai hmin der tawh si a. Lalvunga chuan, "Engtizia nge maw ni ta ngai le? A ṭhiante ruala thi ve tawh khán an sawi bawk si a?" tiin thil awmzia mak a tih thu chu a han sawi chhuak churh churh a. 

Rotata chuan, "A mak ka ti ngawt mai, mahni ṭhiante phatsan duh tûr khawpa mi dawihzep lah niin ka hre bawk si lo," a lo ti ve boh boh a. Khawnbawl upamin Hualzakunga chuan, "Tlangaupa hi kan zuk kohtîr mai dâwn em ni ang? Amah Challura chuan thil awmzia a hre chiang ber nge nge zâwk ang chu maw le," a han ti a, mi dang pawh chuan, "A ni teh tak e, tlangaupa chuan zuk ko se a ṭha ang e," an lo ti ve sap sap a. 

Lalvunga pawh chuan, "Ka upaten in tih miau si chuan kan zuk kohtîr mai ta lawng. Tlangaupa, Challura chu zuk ko chho mai ta che aw," a han ti lung lung a. Tlangaupa pawh chu a chhuak zui nghal tharh a. 

Tlangaupa chu Challura te inah chuan a zuk chhuk a, mi an lo tam phian leh nghal. Challura bulah chuan a va kal hnai a, "Chala, kan lalpain biak che a duh a, min rawn zui chho lawk mai ta che," a han ti nghal ṭawng mai a. Challura pawh chuan hrethiam tak maiin, "E, a ni tak e, ka lo theihnghilh daih alâwm maw le," tih pahin a tho chhuak nghal hluai a. Darbuta pawh chuan, "Kei pawh ka lo kal ve ang e," a ti a, a tho zui ve nghal a. Chutia Challura te ber an chhuah tâkah si chuan mi dang pawh chu an chhuak ve ta sap sap hlawm a. 

Challura ten lal in an han lût chu lal leh upate chuan an lo thlîr ṭhap hlawm a. Lalvunga chuan, "E khai, Chala, râl kutah i thi ve ta mai emaw kan lo ti hman tawh asin! Thil awmzia hriat châkin ka rawn kohtîr ta ngawt mai che a ni e," a lo ti sawk sawk a. Challura pawh chuan, "Lalpa, keima thiam loh a ni e, rawn hmu hmasa ber tûr che ka nih vei nen, ka nu boral thu ka hre leh ta si a, ka buai chhe zo ta vek a ni e," inthiam lo hmel pu tak chung hian a han ti a.

Lalvunga chuan, "Mai mai a, inthiam lo duh reng reng suh, kan hrethiam lutuk che a nia. Chuti lam zawng i sawi tawh lo teh ang. Pasalṭha Chalkhenga te nena in va chêt dan chanchin min han hrilh zâwk teh le. Engtia va chesual thei mai nge maw in nih le?" tiin an thu hriat châk ber mai chu a han zâwt ta a. 

Challura chuan Zonuam khuaa an va chêt dan zawng zawng chu hmaih nei miah lovin a'n sawi par par a. Chutah, râlho nena an intawn dan leh pasalṭha Chalkhenga'n tlânchhe tûra a tih dan te, a tlânchhiatna lama kawng a bo zui tâk dan te thlengin a hrilh fai ta kelh mai a ni.

Lalvunga chuan, "Nangmahni leh nangmahni râl kutah in inbarh ringawt mai a ni maw? Engtiziaa in hma lamah râl an awm tih hre reng chunga fimkhur nachâng hre hauh lo nge maw in nih chu le? Chalkhenga phei chuan hriat âwm tak a nih vei nen," tiin an khawsak danah chuan a lung a awi zân lo ni hian a lang a. Ani lah taka, râl nena intawh sual palh hlauhawm tak a nih laia, fimkhur nachâng hre lo ang ziazânga an han che chhuak ringawt mai chu hriatthiam a har viau reng a ni.

Challura chuan, "Lalpa, kan rilru kha a hmanhmawh tawh êm êm mai a, khaw lam ringawt kan ngaihtuah a talangin hmelma lam reng reng kan ngaihtuah chang tawh hauh lo mai a. Tin, khati teh thuta kan intawh kha kan ring lo bawk atin ni," tiin a ṭhiante thlavang chu a thiam ang tâwkin a han hauhsak ve a. Lalvunga pawh chuan, "Umm, thil thleng tawh hnu chu thlâk danglam emaw, siam ṭhat theih emaw pawh a ni tawh lo ve. A nih tûr chu a ni zo tawh tho tho, tih danglam leh theih a ni tawh chuang lo. Nang pawh inthiam lo duh remg reng suh ang che. I nu chungchâng thuah a pawi ka tiin ka tawrhpui êm êm che a, harsatna emaw, mamawh i neih phawt chuan ka bulah sawi hreh suh ang che. Nangmaha awm i hreh deuh a nih pawhin i duh phawt chuan ka hnenah i rawn awm thei ang," tiin Challura chu a hnena awm a phal thute thlengin a hrilh ta vek a. 

Challura chuan an lalpa chu lawmthu a han hrilh hmasa tê tê a, tin, an in chu luah zui zêl a tum thu leh lal tâna a rinawm reng tûr thuin a han chhâng zui a. Rei vak lo hnuah lal in aṭang chuan a chhuak leh ta thuai a. An in lam pan chuan a chhuk thla leh ta hnek hnek a, a hnung deuhah Darbuta chuan a rawn zui ve bawk a. Challura chu a ngaihtuah deuh hlek avângin a rawn zui thla ve nghal hi a ni âwm a, a lusun khawhar chhûng tal chu awmpui a tum rilru deuh a ni.

Chutiang chuan hun leh mite chu a ral ve bek bek zel a, Zolur pasalṭhate chuan an ṭhian thitate phuba chu laksak ngei tumin an hriamhrei neih ang angte chu an tuaihnûm sauh sauh a. Lal in lamah lal leh upate chuan râl an rêl âwl lo va,  pasalṭhate leh vâl upate lahin rammutna hun ṭha ngaihtuahin thla de tîr chu an thlîr âwl lo mai. Ni e, an tân chuan thla dê hian awmzia a nei tlat si a. Thla de tîr vei lamah arsi a awm chuan 'Mi lu a khai' an ti a, rammutna hun ṭha berah an ngai a ni. Tin, thla de tîr ding lamah arsi a awm chuan 'Chem a châwi' an lo ti ṭhin bawk. 

An beisei leh duhthusâm ang ngeiin thla dê chuan mi lu a khai ta va va mai le! Pasalṭhate chuan rammutna hun ṭha a ni tih hriain lal hnenah chuan, 'Rem i tih chuan kan ṭhiante phuba la tûrin kan thawk chhuak tawh ang e, i pasalṭhate hian i remtihna chauh a ni kan nghah tawh ni,' an ti a. Lalvunga pawh chuan, "E, ka pasalṭhaten ṭha intih apiang chu ṭha ka ti ve mai e. Tluang takin va kal ta ula, hnehna hlado nen khua in rawn lût leh dâwn nia. Khuain hualhim che u rawh se," a ti a, a pasalṭhate chu duhsakna nen a thlah liam ta a ni. 

Zonuam khaw rûn tûr chuan pasalṭha Darbuta leh Aihnawlha hovin tlangval za nufa aia tam mah an thawk chhuak a, hetiang hunah hian tlangvâl zawng zawng an thawk chhuak ngai lova, râlin an rawn rûn palh ṭhulhah tlangvâl leh pasalṭha eng emaw zât chu an hnutchhiah ṭhin a ni. 

Darbuta ho chuan rammu tûr tlangvâlho chu kawtchhuah lam panin an inzui thla ta nguah nguah mai le...