PASALṬHATE KHAWVÊL 5

'PASALṬHATE KHAWVÊL' 

BUNG NGANA

'CHHINGKHUAL VÂL ZÛN'

Lianchhingi chu a khua a har ru thei ngei mai. Kha mikhual tlangvâl khán a rilru a luah tlat mai si a, ngaihtuah loh a tum ngial pawhin a rilruah chuan a lo lang leh ṭhin tlat si a. 'A la nupan hmêl tehlul nen, pasalṭha huaisen tak zawng a ni ngei ang le' ti tein a ngaihtuah kual a, Challura chu hmuh leh a châk ngei mai. Mahse, Zolur khua leh an khua chu hmelma ang mai an ni si a. Chutiang kâra an hmelma tlangvâl lo ngaih rûk êm êm mai chu, sawi chhuah chi pawh a ni lo ve. 

Tunah chuan lo lam pawh an zo fel tawh a, buh seng hun an nghâk a ni ber tawh zâwk a. Lo lama awm reng ngawt thu lah awm hek suh, Lianpuii te nufa pawh khuaah an haw veleh ta nge nge a. 

Ni khat chu, lal inah lal leh upa hovin zû an lo khawn mêk laiin, Zonuam khua aṭangin khawnbawl upa Hrangchhinga leh tlangvâl pahnih hi an lo lang hlawl mai a. Lalkhuma chuan, "E hiau! Ka pa Chhinga te in mi maw? Zeng tizia nge ni ta, pawi hai a awm ta em ni le?" tiin a lo zâwt nghal sawk sawk a. Hrangchhinga chuan, "Hei le, i pain min rawn tîr a ni e. Tunah hian Zolur khua chuan min run tumin an inpuahchah mêk a, engtikah nge an rawn thawh chhuah dâwn tih chu kan hre bik lo. Mahse, a rûkin kan thlithlai ru reng a, an rawn thawk chhuak har tawhin a rinawm loh. I pa chuan heti hian min chah a, 'I pasalṭha leh tlangvâl eng emaw zât chu rawn thawh chhuah tîr ang che,' tiin. I unau dangte pawh kan hrilh vek tawh a, anni pawhin pasalṭha leh tlangvâl eng emaw zât chu an rawn thawh ve dâwn a ni. Zolur khua chu min rawn er lêt leh thei tawh lo tûra siam chu i pa thiltum a ni e," tiin an kal chhan ber chu thu khuh nei hauh lovin a sawi ta churh churh a. 

Lalkhuma chuan, "Zolur khaw lalpa chuan engtia kawhmawh han bâwl ngam nge maw a nih reng reng le? Fanai lal mai maiin Sailo, 'Ni leh thla kâra lêng' hi min do ngam ang maw? A ṭha e, ka pasalṭha leh tlangvâlte chu in duh zât zât in hruai thei ang. Zolur khaw lalpa chuan keini Lalngurliana thlahte hi do mai mai chi kan nih loh zia a hre chiang dâwn khawp alâwm," a ti charh charh a. Lalngurliana hi Sailo lal ropui tak a ni a, Vankunga hi a fapa a ni nghe nghe a ni.

Bukpui khaw pasalṭha Keisata leh tlangvâl sawmruk dâwn lai mai chu Zonuam khaw lam pan tûrin an inbuatsaih nghal ta chûk chûk a. Chawhnu tlang her hun âwm vêlah Hrangchhingate nen chuan an inzui chhuak ta nguah nguah a. Lalkhuma chuan a pasalṭhate chu, 'Râl that lo chuan tumah lo kîr suh ang che u. Hmêlmaho chu a tam thei ang ber va that ula, ropui takin kan lo hmuak dâwn che u ania,' tiin a thlah nghe nghe a ni. 

Chumi zâna Lianchhingi inlêng tlangvâlte chuan an ṭhiante chanchin chu an sawi zui sap sap hlawm a. Tlangvâl pakhat chuan, "Khaw khat lek bei tûra mi chuti zah han inchah khâwm tâk mai chu ni! Zolur khaw pasalṭhate chu eng ang fakaua huaisen leh thei nge maw an nih le?" tiin khaw khat lek bei tûr si, pasalṭha leh tlangvâl chuti zât an han inpun khâwm ta chîam mai chu mak a tih thu a han sawi a. 

Lal Sadâwt fapa Thiamkunga chuan, "Ka pa sawi ka hriat dân chuan, Zonuam pasalṭhate hian an ngam lo deuh ni âwm tak a ni. An pasalṭha chhuanvawr Darṭhuama ho meuha an thawh chhuah pawhin eng ruai an ni lo, chutih a hnu hmanah a tlânchhe zâwkah an la ṭang zu nia! Tawngpawng zuam ngawt chi zawng an nih tawh hmêl loh a ni," a han ti charh charh a. 

An zînga mualkîl upa fapa lo awm ve Hnehzova erawh chuan, "Zolur khua saw tho leh tûr awm map lovin an va rûn darh vek dâwn alâwm le. Mi zahnih aia tam an va thawk chhuak dâwn a ni a, Zolur khaw pasalṭhate chuan an lo chelh hauh lovang le. An chanin maian chan pawh a tluk tawp nâng," a lo ti ve bai bai thung a. 

Lianchhingi chuan a in lêngte thusawi chu ngawi rengin a lo ngaithla ve kar a. A rilru chuan Challura kha a han hre chhuak a, a ngaihtuah ta viau mai. Pasalṭha rual chuti zozai chu engti kawng zâwng mahin Challura te chuan an lo dang hneh âwm chai si lo. Chuti a nih si chuan Challura te chu râl kutah an thi emaw kha a ni âwm si a! A rilru chu a hah ru takzet a ni. 

Zân pawh a rei ta, Lianchhingi in lêngte pawh chu an tho ta sap sap hlawm a. Lianchhingi chuan, "Aw, engatinge in thawh tak sup sup mai ni? A la hmâ alâwm, la ṭhu rawh u," tiin a han chelh fiam a; mahse, tlangvâlho chuan, "Lêng hâwn ar pawh a khuang ta e, in nufa pawh in chauvin mut hahdam pawh induh ang, nak zânah kan lo lêng leh zâwk dâwn nia," tiin an chhâng hlawm a. Zawlbûk lam pan chuan an inzui chho ta thliai thliai hlawm a. 

Lianchhingi chuan a nu bulah chuan, "Ka nu, Challura te khua chu an rûn tak takin i ring em? Lo rûn ta se, Challura te chuan an lo do hneh kher lovang ti raw?" tiin a han zâwt a. A nu chuan, "An rûn tak tak dâwn zawng a nih hmêl e. Chuti ni suh se la, kan khaw tlangvâlte pawh an kal tawp nâng. Lal Vankunga hian a fate a pun a ni si a, Challura te tân chuan pasalṭha chuti zozai chu lo hneh ngaihna a awm lovang. Ṭanpuitu ṭha tak an nei te a nih ngawt loh chuan," tiin a han chhâng a. Lianchhingi chu rilru hah hmêl takin a han thaw halh a, 'Aw, engatinge mahni mihring puite thah châka an han hmanhlel tâk êm êm mai chu ni aw? Mi dang tibuai kher lo hian mahni awm awmin awm ṭheuh ila, tupawh kan thlâ a muang ang a, râl hlau reng renga awm angai lo tûr' tiin a han ngaihtuah zui a. Indo leh inrûn reng renga hun hman zawng thlamuang taka awm a har si a. Mahse, pasalṭhate khawvêl chu indonain a khat a, mahni chipuite ngei pawh ni se, hmêlma an nih miau si chuan, khawngaihna nei miah lova tihhlum chu an tih ngei ngei tûr a ni tlat si a. An duh leh châk vang lam ngawr ngawr lam ai mahin an zahawmna humhim a, an khua leh tuite chu thlamuang takin awm se an tih vâng zâwk a ni miau si. Pasalṭhate hringnunah hian zawng, khawngaihna leh hmangaihnate, lainatnate hian hmun an chan loh châng a awm fo ṭhin a ni.

Lianchhingi chu khawkhat nula hmêlṭha leh fela an sawi a ni bawk a, ertu leh îtsîktu pawh a nei nual reng a! Chûng amah ertute zingah chuan an lal khawnbawl upamin Lianchhunga fanu Tlangkhumi pawh a bàng bik hauh lo mai le. Tlangkhumi hi nula hmêlchhe zawk zawk zawng a ni bik hauh lova, an khuaah phei hi chuan Lianchhingi aia hmelṭha titu pawh an tam ve viau reng a. Amaherawhchu, Tlangkhumi mizia hian sawisep a kai ru viau mai a, nula sihhnip, mipa tel lova khawsa thei lo an tih ang deuh hi a ni a. An khaw tlangvâl zingah hian uang duh chu awm se la chuan, a lakah hian uang thei tûr an tam viau tawh ang le. A pa khawnbawl upamin a nih avâng chauh hian a mualpho lo mai mai zâwk pawh a! Dik tak chuan an lalpa nen pawh hian vawi tam tak chu an lo chesual dun tawh a, Tlangkhumi hian an lalpa chu pasal atân neih theih mai a inrin vang a ni pakhat a. Mahse, Lalkhuma hian ani (Tlangkhumi) ai chuan Lianchhingi chu a hmêl duh zâwk tlat mai a, hei vâng hian Tlangkhumi pawhin Lianchhingi chu a huat phah hle a, a rûkin tihchhiat dân tûr a zawng ta reng a. 

Nikhat chu Lianchhingi chuan thingphurh tumin an lo lam chu a pan a. A hriat miah lovin Mual vêng pathlawi Tlanglawma chuan a lo zui ru reng mai a. Lianchhingi lah chuan zuitu a nei a ni tih inhre hek lo, kal pah chuan a zâi rat rat a. An lo a thlen veleh a thingphurh tûr chu a fawm nghal sawk sawk a. A phurh zawh âwm tâwk a fawm ngah hnu chuan thlâmah a lût a, a chungah eng thil nge lo thleng dâwn tih hre miah lovin thlâm chhuatah chuan a mu zâl der der a! Chutih lai tak chuan Tlanglawma chu a lo lût thut mai a. Lianchhingi chuan rang taka thawh a han tum a; mahse, Tlanglawma chuan a rawn bawh nghal ruak mai a. Chu veleh Lianchhingi chuan, "I va han zakthei lo êm êm ve? Tho rawh, i zak chai lovem ni?" tih pahin Tlanglawma chu a chûm âwk âwk a. Tlanglawma lah chuan hlawhtlin ngei a tum avângin Lianchhingi chumna te chu taivang seuh tlukah pawh a ngai duh dêr si lo. Lianchhingi lah chu a theih ang angin a ṭang ve tlat bawk si nen, thlâm chhuatah chuan an inchai dun ta thial thial mai le.

Chumi ni kher kher chuan mi dang lo lama kal ve an awm hauh lo mai a! Hei hi hre rengin Tlanglawma chuan, "Liani, ṭang ṭang duh lo mai rawh, tumahin an rawn chhan chuang lovang che. Tun aṭang hi chuan ka nula, ka theih hnu i ni tawh dâwn a ni!" tih pahin ngeiawm takin a han nuih vei sâwng a. 

Lianchhingi chuan, "Nanga nulâ nih ai chuan thih pawh ka thlang zâwk e. Engvânga hetianga min ti ngam nge i nih? I zak chai lo'm ni?" tih pahin Tlanglawma chu a theih ang angin a bei lêt ve reng a, tlawm mai chu a tum bik hauh lo mai. 

A rinai daihin nula chuan thahrui a lo nei zêk a! Tlanglawma pawhin chuti maiin a thiltum chu a ti hlawhtling thei mai bik lo. Lianchhingi chu thih tha tak meuh meuha ṭang a ni bawk a, inpêk mai chu a tum lo chiang kher mai. A ṭan nasat êm avângin a silhfen inbelte chu a phelh pheng phung tawh a, a taksa no nalh tak takte chu an lang var hai mai! Chûngte chuan Tlanglawma chu a tiphur zual ting mai si a. Rem leh rem lo hian Lianchhingi nauchaw bawm kawh lah mai chu a han khawihsak hrâm a! 

Lianchhingi thinrim chuan hlauh rêng a hre chang tawh lo. Tlanglawma samzialah chuan manin a tha tâwp chuan a han phihsak ta ngheng mai a. Tlanglawma pawh a bu dâwrh a, Lianchhingi chung aṭanga chuan a let thla nghal tawp a. Chu veleh Lianchhingi chu a tho thuai a, rang takin a chempui chu a chuh nghal a. Tlanglawma rawn thawh tum mêk chu thinrim vanga aw khur dawt dawt chung hian, "Zakthei lo pa, khawinge, ka han sâthlum nghal law law teh ang che," tih pahin a chem chuan a tin ta vu mai le. Chutah meuh zawng, Tlanglawma chuan a hlau ta hle mai a, Lianchhingi chuan a sât duh tak tak ang tih a hai hauh bawk si lo. A chechang ngam ta der lo mai. A tira a lo suangtuah ang ngwt kha zawng a ni ta hauh lo mai le. Aw lawi rût chung hian, "Khai, Liani, ka thiam loh a ni e, min ngaidam hrâm rawh," a han tichhuak thei hrâm a. 

Lianchhingi chuan, "Ka ngaidam mai mai dâwn lo che. Lal hnenah ka thlen ang a, ka chunga i thiltih man hi chu i hmu dâwn khawp mai," a ti a. Rang takin thlâm aṭang chuan a chhuak zui nghal a. Thing pawh phur ta lo chuan a haw ta vang vang a. 

Lianpui chuan a fanu thusawi chu ngun takin a lo ngaithla kar a, a thin a rimin a rilru pawh a na kher mai le. A lung a âwi thei thlâwt lova, lal hnenah a thlen ta nge nge a ni. 

A tûk zingah chuan Lalkhuma chuan a khawnbawl upate chu kovin Lianchhingi leh Tlanglawma chungchâng thu chu an ngaihtuah ho ta a ni. Lalkhuma chuan, "Khai le, kan kim tawh a ni lawm ni? Lianchhingi te nufa leh Tlanglawma pawh an lo thleng ta bawk a, kan thubuai chu i han ngaihtuah ṭan dâwn teh ang.

"A hmasain Lianchhingi nu khán thil awmzia han sawi hmasa phawt teh se," a ti a. 

Lianpuii chu lal leh upaho hmâah chuan a rawn ding chhuak a, a zam ve hle mai a, chutiang hun leh hmunah chuan a la ding chhuak ngai si lo. Lal leh upate hnenah chuan, "Tlanglawma hian nimin chhûn khán ka fanu thingphur tûr hi a lo zui ru a. Ka fanu Lianchhingi thing fawm zo, thlâma a ṭhut chawlh laiin Tlanglawma hian a lo pawngsual a. Mahse, a vanneih asiamin tlâwm lohvin a tlan chhuak leh thei hrâm a; a êm leh hnam pawh chuh hman lovin a rawn tlânchhe haw ta ringawt mai a ni.

"Tlanglawma hian a thiltihah hian inchhir a hnêkin tun thlengin ngaihdam tak ngial pawh min la dil lo va; Zawlbûkah phei chuan ka fanu chungah a uang hial niin an sawi a, a mi tihdanah hian min hmusit êm mai a, sepui lo chuan ka lung a âwi thei lo a ni," a ti a.

Lalkhuma chuan Tlanglawma hnenah chuan, "Lianchhingi nu sawi chu a dik em? Eng nge sawi duh i neih ve le?" a han ti a. Tlanglawma chuan, "Lalpa, Lianchhingi nu thusawi kha dâwt vek a ni e. Lianchhingi hi ka pawngsual lova; amaherawhchu, a remtihna ngeiin kan mu dun thung a ni," tih pahin a hawi valh valh a. Lal in bang phen lamah chuan tlangval ṭhenkhat hian an inchhâl lai vêl chu an lo ngaithla a, Tlanglawma thusawi an hriat chuan an haw haw a, kut an beng dur dur a. 

Lianchhingi chuan thinrim hmaisen ṭeuh chung hian, "I va han zakthei lo êm êm ve? Nang hian ka puan hmawr pawh i dek lo tih hre rawh, 'Ka tlâwm e' te mi han tih vei chai ni," tih pahin Tlanglawma chu a kâwk sawk sawk a. Tlanglawma chuan, "Ka tlâwm chiang lutuk che aw! A tirah chuan i ṭang ve deuh a; mahse, a hnulamah chuan i dawh ta hle hle a nih kha maw!" a han ti lêt salh a. Bang phen aṭanga lo ngaithlatute chu an haw haw leh dur dur a, nulâ chu tihzam an tum a ni pah fawm a. Zahmawh pui puiin an lo râk ve chiam a, chu chu lal upa ṭhenkhatin an lo khap vat a. 

Lalkhuma chuan, "A nih leh Liani, Tlanglawma'n a sual lai che chuan in bul hnaiah mi an awm em? tiin a han zâwt a. Lianchhingi chuan, "Chutiangin mi dang an awm ka hre hauh lo. Awm se chuan ka âu thâwm hriain min rawn chhan ngei ang," a ti a. 

Chutih lai chuan Tlanglawma chuan, "Lalpa, khami ni khán tumah lo lama kal ve an awm lova, kan pahnih chauhin kan intiam ruala, a thingphurh tûr kan fawm zawh hnuah thlâmah kan lût a, chuan, ih...kan mudun ta mai a ni," a lo ti ve thuai a. Lianchhingi chuan, "Mi tenawmpa, i daw chiang lutuk êm mai! Chemin sah che ka tum a, ngaihdam min dil ruai ruai a ni lo'm ni?" a tihkhum siah siah a. Tlanglawma chu a ngawi ta reng a.

Lalkhuma chuan, "Umm...a tâwk e. In thu leh hla chu kan hrechiang ta viau mai. Tlanglawma hian Lianchhingi hi 'a remtihna ngeiin kan mudun e' a ti a. Lianchhingi ve thung chuan 'ka duh lo chung min sual a ni' a ti ve thung a. Khaile, ka upate khán zawh duh emaw te in nei em?" a han ti a. Khawnbawl upamin Lianchhunga chuan, "Lalpa, han zawh belh vak tûr pawh kan hre lo ve," a lo ti boh a. Lalkhuma chuan, "Hm...chuti a nih zawngin Lianchhingi te nufa kha tapchhakah lo awm se la, Tlanglawma erawh kha chu sumhmunah lo awm bawk rawh se. Tlangvalho pawh kha lo insaseng hrih ang che u," a ti a. Tlangvalho chu an thûm mam mam a, an awmna aṭang chuan an kalsawn ta hlawm a. 

Lalkhuma bawk chuan, "Kha, an thusawi kha in hre ṭheuh va, khati kha a ni a, tu zâwk nge thiam in tih a tu nge thiam lo in tih zâwk? In ngaihdan han sawi teh u le," tiin a upate chu a han râwn a. 

Lianchhunga chuan, "Kei chu Tlanglawma thusawi kha dikin ka ring. Hmeichhia zâwkin an duh ve rêng a nih loh chuan hmun fianrialah, engvanga mipa tawmpui nge a nih ang? A hmingchhiatna tûr thup tumin thubuaiah a la a ni lek fang lo maw?" a han ti boh boh a. Roliana pa an tih mai ṭhin Hlunchhunga erawh chuan, "Ngawi teh u, nula kha a ṭang huai ngam êm mai, Tlanglawma sawi ang ngawt kha chu a nih ka ring lo deuh tlat mai," tiin Lianchhingi ṭan zâwng chuan a lo sawi ve tlat mai a. Midang pawh chuan an ngaihdan hrang hrang chu an sawi chhuak ve nak nak a, an thu a sai sa ta nuai mai. 

Chutah zawng Lalkhuma chuan thu a pawhchah angai a ni tih hriain tihian a han ti a:

"Kan thu ngaihtuah hi a nihna takah chuan Tlanglawma leh Lianchhingi hi tawllawt nupa ang maiin 'Ka ti' ti leh 'Ti lo' tiin an inhnial a. Tu emaw zâwk zâwk hi chuan dawt an sawi a ni. Chuvangchuan, ti hian ti ila ṭhain ka hria. Dik zâwka rin chu kan nei ṭheuh maithei; mahse, thiam chantirna tûr khawpa chiang a awm si lo. Chutiang bawkin dik lo zâwka ngaih lo nei ta pawh ni ila, thiam loh chantirna tûr khawpa an dik lohna erawh hailan a harsa hle si a. Chuvangin 'Sakei ngho sehtir' mai ṭha ka ti e,"

a rawn tichhuak ta charh charh a. Midang pawh chuan sakei ngho sehtir mai chu ṭhe berin an hria a, an lalpa chu fing pawh an ti kher mai. Sailo 'Ni leh thla kâra lêng' nge nge chuan rorel dan pawh an lo thiam nameuh mai le!

Lalkhuma chuan Lianchhingi leh Tlanglawma chu a han kohtir a, an hnenah chuan tihian a han ti a, "In thubuai hi chuti maia rem fel chi niin a lang lova, tunge thiam a tunge thiam lo zâwk tih lah chu hriat a harsa hle si. Ka upate nen kan inrâwn tlang a, sakei ngho sehtîr mai che u kan ti tlâng ta a ni. Tlanglawm, sakei ngho seh chu i ngam em?" tiin. Tlanglawma chuan ban deuh charh hian, "Ng..ngam....e" a han ti a. 

Lalkhuma chuan, "A nih leh Liani, nang sakei ngho seh chu i ngam ve em?" tiin a han zawt zui ve nghal zat a. Lianchhingi chuan, "Thudik hailanna tûr a nih dâwn phawt chuan ngam tehreng mai," tiin a lo chhâng a. 

Lalkhuma chuan, "Aw le, sakei ngho seh chu in remti dun ta a, tlangaupa khán kan sakei lu târ, a ngho lehlam kha han la rawh se," a ti a. Tlangaupa chuan sakei ngho chu a rawn la ta thuai a. Lalkhuma chuan a upamin Lianchhunga hnenah chuan, "Khai le, Tlangkhumi pa, nang han ti vêl raeh le," a ti a. 

Lianchhunga chuan, "Khai le, ngun takin lo ngaithla rawh u. He sakei ngho hi kuta keng chungin, 'Kan inkhinna thuah hian dawt ka sawi chuan, tun aṭanga thla vawi thum a ral hmain sakeiin tuna a ngho ka seh ang hian min seh rawh se,' tiin in chham ang. 

"Aw le, tunah Tlanglawma'n a lo chham hmasa ang," a ti a.

Tlanglawma chuah hreh hmêl zet hian, "Kan inkhinna thuah hian dawt ka sawi chuan, tun aṭanga thla vawi thum a ral hmain sakeiin tuna a ngho ka seh ang hian min seh rawh se," tia chham pahin sakei ngho chu a seh a. Lianchhunga chuan, "Aw le, tunah Lianchhingi'n a chham ve ang," a ti a.

Lianchhingi chuan, "Tlanglawma nena kan inkhinna thuah dawt ka sawi a nih chuan, tun aṭanga thla vawi thum a ral hmain sakeiin tuna a ngho ka seh ang hian min seh rawh se," a ti a, sakei ngho chu a seh ve ta nghal a. 

An chham zawh hnu chuan Lalkhuma chuan, "Aw le, lal leh upate hmaah sakei ngho sehin chhia in chham tawh a, in thubuai chu a tawp ta. Hun leh niin a la rawn tifiah ang a, khuavangin a dik zâwk leh a dik lo zâwk a la rawn puang ang.

Tun aṭanga thla vawi thum a ral hmaa sakeiin Lianchhingi a seh chuan Tlanglawma laka tlâwm reng siin dawtin a ṭang tihn a ni ang a, hmingchhiat a hlawh ang. Tlanglawma zâwk hi a seh a nih erawh chuan, Lianchhingi a pawngsual khán hlawhtling lo pui hlawhtling angin a insawi a, dâwt a sawi avângin a nunnain a tuar tihna a ni ang a, thiam loh a chang ang. Tin, Tlanglawma chhungten sepui an châwi bawk ang, salam nen," tiin thu tâwp chu a han sawi ta a. Lal in aṭang chuan an ṭindarh ta sang sang hlawm a. 

Eng pawh ni se, Lianchhingi chu hmingchhiat khat chuan a hming a chhe ta reng reng a, tlangvâlho lahin a mâwi lo zâwngin a chanchin chu Zawlbûk lamah an sawi nasa mai si a, Lianchhingi tân chuan khuaa awm ve reng pawh a nuam ta lo hle mai. Amaherawhchu, sakei ngho seh meuha an inkhinna thu kha a hre reng a, hunin a thiam zâwk leh thiam lo zâwk chu a la rawn hril ang chu.

Zêp nâk emaw, Challura chu a ngai ru ngawih ngawih mai a ni.An khaw tlangvalte chungah chuan a thin a rim ru ṭeuh mai a; mahse, a thinrimna chu tihlan ngam chi rual a ni si lo. Tlanglawma ngei pawh vawi hnih khat chu a lo lêng leh tawh a, Lianchhingi chuan zakthei lo a tiin a ngei ru êm êm mai a. Mahse, a lo be chhe ngawt thiang bik si lo. Lo be chhe vaih se emaw, lo mutsan daih ta ang se, Tlanglawma chu vâl upa kiangah a vui ang a, vâl upain thu tlingah a lo pawm a nih vaih chuan, tlangvâl rual thinrim chuan an in chu an lo sâwi emaw kha a ni ang a, atân chuan men ngaihna rêng a awm tawh lovang. Chutiang a nih avâng chuan lo lamah bawk a nu nen an riak lût leh ta nge nge a ni. Tute emaw chuan an hmêl ṭhatna chu an vanneih puiin an hmingthan phah hlë ṭhin a; mahse, Lianchhingi erawh chuan a hmêl ṭhatna chu a vanduai puiin, a hmingchhiat phah hlauh thung si!