PASALṬHATE KHAWVÊL 7

 'PASALṬHATE KHAWVÊL'

BUNG SARIHNA

Zolur khaw pasalṭha rualte chuan an awmna aṭanga chil chhâk phâk leka hlaa awm, an hmêlmate thâwm chu an ngaithla vang vang hlawm a. Chutah ngaihṭhat lohna tûr awma an hriat loh hnuah hmalam pan chuan an vâk phei ta ṭhem ṭhem hlawm a. An hotupain an chêt dan tûr a hrilh ngun bawk a, a tu a mah chu han hrilh nawn leh ngaiin an khawsa hek lo. An che zei êm êm hlawm vek mai a ni.

Tunah zet chuan an hmêlmate pawh chiang takin an hmu thei ta a, changel hnah chungah an lo mu tlar dûl hlawm mai! An mutui viau a ni ang, ṭhenkhat phei chu an hnâr ri bawrh bawrh hlawm a. Chuti tak maia an han inthlahdah mai chu mak an tiin, anmahni bei tûra an kîr leh chu an ring hauh lo a ni tih chu an hre chiang kher mai. Chu zawng an tân chuan duhthusâm a ni ve tlat bawk si. 

An hotupa mitmei thlîr chung zêlin an thal hruiah chuan thalfang an han vuah a, an thal ngul chu an kuai kûl pap hlawm a. Silai keng mi sawm zet pawhin hmêlmaho lo tho hmasa apiang chu, lo sai thal nghauh nghauh tumin an inring ve hle tawh a. Tunah chuan an hotupa thupêk nghâkin an ding ta ṭhap a. Darbuta chuan muangchângin a kut chu a han phar chho ta a.

Chu veleh boruakah chuan thalfang a lêng phei nghal fua fua a. Hmêlmaho chu an ṭê ta ṭhawt ṭhawt hlawm mai. An rin loh taka beih an tawh leh tâkah chuan an phili buai ta chiam mai a. Chutih nâk alai chuan an awmna ngawpui khâwk rum rum khawpin silai a rawn puak ri dur dur a, Zonuam pasalṭhate chu an thal phawk phawk mai le. Chutah meuh zawng Darṭhuama chuan a naute chu hmalam pana tlânchhe tûrin a au tuarh tuarh hlawm a. An hmalamah chuan an theih ang angin an tlânchhe kawi zawr zawr hlawm mai. Mahse, rei lo têah ṭanhmun siamin Zolur pasalṭhate awmna lamah chuan silai mu a ving phei ve ta thiak thiak a. Darbuta chuan a nauteho chu kûn tûrin a'n hrilh thuai a. Rang takin an hmêlmate chu an chhâng lêt ve nghal zat bawk a. A tu a mah inhmu tawn thei si lo chuan an inrâlsai ngat ngat a. Darbuta te lam chuan ngawpui chhûnga tawlh luh pahin an silai ken chu an kâp puak leh phauh phauh ṭhin a. Nakinah chuan silai kah phâk lohna hmun râlmuangah an insaseng ta daih mai a ni.

Darṭhuama chuan a naute mi sawm zet chu a chân leh ta reng mai. A thin a rim tûk tawh mai a, a hmêl chu ruahthimpui lo thawk tûr ang maiin a dur khuih khuih a, a mitmeng lah chu chawke ni rui an sawi ang maiin a sen rum rût tawh mai a ni. Thinrim vânga aw sehchilh deuh nâk chung hian, "Tunah arang thei ang berin Zolur khaw lam panin kan kal nghal ang. Chumi hmâ chuan kan ṭhiante ruang hi kan senghâwi vel phawt dâwn nia," a han ti bung deuh nghut a. Tichuan, an ṭhiante ruang chu an senghâwi sawk sawk a, hliam an awm nual nâin ngaihtuahawm lutuk erawh an awm lo thung a ni. An inpeih fel hnu chuan an ṭhiante awmna lam panin an chhuak zui nghal a, Zolur khua chu an pan vang vang tawh mai dâwn a ni.

Khua a lo vâr ṭan tihin Darbuta chuan Challura leh tlangvâl pakhat chu, an hmêlmate va thlithlai tûrin a tîr a. Challura leh a ṭhianpa pawh chu an chhuak zui nghal thuai a. 

Hetih lai hian Darṭhuamate chuan Zolur khaw dai chu an lo thleng fel hman reng tawh a. Khua a vâr ṭan riai ruai tawh tihah chuan an che chhuak ta sang sang a. An thin a rim tlângin an ṭhiante phuba chu lâksak ngei an tum bawk si avângin hlauh an nei lo kher mai. 

Khua an luh dâwn chuan Darṭhuama leh pasalṭha rualkhat hian hmà an hruai fâl a. An rin ang ngeiin râlvèn bûkah chuan râlvêng an lo awm ngei mai a, an ṭhahnem phian leh nghal. Darṭhuama chu a han inngaihtuah vang vang a, râlvèn bûk a mite hi an beih hmasak si chuan khawchhûng lam an lo inrâlring hman vek tawh a ni âwm si. Chutihrualin râlvêngte chu an paltlang angai bawk si a, thu tlûkna siam harsa a ti ang reng kher mai. A tawpah zawng râlvêngte chu beih hmasak mai a rawt thlu ta nge nge a. 

Challura te chuan an hmêlmate hmêl rêng rêng hmuhtûr a awm ta hauh lo mai chu mak an tiin angaihna tak pawh an hre lo hle mai a, 'Khawi lamah nge maw an chhuak tâk le?' Challura chuan a ti rilru vêl mai mai a. Chutah an han vâk kual zung zung a, Darṭhuama teho kalna hnuhma ni âwm tak chu an hmu a. An hmêlmate chu an insaseng ta ni maiin a hria a. Eng pawh ni se, pasalṭha Darbuta hnenah thil awmzia thlen vat chu angai hrim hrim dâwn a ni. Hmêlmaho chuan bumna thang an kam pawh a ni zâwk maithei si a.

Darbuta chuan Challura thusawi chu a lo ngaithla kar mai a, Challura chuan, "Kan hmêlmate chu an insaseng tawh a nih ka ring, tumah hmuhtûr an lo awm tawh hauh lo mai. Mihring an inhloh hnem êm a, min bei zui zêl ngam lo a nih ka ring e," a ti charh charh a. Darbuta erawh chu engmah sawi lovin a maimitchhîng vang vang thung a. Thâwklehkhatah a rawn meng chhuak kâwk a, a nauteho hnenah chuan, "Insiam thuai thuai rawh u, kan la tlaichhe lutuk lovang chu maw!" a'n tichhuak hlut a. A nauteho chuan angaihna an hre lo tlâng kher mai. 

Challura chuan, "Ka pa Dar, eng nge thil awmzia ni ngai?" tiin angaihna hriat loh hmêl tak chungin a han zâwt a. Darbuta chuan, "Kan hmêlmate hian khua an pan a ni ngat mai, kan ṭhiante pui tûra kan thawh chhuah vat angai a ni," tiin a han chhâng thuai thuai a. Chutah zawng thil awmzia chu inzawh belh leh kher ngai lovin an hre chiang ta uarh hlawm a. Rang takin an insiam zung zung a, Darbuta chuan hmâ hruaiin an khaw lam pan chuan an kal ta hlawk hlawk a.

Darṭhuamate chuan râlvèn bûk lam chu thâwm dim takin an pan phei ṭhem ṭhem hlawm a; mahse, Zolur pasalṭhate chu an lo fimkhur ngang mai hi a ni a. Chutia an lam pana mi eng emaw zât rawn vâk phei ṭhem ṭhem chu hmuin an ṭê ta hlut mai a. Chu veleh Darṭhuama te lam chuan an chîm phei thut a, silai chu a puak ta zawih zawih mai le. Râlvênga awmte chu mi sawm vêl lai an ni a, mahse, anmahni aia a lêt eng emaw zâta tam Darṭhuama te chuan awlsam takin an chimih ta barh hlawm a. Rang takin khawchhûng lam pan chuan an tlân chho nghal zung zung a. 

Chutia râlvèn bûk lama silai a rîk tâkah chuan khawchhung lam chu an lo râlkhel hman hle tawh a. Nunauho chu hmanhmawh takin lal mual lamah an tlân chho zung zung hlawm a. Pasalṭhate chuan kawtchhuah lam chu an pan nghal zung zung a. Mahse, thui pawh an tlân hmain râlho nen chuan an intawhchilh zui chu a ni ta mai a. Khawlaiah chuan an insai ṭhuai ṭhuai a, feiin an inkhawh a, chempuiin an insat chawrh chawrh hlawm a. A ruhno deuh chin chu khawlaiah chuan an tlu nghal phawk phawk mai le. 

Tunah rih chuan a rûntute lam chan chu a ṭha deuh zâwk niin alang. Zolur pasalṭhate chu che chhuak rang hle mah se an inring fumfê hman meuh si lo. Ralho lah chuan an hmuh hmuh chu an sai thlu tawp tawp a ni si a. Nu ṭhenkhat chu tlânna tûr lam ber pawh hre lovin kawtkaiah an vei kual sek a, a ṭhen an ṭap a, a ṭhen an âu, an chiau chèl chûl mai a. Nu ṭhenkhat chuan thâwm dîm takin an fate mutui lai chu an han kai tho va. Mei chhêm ngam a ni tawh bawk si lo, hmanhmawh tak chungin, "Tho r'u, tho r'u! Râl râl!" an ti a. Hmanhmawh takin pâwnah an tlân chhuak a. Anmahni ang bawka tlânchhe ve tho te nen chuan an insùlpel zut zut a. Râlho chu hmun tinah an lo inzâr pharh hman tawh si, tlânchhiatna tûr vak hre chuang hek lo, lal mual lam pan chuan 'a hnuhnung hnung phungin seh' tih ang hrimin an tlânchhe chho dum dum mai a ni. 

Râlho chuan in chu an han hâl zui a, ṭhelhtu awm hek lo le, in kâng chu a inman kai a, a alh ta hluah hluah hlawm a. Tar chakvak lo leh leh insaseng thei tawh si lo te chu a hâl hnan a ni ta hrim mai a. Chuti taka râlho an han nunrâwng ta mai chuan Zolur pasalṭhate thin a tirim zual sauh thung a, huaisen takin an hmêlmate chu an bei lêt leh ta a. Tual leh râl an inhmu chiang thei ta bawk a, Zolur pasalṭhate pawhin mahni buzâwla tlawm chu an tum lo chiang kher mai. Mahse, eng ang pawhin huaisen teh mah se; an hmêlmate chu an tam tham êm a, an chelh zo kher lovang le. Zolur tlangvalte chuan pasalṭha Darbuta chu an ngai vawng vawng hlawm mai.

Darbuta te pawhin khua chu an hnaih hle tawh a, an khaw chung zâwna meikhu zâm chho nguan nguan mai an han hmuh chuan thil awmzia chu an hre chiang hlawm kher mai. Râlho chuan khua an hâl a ni tih chu inzawh leh chuan kher an mamawh tawh lo. Hmanhmawh lutukin an tlân chho buan buan a, râlvèn bûka an ṭhiante ruang lo thal pheng phung an han hmuh meuh chuan Darbuta meuh pawh thinrimin a insehruh ṭeuh mai a ni.

Khua an han lût chho va, in tam tak chu a lo kâng sen zuai zuai tawh a. Khawlaiah chuan ran leh mihring ruang a let kawkalh nelh nulh mai. Darbuta chuan a nauteho chu chêt dan tûr hrilh zung zungin, ṭhenkhat chu lal in lam pana tlân chho tûrin a tîr zui nghal a. Mi dang zawng chuan râlho chu an hmunglam aṭangin an bei ve thung dâwn a ni. Tun ṭum chu nungdamin tumah chhuah an tum lo chiang kher mai. 

Darṭhuama chuan a nauteho chu fuihin a kal kual reng a, "Tumah hnungtawlh loh tûr, a hnungtawlh tawlh chu keiman ka kâp ang che u! Kan hneh ṭêp tawh ania," tiin a au lung lung a.  Hnehna chu chang tawh mai dâwna inhriain a hlim ru surh surh khawp mai. 

Zolur pasalṭhate chu an hnungtawlh hret hret zêl a, rei an ṭang thei kher ang em? Nungdama hmêlma kuta inpêk chu an tum hauh lo mai. Mahse, an chan a chau tial tial chu a ni si a. Chutia an beidawn rilrûk lai tak chuan an beisei rûk reng; an beisei ngam chiah si loh pasalṭha Darbuta leh a hote chu an rawn lang ta phut mai le. Darbuta ngei mai chuan ring lêng lâwng hian, "Zolur pasalṭhate u, lo zam rêng rêng suh u. Kha, keimah Darbuta ka ni ngai e," tiin a rawn au ta lung lung a. Chutah meuh zawng Zolur pasalṭhate chuan beiseina thar an nei chho leh ta a. Huaisen takin hmêlmaho chu an nawr phei ṭan nghal a. Thih châk ang ziazângin a hmatâwngah chuan an inhawr khawm mup mup mai a ni!

Chutia a beisei aia hmaa Darbuta teho an rawn lang leh ta mai si chuan, Darṭhuama thin chu a tirim kher mai. Hnehna chang tawh ngei dâwna a lo inhriat hman tawh vei nen chuan; a beisei loh dân takin thil chu a inher danglam leh ta zâwk si a. A nauteho lah chu an zâm ṭan deuh nge ni, an hnungtawlh ṭan ta tlat mai le. Zolur pasalṭhate lah chuan hnunglam leh hmalam aṭangin an rawn bei chu a ni si a. An hotupa chu hlau viau mah se thih an la hreh ve êm êm bawk si a, an nun humhim nân chuan an tlânchhe ta duai duai mai a ni.

Darṭhuama chuan a nauteho chu a han au tuarh tuarh a, mahse, tumahin an bengkhawn tawh si lo. Pasalṭha pakhat hian Darṭhuama hnenah chuan, "Tlânchhe mai rawh, kan chelh hneh ngang lo a ni e," tiin a rawn au va. Darṭhuama chuan, "Râl hmâa tlânchhe tûrin ka nuin min hring lo ve! Kha, keimah Darṭhuama, Lal Vankunga pasalṭha ka ni ngai e. A ngam ngam chu ka hmâah lo ding rawh u," tia au pahin an hmêlmate chu a tâwn phei buam buan mai a. Chu veleh Darbuta pawh chuan, "Kha, keimah Darbuta, Lalvunga pasalṭha ka ni ngai e, lo inring rawh u!" tih pahin hmalam pan chuan a rawn thawkchhuak ve nghal a. 

Khaw hnih pasalṭha chhuanvawr ve ve te chu an indinchilh ta rân mai le. An hmêl han en rêng rêng pawhin tlânchhiat lam chu an ngaihtuah lo tih hi a hriat ngawih ngawih mai a. An naute ve ve hmuhah chuan a tlawm zâwka ṭan tum lo tih hriat tak maiin chempui nen chuan an inveh dun ta theuh theuh mai le.

Darṭhuama chu a palian zawk viau mai a; mahse, a hmâa ding chu pa naran mai mai a ni bik hauh si lo. Thahrui a nei tâwk ang tih hriat takin a taksa chu a sek phiar fuat a! Han namnul mai mai chi zawng a ni bik hauh lovang le. 

Darṭhuama chuan a chempui ken chu a han vai fua fua a, Darbuta pawh chu a hnungtawlh rawk rawk mai a ni. A nauteho phei chu an lo hlauthâwng hman hle mai a, kut an lo hûm ruh ṭeuh hlawm mai. Darbuta chuan a hmêlmapa chem rawn vai chu hnungtawlh pahin a han bum zauh va, chutah a sîr lama persawn dâwrh pahin a chempui hriam tak chu a han vai chhuak nghal fua a. Darṭhuama bánpuamah tak chuan a sât kak ta duai mai le. Darṭhuama meuh pawh a ṭê chhuak ṭhawt mai a, a bán hliam aṭang chuan thisen a rawn chhuak pur pur a, chu chu a diar khim lai chuan a han tuam sawk sawk a. A hma zawng aia thinrim zâwkin a hmêlmapa chu a bei zui leh nghal zat a. A thinrimna chuan rilru fim a puttîr hleithei tawh lo a ni ber ang chu, chêtsual palh a hlauhawm tih hre reng chungin a chem chu a vai buan buan ringawt a. A beihpuipa lah chuan thiam tak leh rang tak tak maiin a chem rawn vai chhuah chu a lo bum ziai ziai mai si! 

Nakinah zawng Darṭhuama chu a chesual ta nge nge a. A chêt buan buanna lamah a ke chu chhep sualin hmalam zâwng chuan a petek dâwrh a, chutia an chêtsual lai tak chuan Darbuta chuan a nghâwngah tak a rawn sah sak ta siah mai le. Darṭhuama lu chu a thlep nghal hnawk a, leiah chuan tlu zui nghalin a taksa chu a khûr chur chur a. Thisenin a rawn bual chhuak nghal vek bawk a. Rei vak lo hnuah chuan a chatthla ta nge nge a. Chutia an hotupa ber a thih tâkah si chuan mi dangte chu an tlânchhe ta chiam hlawm a. Zolur pasalṭhate chuan ûm zui nghalin, an thah theih theih chu an that a, ṭhenkhat erawh chu ramhnuai lamah chuan an relhru bo thei hrâm a. Tam tak erawh chuan khaw êng an hmu leh tawh ngai dâwn lo a ni. 

Indona chuan sûlhnu a va hnutchhiah nasa tak êm! Khawlaiah chuan ruang tam tak a let pheng phung a, in lah chu a kâng fai deuh ṭhak a ni si.  Vanneihthlâk takin an lal in leh Zawlbûk chu a kâng ve lo hlauh mai a, chutah chuan nunauho chu an awmtîr a. An vaia len vek thu awm hek suh, khawlaiah te chuan an awmkhâwm tel tel hlawm mai. Ruang senghâwi tûr a tam si, in kâng lah chu a la mût khu vung vung bawk a, lung a zing duh ngei mai. 

Lal leh upaten ro an han rêl a, ruang zawng zawng chu tlâk lamah an vuiliam ta vek a. Hliam tuarte erawh chu an theih ang angin an enkawl thung a. Nu leh pa lamin a awm ang ang zawng khâwmin eitur an buatsaih a, tlangval hovin khawchhûng chu an theih ang angin an thianfai bawk a, tumah âwl bik pawh awm lovin a thawk thei tawh phawt chu mawngvawm ba an sawi ang maiin an phe mur mur hlawm mai a ni.

Darbuta chuan tlangvâl sawmnga rual zet chu râlvèn bûk lamah a tîr liam leh nghal a. An hmêlmate lam hi an tam tham si a, hrui kual rah beh an sawi ang maiin an rawn er lêt leh vatin a ring rilru deuh a ni. Tunah hrih chuan hnehna chu an chang ngei mai a; mahse, an hmêlmate hian an rawn bei leh a nih vaih chuan, ṭang tûr an awm tawh kher lovang le. 

Hetih lai hian Keisata te lam ve thung erawh chu, an mi chânte an rawn lan theih tâk si lovah chuan angaihna hre lo tak chungin a chhan an lo inzâwt ve sap sap hlawm a. Keisata chuan an ṭhiante va fin mai chu a han rawt a; mahse, Laiveta chuan a lo hnial tlat si. Keisata pawh a lung a âwi lo rilru viau nghe nghe a ni. Râl rûn tûra chhuak ve lêm siin chuti lai hmuna râl lo sakuh ser nghah ngawt ngawt mai chu a ngaihdan a ni vak lo a ni. An hmêlmate berin rawn lan tih ni rêng an neih tâk si lovah chuan, Laiveta chuan khawlam pana kîr leh mai chu a rawt ta nge nge a. Mi dangte pawh chuan chulai hmuna lo êk cheh ṭhut tlawk tlawk reng mai chu an lo ning ru hman tawh hle mai a, Laiveta rawtna chu i he lovin an lo remti hmiah mai a ni.

Keisata erawh chuan, "Kan ṭhiante kan lo kalsan mai zawngin a dik dâwn em ni? Kan lo nghâk hram hram lovang maw?" a han ti a. Laiveta chuan, "Hmêlmaho chu kawng dang aṭangin an lo kal nge kal lo tih pawh kan hre hleinem. Heti laia kan lo ṭhut reng lai hian khua an lo rûn hman reng maithei asin. Pasalṭha Darṭhuama leh a hote mi khati zah kha an thawkchhuak a ni a, ngaihṭhat lohna tûr awmin ka hre lo ve. A duh chuan lo nghâk ula, kei zawng heti laia ṭhut reng hi ka thiam zâwng a ni ve lo ve," a ti a, khawlam pan chuan a kîr ta nal nal a. Chutah zawng tlangvalho pawhin an zui ve ta dual a. Keisata leh mi tlêmtê erawh chu kîr ve duh lovin an ṭhiante chu lo nghah an tum a ni. 

Zanriah chhun hun vêl lai a ni tawh âwm e. An awmna lam pan chuan tute emaw hi an rawn inzui phei thliai thliai a. An awmna lai hi a thim deuh ruih tawh avângin hmuh chian erawh an la har viau mai. Kha chen râl lo lan hun nghâk an nih bawk si avangin an ngaihtuahnaah chuan 'râl' tih bâk a awm meuh si lo. Keisata chuan a naute chu, "Inring rawh u," tiin  a han hrilhru sar sar hlawm a. Mahse, an mi chânten an awmna zâwn an lo thlen chuan râl ni lovin an ṭhiante zâwk an ni tih an hre thei ta a. An lo kâp hman lo chu tifuh an inti hle mai. Mahni ṭhiante an lo râl palh ṭêp chu a ni si a. 

Keisata chu a birûkna hmun aṭanga thawhchhuah pahin, "E khai! Engtizia nge ni?" a han tichhuak hluai a. Chûngho chu an ding chawt a, a tîr chuan râl emaw tiin an han hlau hman viau a, mahse, an ṭhiante tho an ni tih an hriat hnu erawh chuan an ngaih a ngam leh huai mai. Pasalṭha pakhat chuan, "Kan hmêlmate chuan min chimih lo chauh zawng a ni e. Kan hotupa pawh kan chân nghe nghe asin," tiin an inbeih dan zawng zawng chu a han sawi dap dap a. 

Keisata chuan, "Chu, in hotupa chu in rawn tlânchhiatsan tihna a ni maw? Mahni ṭhiante pawh chhan ngam lo chu pawnfên fêng tlâk lek in nih chu le! Ṭhiante nen chuan 'Dam leh tlang khatah, thih leh ruam khatah' kan ti ṭhin a ni lo'm ni? Zahpuiawm lutuk mai," tiin a ânkhum ta hrep hlawm a. Tumahin an chhâng lêt ngam lo. 

Keisata bawk chuan, "Aw le, tikhán va haw ta ula, kei zawngin pasalṭha Darṭhuama ruang tal ka va hlâwm loh zawngin kan mualphona khua a sei lutuk ang e," a ti a. Zolur khaw lam pan chuan a hote nen an chhuak zui ta nghal a. 

Lal Vankunga chu a thin a rim takzet a ni. A tum leh beisei angin thil a kal leh ta si lova, chu a chhapah a pasalṭha chhuanvawr ber a chân leh ta bawk si nen, a thinrim chu a âng hmuar hmuar reng mai, "Keini khaw li lai ṭangrualin khaw khat lek pawh ka'n hneh lo chu a nia, a zahin a zahthlâk lutuk ringawt mai. Hetiangte chuan khaw dang pawhin min zuam lutuk ang asin. A rang arangin kan thawkchhuak leh tûr a ni ang," tiin a âng tun tun a. Mahse, a khawnbawl upate chuan ṭhenawmte do rêng rênga hmanhlel mai chu ṭha an lo ti ta hauh lo mai a. Buh lu chuh a hun chho tawh dâwn bawk si a, an lalpa hnenah chuan, "Lalpa, tun dinhmunah chuan a chak lo zâwkah kan ṭang a ni tih hi kan pawm thiam angai a ni. Indo rêng rêngin kan hun kan hmang a ni a, pasalṭha leh tlangvâl tam tak kan chân tawh bawk nen, hun remchâng ṭha zâwk kan ngaihchân angai tawh e. Kan tlangvâlte an chau zo tain, nunau an rethei lutuk dâwn e.

"Hetia leido nei reng renga kan khawsak zawngin ṭam chauh lo chu hmabâk kan nei lo ve. Mahni hna pawh thawk hman lovin i khaw mipuite hi i siam dâwn em ni ang? Hetiang a nih chuan min pêm zawhsan vek lovang tih pawh kan hre hleinem. Indo reng hi an ning tawh asin," tiin an lalpa thiltum chu an hnial ta tlat mai le! Tun ṭum chu khawnbawl upate an inthurual viau mai a, Zolur khua nena indo chu an duh tawh lo a ni ber mai e. Mihring an inhloh hnem tawh êm a, a chan chhe zâwkah an la ṭang reng bawk si nen, tun dinhmunah chuan leido neih reng chu an tlin tawh lo a ni. Chu lo rêngah pawh tunah hian khawchhak râl an lo hrâng leh ṭan mêk tawh a, hetia an Lusei puite do va an hmanhlel reng zawngin an beisei loh lam aṭangin râlin an rawn rûn thut maithei si a. Chuvangchuan, Zolur khua nena an indona chu tihtâwp an duh tawh a ni.

Lal Vankunga erawh a upate thusawi chuan a barakhaih hle mai. A khawnbawl upate hian an hnial ngam,zen zen lo kha a ni si a, tun ṭum zet erawh chu a thu an hnial ve tlat mai. Chu chuan a thin a tirim takzet a ni. A khawnbawl upate chu a han melh kual dun dun a, chutah aw ngaihno bei lo zet hian, "Nangni hian ka thu in hnial ang maw? Ka kawng dalin in inthurual vei maw? Mi dawihzep awmkhâwm hlîr em ni in lo nih le? Kei Lal Vankunga hian kan hmêlmate lakah tlâwm thu ka sawi ang maw? Hnai lo ve, ka thâwk theih ṭek ṭek chhûng hi chuan Zolur khua saw ka do chhunzawm zêl dâwn a ni. Min thurualpui thei lo a nih zawngin, in thurualpui theih tûr lal dang in belh mai angai ang," a ti bung ta nghut mai le.

Khawnbawl upa Hrangliana chuan, "Lalpa, i thu chu han ngaihtuah nawn leh hram teh khai. Hei leh chen hi rinawm takin i kaihza kan lo vêng tawh ṭhin a, i thu ni se kan hnial ngai hek lo. Mahse, tun ṭum chu kan ngaihdan hi sawhsawn kan tum bik lo ve. Leido nei renga kan khawsa a nih zawngin kan nupui fanaute hian eng nge an ei ang a, lungmuangin kan khawsa thei dâwn em ni?" a rawn ti leh khauh mai a. Mi dang pawh chuan upa Hrangliana thusawi chu an  thlâwp a ni tih lantîr nân an lû chu an lo bu nghat nghat hlawm a. Lal Vankunga thinrim chuan na taka han chhân lêt hi a tum a; mahse, chutih lai tak chuan Bukpui khaw lam aṭangin tlangvâl pahnih hi an rawn lût hlawl mai le. Chûng tlangvâlte chuan hah vanga thaw hlawp hlawp chung hian, "Lalpa, i fapa Lalkhuma chuan thu hmanhmawh thlâk tak kengin min rawn tîr a ni e. Tunah hian Ṭiau ral Pâwiho chuan kan khua rûn tumin min rawn pan mêk a, i fapa chuan i ṭanpuina a rawn dîl a ni e," tiin an rawn kal chhan chu an han sawi nghal zung zung a. Lal in chhûng chu thehmeh ang maiin a reh nghal ṭhiap mai.

Lal Vankunga chu a inngaihtuah vung vung a, tun dinhmunah chuan Zolur khua chu bei chhunzawm thei a ni ta lo. A rang thei ang bera a fapa pui tûra thawhchhuah chu a tih hmasak angai tlat si a. Kil khata ngawi renga lo ding zum zul mai Tlangaupa chu melh zuk pahin, "Tlangaupa, ka pasalṭhate han khawm zung zung la, Bukpui khaw lam pan tûrin insiam nghal rawh se," a han ti ban churh a. Tlangaupa pawh chu a chhuak ve nghal a. Khawnbawl upa ṭhenkhat pawhin lal in chu an chhuahsan ve sap sap hlawm a. An lalpa rilru chu an hre chiang viau tawhin a lakah chuan an vui rilru viau nghe nghe a ni.

Zonuam pasalṭhate chu an han inkhâwm zung zung a. Bukpui khaw tlangvâl eng emaw zât nen, Lalkhuma unaute khua aṭanga tlangval rawn thawkchhuak ṭhahnem tak an awm bawk a. Lal Vankunga chuan thil awmzia te chu han sawi zung zungin, arang thei ang bera Bukpui khaw lam pan nghal tûrin a ti ta nghal a. Bukpui pasalṭha Keisata te lah chu Zolur khaw lamah an la thang daih bawk si a, an rilru a buai hman viau mai. Tlangvâl awm ang ang chu an inkhawrh chhuak vek a, Laiveta chuan hmâ hruaiin Bukpui khaw lam pan chuan a zan a zanin an chhuak ta a ni. 

Keisata te pawhin Zolur khawdai chu an thleng ve hlawl mai a. Vaibel te zuin an han ṭhu hahdam vang vang a, chumi hnuah muangchângin an kal leh ta hnak hnak a. Khaw luh dâwnah chuan râlvèn bûk hi a lo awm a, tlangvâl ṭhahnem tak hi an lo awm nghe nghe a. Keisata chuan zâmna nei map lo hian râlvêngho awmna lam chu a pan phei zêl a. Râlvèn bûka awmte pawhin an lo hmu ve thuai a, rang takin an rawn tlânchhuak a. Keisata te kalna tûrah tak chuan an ding khâwm hmuk mai le. 

Râlvêng zinga an hotupa Thangliana chuan, "Tute nge in nih a, eng nge in duh?" tiin aw ṭeng chhuai hian a lo zâwt bul nghut a. Keisata chuan, Bukpui pasalṭhate Keisata ka ni e. Pasalṭha Darṭhuama ruang hlâwm tûrin kan lo kal a ni," tiin ṭha tak chuan a han chhâng a. 

Thangliana bawk chuan, "Bukpui khua in nih chuan râl zuk ni reng che u a! Thih in duh loh chuan lêt leh rang rawh u," bung nghut hian a han ti a. Mahse, Keisata chuan chuti maia lêt leh chu a tum bik awzâwng lo mai. Aw ki hniam raih hian, "Tunah chuan indona chu a tâwp tawh a, kan ṭhiante ruang hlâwm thei lo mah ila, pasalṭha Darṭhuama ruang tal chu min hlâwmtîr hrâm rawh u. Thil dang engmah kan duh lo ve. Helai hmunah hian buaina siam tuma lo kal lah kan ni hek lo," a han ti a. Zolur pasalṭhate chu an han inrâwn khâwm a. Nakinah chuan Thangliana bawk chuan, "In awmna ngaiah khán lo awm reng ula min lo nghâk lawk rawh u," tiin a rawn au va. 

Thangliana chuan tlangval pakhat chu tîrin Darbuta hnena chanchin han thlen tûrin a ti a. Tuibur hmuamda chen vêl zet hnuah chuan Darbuta leh mi ṭhenkhat hi an rawn lang ta nge nge a. Ruang ni âwm tak hi an rawn zâwn thla nghe nghe a. Thangliana chuan a lo chiau-au vat a. Darbuta hnenah chuan thil awmzia chu a han sawi zung zung a. 

Darbuta chuan Keisata te hnenah chuan, "In pasalṭha ruang chu in hlâwm thei ang. Tun hnuah chuan min rawn zuam lutuk tawh suh ang che u," tiin a han au va. Keisata chuan engtin mah a chhâng lêt lo va, a hmêlah erawh chuan zâmna reng reng hmuh tûr a awm hauh thung si lo. A naite hnenah chuan eng emaw hi a han sawi sup a. Tlangvâl panga zet tûr hian Darṭhuama ruang chu an va la a. Mahse, Darbuta chuan, "Kan hmêlma ni mah ula, in pasalṭha ruang hi kan khaw ram chin thleng chu kan zâwnsak ang che u," a ti khauh mai a. Bukpui tlangvalte chuan mak an ti kher mai. Sawitur hre lovin an hotupa lam chu an hawi ṭhap a. Keisata pawh chuan mak a ti rilru ve deuh hle mai a, chutihrualin pasalṭha Darbuta thusawi chu zahawm a ti ru riau bawk si a. Hnial vhi nia a hriat loh avângin Darbuta thusawi chu a remtihpui ve ta nge nge a. 

Zolur tlangvâlte chuan Darṭhuama ruang chu an khaw ram chin thleng an zâwksak a, kawng lakah chuan an inbe tam lo hlawm kher mai. A rûk tak chuan an boruak chu a ṭang ru viau mai a ni. Mahse, eng êm ti lovin an khaw ram chinah chuan ṭha takin an inṭhen ta nge nge a. Zolur tlangvalte pawh an khaw lam panin an kîr leh nal nal hlawm a. Keisata te pawhin Zonuam khua chu an pan zui ve nghal a. An hmêlmate chêt dan chu mak an tiin an sawi zui nak nak nghe nghe a ni.

Keisata ten khua an luh meuh chuan chawhnu lam a ni dêr tawh a. Darṭhuama ruang chu an in lam an panpui nghal a. Khua chu a reh ruih a, in tam takah chuan lusûn ṭap thâwm hriat tûr a awm nûk hlawm a. Keisata rilru chu a vâk thui ngei mai. Indo ṭhat loh zia a han ngaihtuah a, a tuartu chu pawisawi lo nunau leh naupangte bawk an ni leh ṭhin si a. Pasalṭha leh tlangvâl tam takin hun lo takah mual an liam leh ṭhin si a...

Darṭhuama ruang chuan an chênna in chu a thleng ta nge nge a. Darṭhuama nupui leh a fate chuan an pa ruang chu mittui nen an lo hmuak a, an ṭap vawng vawng mai a ni. Pasalṭhate nunah hian zawng an nupui fanaute takngial pawhin hmun an chang lo chu a ni si a maw! Darṭhuama nu phei chuan a fapa thihna chu a tuar thiam lo leh zual a, khui lovin a ṭap a ṭap mai a ni. 

Keisata te chu rei pawh awm lovin lal in lam panin an chhuak leh ta thuai a. Lal in an han thleng chu le, an beisei loh takin chanchin lâwmawm loh tak mai chuan a lo nghâk reng tawh a. Lal Vankunga chuan thil awmzia chu lo hrilh zung zung a. Keisata te tân chuan muangchânna chi a ni tawh mawlh lo. A rang a rangin an khaw lam pan chuan an chhuak leh ta nghal nal nal mai a ni.