PASALṬHATE KHAWVÊL -2

BUNG HNIHNA

'Hmelma dorâl hrâng kârah,

Zam ngai lo Chhuihthangvala;

Hnam lenin sakhming chhâl e.'

Khatia Darṭhuama ten Zolur khaw mi leh sa an thah a, a lû hial an lâk tâkah kha chuan, Zolur pasalṭhate pawhin awm mai mai an tum bik awzâwng lo va. An lalpa remtihnain  chêtchhuah zâi an rêl ve ta a ni. 

Pasalṭha Chalkhenga hovin tlangvâl sawm rual zet mai chu rawlrâla che tûrin Zonuam khaw lam pan chuan an chhuak ve ta nge nge a. An zîngah hian Challura pawh a tel ve nghe nghe a. Râl beihnaa a tel vawikhatna tûr mah ni se, hlauhna emaw, huphurhna emaw a nei hauh lo mai. A pa khán thil tam tak a lo zirtîrin a lo hrilh hman tawh a, hei hi Challura tân pawh a ṭangkai tak zet reng a ni. 

Zonuam khaw ram chhûng hmun biru lai takah chuan awmhmun an khuar a. Hmelma rama awm an ni tih an inhre chiang êm êm a, an fimkhurin an inthup thiam ngei mai. Tihpalh thilthu te a nih ngawt loh chuan an awmna hmun hi hmuhchhuah mai mai chi pawh niin a lang lo!

Chalkhenga chuan a nauteho hnenah chuan, "Hmêlmate ram chhûngah kan awm tih hi hre reng ula, inthlahdah ngai suh ang che u. Rawlrâlin kan che dâwn a ni a; amaherawhchu, dawihzep leh pawisak nei lo taka chêt erawh ka remti hauh lo ania. Hmeichhia leh naupang bâkah tar chak lo zâwkte chungah tumahin hriam kan lek tûr a ni lovang. Mipa takin kan chê ang a, kan hlau bik lo a ni tih hi kan hriattîr tûr a ni ang," a ti a. Pasalṭha rilru hi zawng a fîm hle reng mai, nunau pawisawi lo te chunga kut thlâk hi an duh ngai lo reng a ni. 

Chalkhengateho hian silai aiah thal leh chempui an thawh chhuahpui zâwk a ni a. Silai chu nei ve tho mah se, han ken chhuah tham tak tak an neih loh bâkah a thâwm a ring lutuk dâwn si a, buaithlâk mai maiin an ring a, an keng duh ta lo a ni. Chu bâkah, Chalkhenga hian a nauteho hi eng ang chiaha huaisen nge an nih tih fiah a duh ve reng reng a, hei vang hian silai ken a remti hauh lo mai. Indona hmunah chuan râlthuam ai mahin thinlung huaisenna leh râl rel thiamna hi a pawimawh zâwk fo ṭhin reng a, râlthuam hi chu a hmangtu a zir a ni lek chauh si a.

Thim hlim aṭangin an che chhuak ṭan a. Thâwm dim leh fîmkhur takin Zonuam khaw lam pan chuan an chhuak ta sang sang mai le. Zolur khaw tlangvâlte hian an hotupa Chalkhenga mit tlung taka chêt chu an tum ber a ni. Pasalṭha an ni takzet em? tih fiahna hun pawimawh tak a ni si. Chêtsual zawng an tum lo hlawm kher mai.

Zonuam khua zawng an râlmuang tâwk hlë tih hriat takin râlvêng pawh an lo indah hauh lo mai. Ni e, Pâwi râl takngial pawhin an beih ngam loh khua chu Lusei lalte zingah a tu hian nge maw rawn luhchilh ngam rêng rêng ang ni? An hmêlmate chuan an ram chhûng rawn lûtin, an buzawlah ngei chuan an rawn luhchilh ngam ang tih chu an ring phâk hauh si lo. An chhehvêl khuaah hian hlauh tûr awmin an hre lo va, anmahni rawn bei ngam tûr khawpa lal huaisen leh chak an awm lah an hre hek lo. Zolur khaw pasalṭhate chuan an rawn bei ngam tak takin an ring lo va, tunhma aṭang daih tawha an chhiah khua a lo nih tawh vang pawh a ni mahna, eng han tingam tûrah an ngai lo hrim hrim a ni. Chuvangchuan, Zonuam khaw pasalṭhate chuan an lal inah zû an chhim a, Zolur khaw rûn dân tûr sawiin an nui dar dar hlawm a. Tlangvâlte lahin thlamuang takin nulâ an rîm a, an hmêlmate chuan thah tumin an veh mêk a ni tih rêng an hre si lo.

Vêng hmawrfêma in lo ding te chu kal pelin, Mual vêng lam chu an pan chho ṭhem ṭhem a. Mual vêng an thlen chhoh chuan fâl deuh taka in lo ding hi an hmu fuh hlauh mai a. Chu in chu mi ṭha in tih hriat takin tukverh leh Kawmchâr kawngkate a nei bik a, mathei lovin chu in neitupa chu Thangchhuahpa a ni tih a entîr. In tam zâwk chuan tukverh an nei ngai lo, mahni duhthu ngawta siam theih lah a ni hek lo. Thangchhuahpa, khuangchawi tawh te chauhin an tithei a ni.

Chalkhenga chuan a nauteho hnenah chuan, "Saw in saw kan bei dâwn nia. Ka sawi tawh ang khán hmeichhia leh naupang, tar chak lo te chungah tumahin hriam lek suh ang che u," a han ti sap a. Tichuan, fîmkhur takin an hmaa in ding chu an pan phei ṭhem ṭhem a. Inhnuaiah chuan an tawm ta rân mai le. In chhunga mite tîti chu an lo ngaithla ve kar a, a lan danah in neitupa chu a lêng chhuak ni âwm tak a ni. Chalkhenga chuan tifuh dâwn hlëin a inhria a, in neitupa lo haw hun chu an châng ta reng a.

Zân pawh a rei tial tial a, rannung hrâm ri neuh neuh mai lo chu thâwm dang hriat tur pawh a awm meuh lo. Tlangvâl nula rîm ṭhenkhat chu Zawlbûk lam panin an haw sang sang tawh a, mi tam zâwk chuan mutmu an tuah ṭan mêk a ni. In chhûnga mite pawh chu an thâwm a reh diak tawh a, in neitunu pawhin mut zâi a rêl ve ta a ni ngei ang le. Chalkhenga te erawh chuan dawhthei takin in neitupa lo haw hun chu an lo nghâk ve ngar ngar thung a. Pasalṭha nunah hian dawhtheihna leh insumtheihna hi a pawimawh fo ṭhin a ni.

Nakinah chuan le, in neitupa zu chhim haw ni âwm tak chu a rawn haw ve ta ṭuang tuang a. Chalkhenga chuan Challura chu a han bekbawr sur sur a. Challura chu a bu nghauh va, a tawmna hmun aṭang chuan muangchângin a tawlh chhuak ta zal zal a. 

In neitupa chuan kaiṭen a rap hman chiah tihah chuan, Challura chuan a hnunglam aṭangin a chhîpsamah chuan a man lawk a, lei chârah chuan a theh thlu nghal ṭhuai a. Zan reh tawh hnu lamah chuan thawm pawh a ring duh fu mai. Challura chuan a beihpuipa chu a thaw hrâwk a, au chhuah tum ni âwm takin a kâ chu a han ang zuai a; mahse Challura chempui hriam tak mai chuan a nghâwngah tak a rawn ât ta hlawih mai le! Chupa chu a tal chawr chawr a, a khur ngut ngut a, a nghâwng aṭang chuan thisen a rawn chik chhuak nghal puat puat bawk a. Rei lo têah chuan a zal ta der a. Challura chuan a vawikhatna atân râl a that ve ta reng mai. A pa khán Pialral aṭangin lo thlîr ve tak ang maw?

Chalkhengateho kha an rawn chhuak ve thuai a. Challura thah pa ruang chu kaiṭenah chuan an hnutchhiah a, an riah bûk lam panin an kîr leh ta vang vang a. Challura chuan a awm dan pangngai lo deuh, ti deuh huih hian a inhria a, mahni mihringpui han thah meuh chu a mi deh dan a dang viau pawh a ni mahna le.

A tûk khua a lo vâr a, Zonuam khaw mipuite chu an chiai ngei mai. An buzawlah ngei râl kut tuar tih hriat tak maia an khaw mi ṭha pa Khuangkunga, lu bunga a lo let reng mai chuan an thin a tirim takzet mai le. Lal Vankunga meuh pawh thinrimin a lal in chhuat zau pui maiah chuan a vei nghoh nghoh mai a. Pasalṭhate leh khawnbawl upate chuan an lalpa ṭawngkam chhuak chu an lo ngaichâng rân a. 

Lalvankunga chuan thinrim hachâng ṭhial rap rap chung hian, "Kan buzawlah ngei kan hmêlmate chuan min rawn luhchilh ngam vei maw? Lal Vankunga hi tunge ka nih tih an hre lo em ni? Ka pasalṭhate u, phuba la tûrin che chhuak ve nghal ula, hmêlmaho chu dim miah lovin in hmuh hmuh va that ang che u. An khua pawh meivâpah in chantîr vek dâwn a nia," a ti thûm chhur mai a. Pasalṭha Darṭhuama chuan, "Lalpa, i thu ang chuan kan che chhuak ang e. Khuangkunga phuba zawng kan la mawlh ang. Tin, zuam mai mai chi kan nih loh zia hi a tak ngeiin kan lan chhuahtîr dâwn nia," a ti a. A ṭhianteho nen chuan lal in aṭang chuan an chhuak zui nghal a.

Darṭhuamate chuan tlangval ṭhahnem tak chu khâwm nghalin, Zolur khaw lam pan tûr chuan an inbuatsaih ta mup mup mai le. An râlthuam neih ang ang, silai, fei leh chem bakah phaw thlengin an lek chhuak fur a, kawtchhuahah chuan an innghâk khâwm ta hlawm a. Mi zahnih zet chu an ni âwm e. Silai fung sawmhnih zet an hawl chhuak bawk a, khaw vêng tûrin mi tlêmtê an dah a, a bâk zawng chu râl rûn tûrin an thawk chhuak fai vek a ni. An thin a rim tlâng bawk a, Zolur khaw mipuite chu dimna nei miah lova nghaisak chu an tum rilru kher mai.

Chalkhengateho chu an riah bûk lamah chuan an awm zêl dân tûr chu an sawiho nak nak hlawm a. Zonuam khua chu rawlrâlin an la bei zui zêl dâwn nge, an khaw lam panin an haw tawh zâwk mai dâwn, tih chu an sawiho tlâng a. Challura chuan inthlahrung tak chung hian, "Zan hnih khat lêk te chu la hnufual leh rih ila maw le, duh khawp kan la ngah lo tlâng a ni lâwm ni? Pasalṭha rual meuha thawk chhuak ve ta lêm, râl lû pakhat chauh kan hawn zawngin hmai a uang thei dâwn em ni?" a ti charh charh a. Mi dang pawh chuan la hnufual leh rih chu an hreh bîk loh thu an lo sawi ve nak nak a, chutah zawng an hotupa Chalkhenga chuan, "Aw le, chutia la hnufual leh hrih in hreh loh chuan zan hnih khat chu kan la châmbâng a ni ang chu. Amaherawhchu, fîmkhur taka kan chêtchhuah tawh erawh zawng a ngai dâwn a ni. Nizân lama kan thiltih kha an hre chhuak tawh ngei ang a, an fimkhur ve hlë tawhin ka ring e," tiin an thu chu a han tlip a. Tichuan, zan hnih khat la châmbâng tûr chuan an inbuatsaih leh ta zâwk a. Chalkhengateho hian Zonuam khaw pasalṭhate an khaw rûn tûrin an thawk chhuak a ni tih rêng an hre lo. An riah bûk khuarna hi a pilril êm a, an thâwm hriat a har tluk zetin mi dang thâwm pawh hriat a har hlë a ni.

Zân a lo thleng a, Chalkhenga chuan a nauteho hnenah chuan, "Zânin chu Hrangkunga leh Tlutpawrha'n min zui se, mi dang zawng chuan bûk in lo luahlum ve thung dâwn a nia. Khawchhung lam pawh an lo inrâlring tawh viau maithei a, kan vaia kan kal zawngin chêtsual palh a hlauhawm e," a han ti dap dap a. An hotupa thu chu tumahin a hnial kalh zâwngin ṭawngkam an chhâk chhuak duh lo. Upa ber a nih bâkah anmahni kaihruaitu ber a nih bawk si avângin an zah ru hle a ni.

Chalkhenga te chu khawchhung lam pan chuan an che chhuak leh ta a. An rin leh hlauhthawn ang ngeiin kulhah chuan râlvêng an lo indah ta chiah mai le. Chalkhenga chuan tihdan tûr a han ngaihtuah zung zung a, tihdan tûr ṭha tak mai a hre ta. A thil ngaihtuah chhuah chu ṭha dâwn hlëin a hria a; mahse, a tisual palh hlauh a nih erawh chuan chuti hlauh chu a ni mai. Hrangkunga te pahnih hnenah chuan a remruat dan chu a han hrilh a, anni pawh chuan ṭha an lo ti ve kher mai le. Tichuan, Chalkhenga chuan hma hruaiin, râlven bûk lam pan chuan chauh hmêl takin an inzui phei ta hnak hnak a!

Tlangvâl pahnih hi râlvêngin an lo vei dun tlauh tlauh a. Chalkhengate hmêl an hmuh veleh chuan an ding dun chawt a. An silai ken chu lek chhuah pahin, "Tute nge in nih?" an rawn tichhuak nghal ṭhawt mai le. Chalkhenga chuan, "Lalkhuma khua kan ni e. Râl aṭangin in chanchin kan lo hre ve a, amaherawhchu, chiangkuang takin engmah hriat kan nei si lo. Kan lalpa chuan thu chiang zâwk hriat a duh a, min rawn tîr ta vang vang a ni e," tiin dâwt a han fah zaih a. (Lalkhuma hi Vankunga fapa upa ber a ni a, Zonuam khua aṭanga nikhat kal vela hlaah in zahnih khua neiin a awm a ni.) Râlvêng pahnih chu an han inbe dun sar sar a, chutah pakhat zâwk chuan, "Chuti a nih zawngin in lo lût thei ang. Râl an hnaih lai hi chuan kan han fîmkhur deuh mai a ni e," tiin thupha a han châwi nghal zat a. 

Chalkhenga pawh chuan, "Kan hrethiam lutuk che u a nia. Engtia chêt lâk nge in tum tâk le?" tiin a han zâwt zui nghal zaih a. Anmahni lo chhawntupa zâwk chuan, "Tûkin khán pasalṭha eng emaw zât chu, Zolur khua rûn tûrin an thawkchhuak ta chu a nih kha maw! An va chimit mai ang tih pawh ka hlauthâwng hlel lo ve," tih pahin a han nui deuh vur vur a. 

An khaw rûn tûrin Zonuam pasalṭhate an thawkchhuak a ni tih an han hriat meuh chuan an thin a ṭhâwng kher mai le! Eng han tih theih lah an nei dêr si lo. Haw leh ta vang vang pawh ni se, a tûk ni tlangsán hun âwm vêlah an khua chu an ban hman emaw chauh a ni tawh âwm si a. Râlho chuan an duhtâwkin khua chu an lo suasam hman ang tih mawlh chu an hlauhthawn ber a ni. Chalkhenga chuan, "A nih tak chu maw le. A nih leh mi engzât âwm vêl nge thawkchhuak rêng rêng le?" tiin a han zâwt leh hram a. 

A mi zawhpa chuan, "I va dilchhût reuh ve maw le? I hriat duh viau si chuan le, mi zahnih zet chu an nih âwm kha maw. Kan hmêlmate tân chuan an huphurhawm khawp ang le! Zolur khuaa ka lo awm lo hlauh hi chu vannei ka inti teh mai asin," tih pahin a nui zui huah huah a. Chalkhenga thinrim chuan chupa chu han sah lirh tawl tawl mai a châk ngei mai. Mahse, chutia a chêt thut si chuan, râlven bûka mi dang awm ve te chu a ti râlkhêl ting a ni mai dâwn si a, a insûm hram hram a. Thudang pawh zâwt leh tawh chuang lêm lovin khawchhung lam pan chuan an kal zui ta daih a. 

Râlvêng hovin an hmuh phâk lohna tûr âwm vêlah chuan an ding chawt a. Chalkhenga chuan, "A rang thei ang berin bûk lam panin kan kîr leh nghâl tûr a ni ang," a han ti sap a. Tichuan, kulh chu hêlin, hmun dang aṭang chuan khua chu an chhuahsan a, an ṭhiante awmna lam pan chuan an tlân ta hlawk hlawk a.

Challurateho khán an bûk kawtah a langsar lo thei ang ber tûra mei chhêmin, an mei chhem chu an lo kîl bial laih laih hlawm a. Chutia an rin aia hmâa Chalkhenga teho an rawn kîr leh ta hlawl mai chuan an ngaih a tiṭha lo hlawm hle a. Challura chuan ngaihṭhat loh hmêl tak chung hian, "Ka pa Kheng, engtizia nge, in va rawn kîr leh hma si ve? Thil dik lo a awm em ni?" tiin a lo zâwt nghal sawk sawk a. Chalkhenga chuan an thu hriat chu a han hrilh ve zung zung hlawm a. A thusawi tâwp lamah chuan tihian a han ti a, "Chutiang chu thil awm dân a ni a, tunah chuan kan khaw lam ngaihtuah loh theih a ni ta si lo va, a rang thei ang berin khaw lam panin kan kîr leh nghal tûr a ni ang. Insiam zung zung ula, kan chhuak nghal mai dâwn a nia," a ti a. Tlangvâlho chu an insiam sawk sawk a, hmanhmawh takin an khaw lam pan chuan an kîr leh ta vang vang mai a ni.

Challura rilru chu a nuam thei thlâwt lo mai. A nu, amah chauha awm a han ngaihtuah chhuah phei chuan a rilru a hah tak meuh meuh a ni e. A chhe ber thlenga ngaihtuah loh theih a ni bawk si lo. Râlho chuan a nu chu an lo that ve palh hlauh ang em? An lo that a nih vaih chuan Zonuam khaw mi leh sate lakah chuan phuba a va la dâwn rua ém! Amah chauh a ni bîk lo, a ṭhian dangte pawh chuan an chhûngte chu an lo ngaihtuah ru ve êm êm hlawm a, an hmêlmate chuan khua chu an lo luhchhuah hman ang tih mawlh chu an hlauh ber a ni si a.

Hetih lai hian Zolur khaw lamah erawh inbeihna nasa tak a thleng mêk a. A tu lam ve ve pawh thi leh hliam an kat nûk tawh mai. Kawtthlêrah te chuan thisen a luang kawi zeih zuih a, mitthi ruang a tlu kawkalh nelh nulh mai a ni. Nunauho chu lal mual lamah an tlânkhâwm vek tawh a, Pasalṭha Zolur khaw tlangvâl huaisen tak takte chuan râlho chu an lo bei lêt mup mup hlawm a. An thin a rim tlângin hlauh reng an nei lo. Incho leh incho, phuba lâk châk ve ve an ni bawk a, an indim lo salh salh hlawm kher mai. A rem lai laiah an insât ri chawrh chawrh a, feiin an in sechhun thawih thawih tawh mai a ni. 

Zonuam khua hian silai an ngah zâwk miau avângin atîr lamah chuan an dinhmun pawh a ṭha viau rêng a, hnehna chang ngei tûrah pawh an lo inngai hman hial a ni. Amaherawhchu, an han inpawmchilh tak tak hnuah zawng, silai chu hman hleihtheih pawh a ni ta bîk lo va. Tin, Zolur pasalṭhate chuan kiltin aṭangin an rawn bawr sup sup bawk si nen. Mahni buzawlah na nâ nà chuan huai pawh an lo huaisen deuh nge nge a, putar thleng thlengin mahni khaw chhan tûr chuan an rawn pên chhuak a ni thawthâng mai a, chu ai maha thil pawimawh zâwk leh Zonuam khaw pasalṭhate huaisenna petu ber zâwk chu an lalpa Lalvunga chu a ni âwm e. Khatia râl hovin hnehna an chang thei mai dâwna a lan tâkah kha chuan a lal in chhûnga lo tawmsen reng kha chu a tum bik hauh lo mai. Kâwlhnâm nen inbeihna hmunah chuan a rawn lang ve ta tlat mai le. Chutia an lalpa hmêl an han hmuh tâkah meuh chuan, Zolur pasalṭhate chu an phur thar ta, hlauh rêng an nei tawh lo. Ṭhiante aiin kan thi hnuhnung zâwk dah ang e, tih hlau ni âwm zâwk takin râlho chu a bawhin an bawh phei buan buan ta mai a. Darbuta chuan hmahruaiin a nauteho chu a fuih pah reng bawk a. Chutah meuh zawng, râlho tân pawh 'a hnuhnung hnung phûngin seh' tlânchhiat mai loh chu duhthlan tûr dang an nei ta lo. An ṭhiante ruang pawh ngaihsak hman lovin an tlânchhe ta dâwr dâwr hlawm a. Zolur khaw tlangvâlte chuan ûm zui an han tum a; mahse an lalpa chuan, "Thih hlau va tlânchhe na nâ nà chu i ûm zui lovang u. Thlamuang takin haw mawlh rawh se, Zolur khua hi zuam mai mai chi kan nih loh zia an hre chiang tawh hle dâwn a ni," a ti ta hlauh a, tlangvâlho pawhin an lalpa thu chu zawmin râlho chu an ûm zui ta bîk êm lo va.

Ruang senghawi tûr a tamin, hliam lah chu eng emaw zah an awm bawk a. Tin, an hmêlmate zingah pawh hliamtuar, mahnia insaseng thei tawh si lo eng emaw zah an awm tel nghe nghe a. Tlangvâlho chuan hmêlma lam hliamtuarte chu thah nghal law law an duh viau hlawm a; mahse, an lalpa bawk chuan, "Indona chu a zo tawh a, hnehtu zâwkah kan ṭang a ni lo'm ni? Thisen chhuahna râpthlak tak a thleng tawh a, mitthi kan tam tâwk hlë ta e. Heng hliamtuarte hi kan hmêlma ni mah se, ṭha takin kan enkawl tûr a ni ang. Ka thu lo chuan mi tumahin an samzai khat pawh in lâksak tûr a ni lo," a ti a. Tlangvâlho pawhin an lal thu chu zâwmin, hliamtuarho chu Zawlbûk lamah an zâwn chho ta hlawm a. Zonuam khaw mi leh sate erawh chuan chuti taka Zolur khaw lalin an chunga khawngaihna a lantîr ta mai chu mak an tiin âwih harsa pawh an ti ngei mai. An lalpa chu ni ve se zawng, hmêlmaho chu khawngaihna nei miah lovin a tihhlumtîr ngei âwm si a. An rilru chuan thil tam tak a ngaihtuah chhuahtîr phah hial a ni.

Darṭhuama te lam ve thung erawh kha chu, khatia arpa dâwih zâwk ang maia an han tlânchhe ta mai kha tlâwmthlâk an tiin an thin a rim ru hle mai a. Chu a chhapah an ṭhiante ruang pawh hawn lo leh hliamtuar tam tak an tlânsan te kha an rilruah a awm reng bawk si avângin hrehawm an ti takzet a ni. Darṭhuama pawhin a bân veilamah hliam chhe tê a tuar ve a, hnehna an chang ngêi tawh dâwna a lan laia a chak lo zâwka an han ṭang leh ta si chuan a run êm êm mai a, a thinrim chu a âng buan buan reng a, tlangvâlho phei chuan an hnaih ṭha ngam meuh lo. Darṭhuama mizia hi an hre chiang ve hlë tawh a, a thinrim khaw hmu lo hian kut a thlâk palh mai ang tih chu an hlau ru vek hlawm mai. Vawikhat pawh an ramchhuahnaah an tum angin an hlawhtling lawk lova, an zinga tlangval pakhat beidawng chuan haw mai a rawt thawt thawt pek a, Darṭhuama thin thawk phuk chuan engkhaw sawi set set lovin chu tlangvâl chu a kâp lêt tawp mai a ni. Khawnbawl upamin fapa a nih avangin miin a chungah engmah an tingam dêr bawk si lo, an hlauh tlawn ru hlawm viau reng a ni. Darṭhuama te ang hi chu 'Pasalṭha' tia sawi tlâk pawh an ni lova, eng ang pawhin huaisenin sa leh râl lakah lo che ṭha ṭhin viau pawh ni se; an nungchang leh miziain a zir miau si loh chuan 'Pasalṭha' tia chhal ngam tak tak an ni lo. 

Kha'ng hun laia miten 'Pasalṭha'  tia an lo sawi chhuah chin tawh ngat te kha chu an nêp lo hle a ni. 'Pasalṭha' ni tûr hian huaisen leh tlawmngaih ngawt a tâwk lova, sa kâp thei leh râl that thei nih ringawt lahin pasalṭha dinhmunah a hlângkai thei hek lo. Mi chu râl leh sakawlh lakah huaisen eng ang mah se; a nunzia chu a mihring puite lakah nun ngaihzâwn awm a ni lo thei tlat thung. Ṭawngkam tlahawlh pui pui leh dêngkhawng pui pui a hman a, mi chak lo zâwkte hnuaichhiaha a chaldelh fo si chuan a huaisenna ringawt chuan 'Pasalṭha' nihna khawvêlah ṭhi a behtir thei chuang lo. Tualthat, rukrûk, uire hmang leh dâwt sawi chîng miten Pasalṭha nihna khawvelah hmun an chang pha ngai lo a, râl leh sakawlh hmaah huaisen tawpthang an lo nih pawhin huaisente chawimawina chi khat 'Huaisen Nopui' erawhchu hlawhin an dawm ṭhin. Amaherawhchu, chutia 'Huaisen Nopui' a lo dawm tawh avang ringawtin Pasalṭha tia sawi leh chhal theih a ni chuang lo. 

Pasalṭhate nunah chuan chawimawina hranpa a awm tawh lo a, chuti ang thil chu am beisei ngai hek lo. Tu fak leh chawimawi mah hlawh dâwn lo mah se a tih tur a tih loh phah chuang lo va, a kova mawhphurhna tla tawh rêng rêng chu hlen chhuak lovin a dah ngai hek lo. Harsatna a hmachhawn hunin a hêlna a zawng ngai lova, pumpelh tumin a biru ngai hek lo. Huaisen takin a hmachhawn mai ṭhin a ni. Mahni inphatin mi dangte tân an nun an thap a, mi dangte ṭanpui tûrin an inpeih reng ṭhin a ni. 

Hetiang hi a nih avângin Darṭhuama hi huaisen hlë mah se mi tam tak chuan 'Pasalṭha' tiin an hre ve lêm lo. An khuaah chuan miten 'Pasalṭha' tiin an lo sawi ṭhin pawh a ni mahna; mahse, khawdang mite mithmuhah erawh chuan 'Pasalṭha' tia han chhal tlâk a ni hauh si lo. A pa khawnbawl upamin a nihna changchawiin an khaw mite hian pasalṭha sawiin an sawi a ni lek fang mai.

Zonuam khaw vâl upa Rozika chuan, "Hm..mm..Eng pawh ni se, khaw lam i pan phawt mai teh ang u. Kha leh chen kha dinhmun ṭha zâwkah kan lo ding tawh ṭhin a, tunṭum zet erawh chu kan vanduai a ni e. Kan chak loh vâng leh kan hlauh vâng ni lovin, an lalpa ho meuha an rawn thawh chhuah vang a ni ber e. Ṭhiante dem zâwng emaw, kan rilru tihnual thei tûr zâwngin tumahin ṭawngkam i chhâk chhuak lovang u. Hun ṭha zâwk a la rawn her chhuak leh êm êm ang a, chutih hunah chuan tuna kan tawrhnate hi theihnghilhin a nui zâwkah kan la ṭang ngei ang," tiin thiam tak maiin a nauteho chu a han hnêm a. An vâl upa ṭawngkam chuan tlangvâlho rilru chu a tidam sawng sawng mai a ni. An lalpa hmêl hmuh huphurh tak chung leh ngui nghiai maiin an khaw lam pan chuan an kîr leh ta hnak hnak hlawm a. Lal Vankunga chuan engtin tak lo ngai ang maw?

Chalkhenga te lam ve thung kha chu, hmanhmawh takin an khaw lam pan chuan an kal hlawk hlawk a. Hetia an khaw lam pana an haw lam leh Darṭhuama te haw lam ve tho nen chuan rinloh takin an intâwk ta thut mai le! A tu lam ve ve tân pawh han inrâlrinna hun awm hek lo, an hma hruaitute ve ve, Chalkhenga leh Darṭhuama te pahnih chu an inmelh ta kal mai le. Chalkhenga chuan an dinhmun hlauhawm zia chu a han ngaihtuah a. Zonuam pasalṭhate chuan an tam hneh êm avangin engti kawng zâwng mahin an ni, mi sawm lek tân chuan hneh ngaihna a awm lo tih pawh a hre chiang kher mai. Chuvangchuan, a nauteho sahimna tûr ngaihtuahin rang taka insaseng tûrin a han âu chhuak ṭhawt a. Chu veleh Darṭhuama pawh chuan, "E he he, nangmahni phiangsen hi a ni maw kan buzawla min rawn luhchilhtute chu ni a? In duh chu in hmu dâwn khawp e," tih pahin a silai chu a dah lawk a, chempui nen Chalkhenga chu a rawn pan ta nghal buan buan a. 

Challura te lah chuan an hotupa chu tlânchhiatsan an lo tum bîk awzâwng lo mai aan hotupain tlânchhe tûra a han ti chung pawhin tumah tlânchhiat tum rêng an awm lo. Chutih a hnêkin an chempui chu phawrhin an hmêlmate chu an rawn bawh phei ve ta mai a. Chutah meuh zawng, chu ngawpui hnuai ṭhelh hun mai chu indona mualah a chang zo ta. 

Zonuam tlangvalte lah chu an râl run hlawhchham leh beidawng thinrim lai tak a nih avângin pawisak an nei tawh lo êm êm mai a, an ṭhiante phuba lâkna remchângah ngaiin chûng Zolur pasalṭhate chu thah chimih vek tumin an rawn chîm phei ve ta huk mai a. Lusei tlangvâl, hlauh nei lo leh ṭhian chhan thih ngam ṭhah mai chu nunna inlâksak tumin an insât ta siah siah mai le. 

Chalkhengateho chu a tlêm zâwk an ni bawk a, huaisen teh mah se an ṭanhmun a phet tial tial a. Zonuam pasalṭhate lah chuan nungdama chhuah an tum hauh lo tih chu an chêt dan aṭangin hai rual a ni si lo va. Chalkhenga chuan Challura chu a man bet lawk a, "I nu ngaihtuah rawh, kan vaia thih hi a ṭul lo ve. Nakinah i ṭhiante phuba hi i la rawn la zâwk dâwn nia," tiin a nawr nawk nawk a. Hmêlmaho lah chuan an hual phui lek lek tawh a ni si a. Challura chuan an hotupa chu hnial a han tum zuai a, mahse Chalkhenga chuan thinrim takin, "Challur, min va zah lo ve, i aia upa thu hi i hnial ngam dâwn em ni? Tunah tlân thuai mai rawh," tiin a vin tuar tuar a. Challura thinrim leh tlawmngai bawk si chu a mittui a tla zawih zawih thei hial a ni. An hotupa thu chu hnial chi rual a ni tawh si lo, hreh tak chung leh rilru hrehawm tak chungin a ṭhiante chu a tlânsan ta nge nge a. 

Chalkhenga chuan a tam thei ang ber hmêlmaho chu thihpui ngei tumin a chempui chu a vai buan buan a; mahse, hmêlmaho chuan an bawr hneh êm a, a vanneihna chuan a tlin ta bîk lo va. Hmêlmaho kutthlâk chu tuar lovin pasalṭha huaisen tak chu a tlu ta nge nge a. A nauteho pawh chu nunna nei tawh lo tih hriat takin leiah chuan an lo zâl dêr tawh hlawm a. Chalkhenga chuan Zonuam pasalṭhate en chung chuan thei leh thei lo hian, "Mi...dawi...h...ze..p..ho," tiin a han phun khum sap a, chutah a han khuh bawrh bawrh a, thisen duk pui pui hi a rawn phuh chhuak ṭhawt ṭhawt a, pasalṭha huaisen tak mai chuan lal leh khawtlang tân a nun hlânin, Pialralah faisa ringa khawsa tawh tûrin a nunna chu a lo thlah ve ta a ni.

Darṭhuama teho chuan diriam tak maiin an hmêlmate lû chu an tan a, an hlawhchhamnate chu theihnghilhin, an râl thahte lû nen chuan khaw lam panin an kal leh ta vang vang a. Pasalṭhate khawvêl hi zawng a nun a râwngin, khawngaihna leh hmangaihna hian hmun an chang ve ta lo emaw tih mai pawh a awl rum rum hial ṭhin a ni.