PASALṬHATE KHAWVÊL -3

BUNG THUMNA

'Ami an than nan e, dorâl lian lu an tlun,

Vanduai kan than nan e, ka hrai rihsang a kai.'

Muang taka seki leh khuangpui ri inchhâwn buk buk kârah chuan, lungchhe taka ṭap thâwm hriat tûr a awm leh zauh ṭhin a. Zolur khua chuan an hmêlmate lakah hnehna chang mah se, nunna tam tak an chân ve tho avângin an lâwm a kim thei bik lo. A ni lah tak a, pi leh pute pawhin, 'Sawm thah niah pawh vawikhat lungngaih a awm châwk' an lo ti mathlâwn lovin, Zolur pasalṭhaten hnehna nena hlado an chham hnu lawkah nuho lusûn thâwm chuan khua a khah leh ta si a ni. Nu tam takin an pasal leh an fapa neih chhun an chân a, hmeithai tân phei chuan a nat dan sawifiah thiam chi rual a ni lo. An ṭap keuh keuh reng mai a ni. Indona hian rah ṭha a chhuah ngai lova, ṭhalai duhawm tak tak ten vanglai hun hmang hman lovin famkhua an làwi phah ṭhin si a.

Lalvunga meuh pawhin a pasalṭha, lal leh khawtlang tâna nun hlantute chu ui tak leh zah tak chungin a thlah liam a. Indonaah chuan hnehtu zâwk ni mah se, a man a va tam si êm! Thisen leh nunna tam tak a luang ral si a. 'Aw, pasalṭhate hi zawng in lo hlu mang e. In zârah thlamuangin kan awm theih phah a, lal leh khawtlang muantu zawng in lo ni e. Rihsâng mual liamin, Pialralah chuan han kâi ta ula, min thlahtu pasalṭhate chuan chawimawina nen ropui takin an lo hmuak ngei ang che u. In lal leh khawtlâng tâna in hnathawh hi ṭhang leh tharte thleng pawhin chhuang takin an la rawn sawi leh ṭhin ang a, zah tak chung che u in, in hming an la rawn lam leh ṭhin ang. Ka pasalṭhate u, mangṭha ule. Kan thinlung hian a hre reng tawh dâwn che u a ni,' tiin Lalvunga chu a han phun sep sep a. Chumi ni chuan pasalṭhate chu ropui takin an vui liam ta a ni.

Zonuam khaw mi leh sa, hliamtuar an enkawl mêkte pawhin ṭhat lam an pan chho ve hret hret zel a. Chuti taka a hmêlmate chunga khawngaihna lantîrtu chu hmuh an châkin lawmthu hrilh mawlh an duh a ni. 

Ni thum lai a ral leh tawh a, tunah zawng Zonuam khaw mi leh sa an enkawl mêkte pawh an dam ṭha tawh viau mai. An tuar a chhel hlawm hrim hrim a, na nei lo ang maiin an che leh thei ṭan tawh a. Chuti ang a lo nih tâkah chuan vâl upa Zasela leh mi ṭhenkhat chuan an lal hnenah an mi mante chu engtia tih zui zêl tûr nge ni ang, tiin an han râwn a. An rin loh tak maiin Lalvunga chuan Zonuam khaw mi leh sa an mante chu ṭha taka chhuah tûr leh kawng laka an ei leh in tûr thlenga pe tûrin a lo hrilh ṭhen a! Zasela te chuan mak an ti ngei mai...

An lalpa duh dan ang ngei chuan Zonuam khaw mi leh sa an mante chu an chhuah ta nge nge a. Kawng laka an ei leh in tûr thlengin an pai sak vek a, an khaw ram chhûng thleng an va thlah ta nghe nghe a ni. 

Zolur khaw lalpa thiltih dan chuan an hmêlmate rilru chu a khawih kher mai. An lalpa chu ni ve ngat se la chuan, a tihhlumtîr loh leh sal atân a chhawr ngei âwm si a. Lal ṭheuh ṭheuh pawh an lo inan loh zia chu an hre chhuak chiang kher mai le. Engtikah emaw chuan Zolur khaw lal bèl tûr hian a pèm pawh an la pêm hial mahna le!

Ni thum zet a liam leh tawh a, Challura chu rampalailêngah kalna lam tûr bik pawh hre lovin a vâk a vâk ringawt a. Khatia a tlanchhiatna lamah khân vanduaithlâk tak maiin Zonuam khaw ram chhûng lamah a tlân lût palh ta hlauh mai si a le! Ram chin engmah a hriat bawk si loh avângin a sapavah vak vak ringawt mai a ni. A hriat loh kârin a lo bo thui hlë hman tawh a, han kîr leh dáwn pawh ni se, a kalna hnu chu a chhui lêt leh thei tawh tlat si lo. A rilru a buai ta ngei mai. 

Ngawpui chhah tak mai, ramsa kawlh leh hlauhawm pui puite tualchaina hmunah chuan Challura chu beidawng leh hrilhhai tak chungin a kal hnek hnek zel a. A ril a ṭâmin a chau takzet tawh a, chu ngawpui hnuaiah chuan bawisawmtu pawh nei lovin a arte thih ringawt mai dáwn em ni ang? Zonuam pasalṭhate nen an inbeihna lamah khân hliam a tuar ve nual hman a, han thihpui khawp tûr êm zawng ni lo mah se thisen chhuak reng chuan a taksa a ti chauvin, hetiang reng a nih chuan a damkhaw chhuak zo lo mai palh ang tih pawh hlauhawm tak a ni. A thiam ang angin a hliamte chu han enkawl ve bawk mah se, duhthu a sâm lo kher mai. Han inenkawl vak ngaihna a awm bawk si lo, ram hnim damdawi a hriat ang angte chu zawng khâwmin a hliamah chuan a hnawih ve nawk nawk a. Tlêm chuan a ngaih pawh a ṭha ve deuh huai mai! 

Chau tak chungin hmalam pan chuan a kal leh ta bek bek a. A rilru chu tih hnual mai a tim bik lo, a pa ngeiin, "Eng thilah pawh, an beidawng hma lutuk ngai lo ve. A tawp i thlen hma chuan beidawng ngai suh ang che," tia a hrilh laite chu a han hre chhuak a, chu chuan beiseina leh chakna thar a pe a, he ngawpui hnuaiah hian thi mai mai thei a ni lo. A ṭhiante phuba la tûra dam a la mamawh a ni. Tin, a nu kha a lo la dam hlauhte a nih phei chuan, a tel lovin a khawsa thei dâwn hauh si lo va...

Ni hnih zet a kal leh tawh a, a rilru chuan la zuam viau mah se, a thahrui chuan a tlin tawh mawlh si lo. A lû chu a rawn hai muai muai a, a ding hleithei ta hauh lo mai. A tha a rawn zawi tial tial a, nikhaw hre lovin leiah chuan a tlu ta thlawrh mai a ni. 

Lalkhuma khua Bukpui chu in zahnih vêl an ni âwm e. Khaw nuam tak ni mah se; an lalpa mizia hian a zir loh êm avângin mipui an rethei hle mai a. Sawi tawh ang khán Lalkhuma hi Zonuam khaw lal Vankunga fapa upa ber a ni a. Zonuam khua nen hian kel daidan leka inhlat an ni nghe nghe a. Lalkhuma chu a pa ang maia pawisak nei lo leh duhâm tak mai, a pa ropuina chhuanga chapo ar mai hi a ni a. A khua leh tuite pawh a tirethei viau ṭhin a, a khaw mipuite pawh hian an ning ru viau reng a ni. 

He khuaah vêk hian hmeithai nufa hi an awm a. Chu hmeithai hming chu Lianpuii a ni. Fanu pakhat Lianchhingi a nei a, nula hmelṭha tak mai a ni nghe nghe a. Bukpui khuaah chuan a to pawl tak a ni ve âwm e. Lianpuii pasal chu râlin an thahsak tawh a, Lalkhuma khuaah hian harsa takin an khawsa ve naw naw a ni ber a. An lalpa lah hian a fanu chu a rawn beisei fo mai leh nghal. Lianpuii rilru chu a hah ru thei viau mai. A tihngaihna hre lo chuan a fanu chu ram lamah a riahpui ta ngawt mai a ni. An lo neihna lai hi khua aṭanga a hlat deuh hlek avângin ramriak ve dang pawh an awm nual a. Zân lamah tlangvâl hovin Lianchhingi chu an rawn rîm ṭhin a. Tin, Lianchhingi nu chu an theih ang angin hnate pawh an thawhpui bawk ṭhin a ni.

Ni khat chu, Lianchhingi chu an vau luiah tui châwi tûrin tuiûm nên a inphur liam hnak hnak a. Khua a ṭhain ni pawh a sa ṭha vawl vawl hle mai a. Favang boruak a inṭan chho ta mêk bawk nen, khaw awm dan chu a lunglênthlak duh fu mai. Lianchhingi pawh chu a hriatthiam chiah si loh khawharna leh lunglênna chuan a rawn tuam leh veng veng a. A ngaih ber pawh hriat si loh chuan a lung a lêng ru vawng vawng mai nia! Amah pawhin mak a inti viau mai a, ngaihzâwng lah a la nei chhin ngai hek lo, an khaw tlangvâl zingah lah a mit han la deuh eihtu an awm bawk si lo va. Engvanga khawhar ru ta viau nge maw a nih chu le? 

Chutiang thil vêl a ngaihtuah chhûng chuan an vau lui pawh chu a lo thleng hman reng tawh a. Hmanhmawh takin tui chu a thâl sawk sawk a, a tui thâl zo, kal a han siam leh dâwn lai tak chuan thâwm danglam tak mai hi a hre ta tlat mai le. Chu a thâwm hriat chu, mihring natuar han rûm ri der der ang mai hi a ni leh nghal. Lianchhingi chuan a hlau ru deuh viau mai a, thlâm lam pana kîr leh thuai thuai chu duh hlë mah se; a chhia leh ṭha hriatna chuan a thâwm hriat chu finfiah ngei tûrin a nawr miau mai si a. A tawpah zawng a tuiûm phurh chu nghatin, a thâwm hriatna lam pan chuan hawi zak zak chungin a kal ta nge nge a. 

An vaua rawṭhing hmun ngir khurna lam chu a pan phei zel a, thui pawh a kal hman âwm lo ve, a hma lawkah chuan mi ruang ni âwm tak hi a hmu ta hlawl a! Lianchhingi chu a ding chawt a, a tiril chu a rawn khur der der a. Mi dang an awm leh awm loh hriat tumin a hawi kual zak zak a, mahse, tumah mi dang awm ve âwm a hmu hauh si lo. An khaw mi leh sa pawh a lo ni mial maithei asin, ti rilru chungin hmalam pan chuan a han pên phei chhet chhet a. A tawp a tawpah zawng a va hnaihchilh ta nge nge a. 

Chu pa chu a lo la thi hauh lo mai! Zâwi tê têin a lo rûm der der a. A hliam aṭanga thisen chhuak nasa lutuk chuan a tichau ni ngei tur a ni. Lianchhingi rilru chu a buai map mai le, engtia han tih tûr nge tih chu a hre thiam mai bik lo. He pa hi râl pawh a lo ni maithei si a; mahse, hliam a tuar a, ṭanpui angai a ni tih lai a hai si lo. A kalsan ngawt thei lovang. 

Chu pa bulah chuan a han ṭhu hniam riai riai a, kut khur deuh hlak hlak chungin a nghâwng vêlah chuan a han dehsak chhin a. A lo sa vur mai a, a khawsik a sáng hle a ni tih chu a hrethiam ve khawp mai. Chutah zawng, a hlauhna leh ngaihṭhat lohna te chu dah ṭhain a theih ang angin a bawisawm ta thuai thuai a. 

Chu pa chu tlangvâl la naupan hmêl tak leh huaisen hmêl deuh mai hi a ni a. An khaw mi leh sa zawng a ni hauh lo mai. An khaw ṭhenawm Zonuam lam mi pawh a ni mahna le. Chu zawng ani tân chuan hriat kher pawh a ṭul lo, ṭanpui ngaiin mi an awm a, a lo ṭanpui a ni ve mai a, thil dang hriat tel kher chu a pawimawh kher lo ve, tiin a ngaihtuah kual vêl a. Chutih lai chuan a nu chuan a rawn au ta lauh lauh mai le. Lianchhingi chu a harh chhuak zawk a, a tui chawi lam reng reng a lo hre chang tawh hauh lo chu niin, a thang rei tâk êm avângin a nu ngaihṭha lo chuan 'engti zia nge?' tiin a rawn zawng hi a ni âwm a. Lianchhingi chu a tho vat a, a nu awmna lam pan chuan a tlân hlawk hlawk a. 

An vau luiah chuan Lianchhingi nu chu, hrilhhai tak mai hian a lo hawi kual vak vak a. A fanu hmêl reng reng a hmuh loh avângin a ngaih pawh a ṭha lo hle mai a, tawhsual a tâwk ta em ni chu le, tia a lo ngaihtuah mêk laiin a fanu chu a rawn lang ta hlawl a. Lianpuii chuan, "Liani, engtizia nge, i va thang rei êm êm ve?" tiin awka vin lam lek lek hian a lo zâwt nghal vat a. Lianchhingi chuan inthiam lo deuh tak chung hian a nu bulah chuan thil awmzia zawng zawng chu a han hrilh a. A nu pawh chuan mak a ti hle mai a, a fanu hnenah chuan, "Chutiang a lo ni maw? I thang rei lutuk a, ka ngaih a ṭha lo hman pek alâwm le. Khai, i mi sawi pa chu i va en chiang dun teh ang," a ti nêm duai a. Hmanhmawh takin tlangvâl awmna lam pan chuan an kal dun ta sawk sawk a. 

Lianpuii chuan tlangvâl chu ngun takin a han en chiang vêl a, a mi hriat zâwng a ni bîk hauh lo mai. A fanu hnenah chuan, "Kan khaw mi leh sa zawng a ni hauh lo mai, kan khaw ṭhenawm a mi pawh a ni maithei e. Tirawh, a zakah khán dawm la, thlâmah i hruai chho thuai teh ang," a ti a. An nufa chuan tlangvâl chu an kaihkuah a, thlâm lam pan chuan harsa titak chungin an chhohpui ta a. 

Thlâm an thlen veleh Lianpuii chuan tlangvâl hliam chu a thiam ang angin a enkawl zui nghal a. A hliam chu tuilumin a hru fai sawk sawk a, chumi hnuah an vau vêlah chuan ram hnim damdawite va zawng khâwmin, chu chu a thiam dan tâwkin a sawngbawl kual a, tlangvâl hliam laiah chuan a hnawih kual den den a. Chumi hnuah puan fai takin a tuamsak leh thlap a. Lianchhingi chuan tlangvâl mutna tûr chu a lo siam zung zung a, ṭha taka an muttîr hnuah an puan lum neih ang ang chu an sintîr a. Lianpuii chuan a fanu hnenah chuan, "He tlangvâl hi kan khaw tân chuan hmêlma pawh a lo ni maithei a, kan fimkhurpui viau angai dâwn a ni. A hliam han en hian tute nen emaw an inbei a nih hmêl hlë leh nghal, zânin phei chu tumah lo lêng lo se la a ṭha ang. Chuti lo zawng tuten emaw lal hnenah an lo hrilh palh thei a, keimahni thleng thlengin kan tawrh phah hlauh dah ang e," a ti a. 

Lianchhingi chuan, 'Hmêlma atân chuan i pamhmai mang e!' a han ti rilru sap a, a nu bulah erawh chuan, "Zonuam khaw mi leh sa pawh a lo ni mial maithei asin," a ti ve thung a. A nu chuan, "Nih pawh a ni maithei a ni. Nakinah amah kan la zâwt dâwn nia. Tikhan lo awmpui la, hlo ka va thlo leh lawk ang e," a ti a, thlâm aṭang chuan a chhuak zui ta nghal a.

Lianchhingi chuan tlangvâl mu lai chu a thlîr vang vang a, a khawngaih ru kher mai. Chhûngte pawh i nei ve ngei àwm si a, i chhûngte chuan an va ngaihtuah dâwn tak che êm!, ti tein a ngaihtuah kual a. Engvanga chu tlangvâl chungchâng chu ngaihtuah vak nge maw a nih chu le? 'Râl pawh a lo ni maithei a, lo khawngaih vak a ngai em ni?' Tiin amah leh amah chu a han indem leh rih ṭhin a, nakinah phei chuan thlâm tlaitlan lamah a ṭhutsan ta daih a! 

Ni pawh kâwlah a her liam ruai ruai tawh a, sava te pawhin riahna tûr zawngin thingzâr an bel leh ṭan sap sap tawh a. Lelthang kiu vawng vawng leh thereng hrâm ri chuah chuah thâwmte chuan eng emaw tizâwng tak hian lung zuk han tilêng thei a maw le!

Zanriah ei dâwn thleng pawhin tlangvâl chu a la rawn harh chhuak lo reng reng a, a châng erawh chuan nâ ti âwm takin a rawn rûm chhuak leh ṭiah ṭiah ṭhin a. Lianchhingi chuan a ṭhutchilh chawt a ni ber e. Chaw eiin a thawhsan zawk tih mai loh chu tlangvâl bulah chuan a ṭhu chawt a, damlo ṭhutpui e ti lo chuan nuam a ti ru phian lawi si! A ni e, hmangaihna hi zawng hriat loh kârin a lo piang chhuak a, mi vannei ten an vanneih pui laiin mi vanduaite inkârah erawh chuan hriat chhuah pawh hlawh lovin a thâmral leh mai ṭhin. 

An vanneih asiamin chumi zân chuan tumah rawn dikdak an awm lo hlauh mai a. Lianchhingi nu pawh a thaw huai mai. Ni e, he tlangvâl hi an lal tân mi hlauhawm tak pawh a lo ni maithei a, chutiang mi a lo nih vaih phei chuan, a lo enkawltu nih ringawt pawh thil hlauhawm tak a ni si a. Fimkhur angai takzet rêng a ni. 

Zanlai vêl a ni tawh âwm e, mak tak maiin mikhual tlangvâl chu a rawn harh chhuak hlawl mai a. A mutna aṭanga ṭhutchhuah pahin a awmna lai vêl chu, makti âwm tak hian a thlêk kual vêl a. Engtia hetiang hmuna lo awm mai nge maw a nih chu le, tiin a ngaihtuah kual ruai ruai a. Mahse, a hmalama a awm dân vêl chu chiang taka hriat a nei fumfê tlat si lo. Ramhnuaiah kawng a bo va, kalna tûr ber pawh hre lovin a vâk kual vak vak tih erawh a hre thei riai ruai a. A bâk erawh a ngaihtuah chhuak zo tawh tlat lo. Thâwm dîm takin a tho chhuak ṭhêm ṭhêm a, tapchhak bul lawkah chuan hmeichhe pahnih, nufa ni âwm tak hi tui takin an lo muhil bawrh bawrh a. Chu tlangvâl chuan makti âwm tak hian a thlîr vung vung a. En chian tuma han pan hnaih a tum lai tak chuan eng emaw hi a pal palh hlauh mai a, inring hman tawh hek lo le, chhuatah chuan a tlu ri dup mai a. Chumi thâwmah chuan Lianpuii te nufa chu an rawn harh a. Tlangvâl pawh chu che lo chang lovin a mu ta reng a. 

Mahse, Lianpuii chu a rawn tho chhuak a, tapchhakah chuan ṭhuin mei chu a chhêm alh ta hlauh mai le. Chutah zawng tlangvâl pawh chu a rawn ṭhu chhuak ve ta nge nge a. 

Lianpuii chuan, "E! I rawn harh chhuak tawh a ni maw? A vawt i ti em, meilum hi rawn ai hnai ta che?" tiin a lo be nghal sawk sawk a. Tlangvâl chuan, "Ka ṭha e. Ka pi, in chungah hian ka lâwmthu sawi ka ba nasa hle mai. Eng pawh ni se, engtin nge hetah hian ka lo awm ngawt theih le?" tiin amah an hmuh dan chu a zâwt ta rawih mai a. 

Lianpuii chuan a fanu tui châwi tûrin a hmuh dan leh thlâm lama an hruai chhoh dante chu a hrilh fai ta kelh a. Tlangvâl hnenah chuan, "Engvanga hliam tuar nge i nih rêng rêng le?" tiin a han zâwt ve thung a.

Tlangvâl chuan, "Ka pi, kei hi Challura ka ni a. Zolur khuaa awm ka ni e. Kan khuaah chuan Zonuam khaw lalpain chhiah a rawn khawn a; mahse, kan lalpa chuan a lo pe duh lova. Chumi avâng ngawt chuan kan khaw pa pakhat chu min thahsak a. Kan thin a rim êm avâng leh Zonuam khua hian mi an tihbuai fo avângin, mi sawm zet chu rawlrâlin kan che chhuak ve ta a ni.

"Chutia rawlrâla kan chêt chhuah hlân chuan Zonuam pasalṭhate chu, kan khaw rûn tûrin an lo thawk chhuak chiam a ni âwm a. Kan hriat veleh kan khaw lam panin kan kîr leh ta vang vang a. Mahse, thui pawh kan kal hmâin Zonuam pasalṭhate rammu haw lam nen chuan kan intâwk ta phut mai a. Kan hotupa chuan insaseng tûrin min ti a, mahse, chutih lai chuan hmêlma lam chuan min rawm bawhchilh zui ta mai si a. Kan intam hleih nasa mai si, a tawpah zawng kan vaia thih vek ai chuan tiin kan hotupa chuan tlânchhe mai tûin min ti a," a tia, a ngâwi zui ta daih a. Lianpuii pawh chuan a hrethiam khawp mai. Mahni ṭhiante tlanchhiatsantu nih chu phatsantu nih nen a danglam chuang si lo. Chu tlangvâl chu a duh rêng vâng pawh ni lovin, an hotupa thupêka tlânchhe mai a ni tih pawh a ngaihruat thiam ve mai a. A rilru pawh a na hle ang tihte thlengin a ngaihtuahpui phâk vek a ni. Chuvangchuan, chu tlangvâlin a thu sawi lai a tâwpsan ta daih mai pawh chu, sawi zêl tûrin a nawrlui duh ta bik lo a ni.

Khua pawh a vâr ṭêp tawh a, tlangvâl chuan, "Ka pi, kawng chin min hrilh la, khawvar rualin ka chhuak leh nghal mai ang e. A rang thei ang bera khua ka thlen thuai thuai angai a ni. Chu lo rêngah pawh, in tân hmêlma ka nihna chen a awm ve si a, in khaw tlangvâlten min hmuh palh hlauh a, thil awmzia a hriat si chuan in nufa thleng thlengin in tawrh phah hlauh dah ang e," a ti a. Chutih lai chuan Lianchhingi pawh tapchhakah chuan a lo ṭhu chhuak ve tawh a. Challura nen chuan an mit leh mit chu a intawng leh zauh zauh ṭhin a. Ngaihzâwng la nei ngai lo ve ve an ni bawk a, an in en duh viau mai pawh chu a mak hran lo ve. An hriatthiam chiah si loh eng thil emaw tak chu, an pahniha inkârah chuan a thleng mêk pawh a ni mahna!

Lianpuii chuan, "Ni khat tal chu la châm rih la maw le. I taksa a la chak lovin, thui tak kal thei tûr khawpin i la chak tâwk lo a ni," tiin Challura chu la châm rih tûra a duhthu chu a han sawi chhuak a. Mahse, Challura chuan khua thlen thuai thuai a duh si a, Lianpuii hnenah pawh chuan, "Ka pi, ka damṭha tawh khawp alâwm hei, min ngaihtuah lutuk a nih kha. Tunah hian kan khaw lam pawhin min ngaithuah viau tawhin ka ring a, a zawn te pawh min zawng hial maithei a ni. Min hrethiam ula, ka châm khawmuang lo zâwk mai ang e," a ti a. Lianpuii pawh chuan Challura tumruh zia a hmuh chuan a chelh zui duh ta bîk êm lo va. Ram chin te chu a hriat ang angin a hrilh ta zâwk a. Zonuam khaw ram lama kîr leh tawh lovin, an khaw ram lam aṭanga kal tûrin a hrilh a, "Ni hnih hnu vêlah chuan in khaw ram chin i thleng thei tawh mai ang," a ti a. Tichuan, Challura mamawh tûr buhfai leh eitûr awm ang ang chu a lakhâwm zung zung a, Challura iptepuia han dahsak pahin, "Ka ngaihtuah che mang e aw," a han ti zauh a.

Challura chu a nui suk duh chauh a! Hmeichhia hi zawng an heti châwk ṭhin. Ṭul hlei lovah an inngaihtuah hah vak vak zêl a, an rilrute hi amak ṭhin teh a nia! 

Zing khawvar rualin Challura chu a inak chhuak ta nge nge a. Lianpuii te nufa chuan a lan theih chhûng chu an thlîr dun vawng vawng a. Chu mite nufa chuan Challura chu dam taka an khua thleng ngei tûrin an duhsak tak meuh meuh a ni.