PASALṬHATE KHAWVÊL 13

PASALṬHATE KHAWVÊL

BUNG SAWMPATHUMNA

Keisata teho chu kawng lakah zan khat an riah hnuin, a tûk ni tlâk hma hretin Zolur khaw dai chu an thleng a. Zolur khua enthla tûra an tih tlangval pahnih chuan an rawn pawh vat a. Keisata chuan, "Rolian, eng nge chanchin ni zêl? Kût an la hmang dâwn em ni?" tiin a lo zâwt thuai a. Roliana chuan, "Aw, vawiin pawh an hlim khawp mai. Naktûk hi an kût ṭiah ni tûr chu a nih hmêl," tiin a lo chhâng thuai a. Keisata chu hlim hmêl takin a nui vur vur a. 

Mangchhina chuan, "Ram khi leh chen aṭangin arana ran lo kan lo chhuk thla a ni a, kan sal man leh râllâk sum apiang chu kan hâwn thei ang chu maw?" a lo ti khauh mai a. Keisata chuan, "Chu zawng in thu thu a ni e. Keini chuan sal leh râllâk sum tih vêl hi kan engto ve lêm lo va, Zolur khua hi rûn a, ding chhuak leh tawh lo tûra siam kan duh a ni," a ti churh churh a.

Mangchhina chuan, "Khaw khat lek rûn tûrin mi heti zah hi kan thawk chhuak ania. Zolur khua chu in engzât fakau nge maw an nih le?" a han ti leh khauh mai a. Keisata chuan, "In zanga vêl chu an ni âwm e. Pasalṭha tam tak an lo chesual tawh a, tin, kulh an nei ṭha êm a, luhchhuah mai pawh har tak a ni. Pasalṭha leh tlangval huaisen tak tak an tamin, mahni buzâwlah chuan thih ngamin an ṭang dâwn a ni a. Kan tam zâwk avâng hian ngaih tih ṭhat ngawt chi a ni lovang," tiin Zolur khaw tlangval leh pasalṭhate chu a dah nêp lo kher mai. 

Mangchhina chuan, "Ka hote nên hma kan hruai ang a, nangnin hnu in rawn dawl a ni ang chu. Mangchhina hmaah hian tumah an ding chang ngai lo ve," tiin chapo takin a hming chu a han chhâl a. Lusei tlangval tân chuan chu Pâwih pasalṭha chu a ngeiawm ṭan viau mai. Keisata ngei pawhin he Pâwih pasalṭha hi nakinah an tân a la hnawksak palh ang tih chu a hlauhthawn ber a ni. Mahse, tun dinhmunah chuan ṭhianṭha anga an in en angai rih si a.

Chumi zân leh a tûk nilêng chuan an hahchawl a. Keisata chuan tihian a han ti a:

"Khai le, zaninah kan che chhuak tawh dâwn a ni. Zolur tlangvalte chu kûtpui chênin an hlim hle mai a. A ruih pawh an rui viau tawh mahna le. Zanin hi an inthlahdah lai ber tûr a ni a, râlvêng pawh pahnih khat bâk an indah kherin a rinawm loh. Khua kan luh veleh kan insem darh ang a, Zawlbûk lam kan bitum hmasa ber ang. A theih hrâm chuan nunau chungah kutthlâk loh kan tum dâwn nia," a ti charh charh a. 

Tichuan, zanlai vêlah an che chhuak ṭan a. Zolur tlangvalte lah chu an kûtpui chên an meng rimtawng deuh nge ni, Zawlbûkah chuan an hnar tlurh tlurh hlawm a. Râlin an rawn veh mêk a ni tih rêng an hre si lo. An vanduai ai ve rêng pawh a ni ang e.

Challura pawh rilru bet lo zetin kût lawmnaah chuan a tel ve hrâm hrâm a. A zan thumna, kût ṭiak zânah erawh tel zui zêl a châk ta mang lo va, râlvênga ṭan a thlang zâwk ta mauh mai a ni. Chhunliana kha a sâwm a, an pahnih chuan râlvên bûk chu an nghâk dun ta rân a.

Chutia an pahnih chauhva an lo ṭhut ngawih dun reng lai chuan, an rin loh deuhvin Darbuta kha silai nên a rawn lang ve hlawl mai a. Challura chuan, "Pasalṭha, hetah eng nge i rawn tih ve dâwn le? Inah lo awm hahdam mai mai rawh khai," a lo ti thuai a. Darbuta erawh chuan, "In chhûnga tawmsen rengzawng a ninawm e. Zanin chu ka hovin râl kan vêng dâwn nia," tih pahin a vaibel zûk lai chu a pak khu tual tual a. 

Challura chuan, "I tih tlat chuan nia maw le," tih pahin Darbuta bulah chuan ṭhuthmun a han rem ve nghal thuai a. Chhunliana erawh chu fâl deuh nalh hian a ding vang thung a. An thlang lampang chu ngawi reng hian a thlîr vung vung a. Eng emaw hmuh nei ni âwm tak hian a lang leh nghal. 

Darbuta chuan a lo mitmei ru reng chu niin, "Chhuna, hmuh i nei elo?" a han ti sap a. Chhunliana chuan, "Khuti laiah khuan hlimthla ni âwm tak phe zauh zauh ka hmu pek alâwm le. Tunah chuan hmuhtur pawh a awm tawh lo," a han ti a. 

Darbuta chu a tho thurh a, Chhunliana bula kal phei pahin, "Min rawn rûn dâwn a nih chuan zânin hi an rawn chêt chhuah hun tûr chu a ni tawh ngei ang le," a han ti sap a. Challura pawh chu a ding chhuak ve nghal a. Darbuta hnenah chuan, "Min rawn rûn chu i la ring cheu a ni maw?" tiin Zonuam khuain an rawn run leh mai chu a rin tawh loh thu a han sawi zui nghal a. 

Darbuta erawh chuan a thusawi chu hre lo ni âwm takin Chhunliana thil hmuhna lam chu a lo thlîrsan leh daih tawh a. Challura pawh chu Darbuta kiangah chuan a va ding ve thuai a. Darbuta chuan, "Tute emaw chuan min enthla reng a nih hmêl hle mai," a han ti a. Challura chuan, "Kan zuk fiah dâwn em ni ang?" a lo ti vat a. 

Darbuta chuan a lû thing nar nar pahin, "Mi engzât nge an nih tih kan hre si lo va, a chesual zâwkah kan ṭang palh thei tlat a ni. Engmah hre lo ni âwm takin awm ila, kan ṭawng lâwng lâwng dâwn nia!" a ti a. Tichuan ring deuh deuhin an inbia a, an ṭawng lâwng lâwng a, an nui leh ham ham ṭhin a. Lo enthlatu pawh awm se, chûng râlvêngte chu 'an inthlahdah âwm hle mai' tih palh awl tak tur hi a ni a. Mahse, Darbuta te chu an inthlahdah hauh thung si lo. An thlanga ngiau thing lianpui mai dinna lai vêl chu an melh ru leh zauh zauh ṭhin a. Eng emaw chânga mihring ni âwm tak han phe leh zeuh zeuh ṭhin pawh chu an hmuh hmaih lo chiang kher mai. 

Tunah chuan rinhlelh rual lovin râl hovin an enthla a ni tih chu an hre chiang ta ngei mai. Challura chuan Darbuta hnenah chuan, "Engtin nge kan tih dâwn ni? Kan ṭhiante ka'n pun dâwn em?" tiin a han râwn a. Darbuta chuan, "Chhuna, kan lal hnenah thil awmzia hi han hrilh la, 'Râl an hnai e' tiin i hrilh dâwn nia. Tin, Vâl upa Thangtawna pawh kha i hrilh tel nghâl bawk dâwn nia. Tlangvâlho pawh inring rengin awm rawh se," a ti a. Chhunliana chu ngawi rengin lhaw lam pan chuan a chho ta nghal a. 

Darbuta chuan, "Chala, tun ṭum chu kan tâwpna nî a ni ang tih ka hlauhlel lo ve. Kan hmêlmate hi an rawn thawkrip viau a nih phei chuan, kan tân lo dan an harsa tawh viau dâwn a ni. Nunauin an tuar ang tih mawlh hi ania ka hlauhthâwn ber chu," a han ti charh charh a. Challura chuan, "Pasalṭha, i zâm ta mai em ni le? A tâwp thlengin i kaihza hi ka rawn vêng dâwn tih hria la. Ka phatsan hauh lovang che. Pasalṭhate ropuina leh hmingthanna chu indona hi a ni lo'm ni?" tih pahin a silai chu a tuai vat vat a. 

Darbuta chuan muang churh hian, "Tun ṭum hi zawngin ṭum dang a ang dâwn hlek lo ania. Zêp loh ah chuan keimahah hian ngaihṭhat lohna riau zuk awm tlata maw le. Mihring hi zawng a vanglai a chuai a, a ropuinate chu a ral leh mai ṭhin. Pasalṭhate tân chuan thihna hi hahchawlhna awmchhun, thlamuanga zân mu an chhin ve theihna kawng awmchhun a ni si a," a ti ban deuh charh a. Challura chuan a hmaa pasalṭha ding chu a thlir vawng vawng a. A kum pawh a lo tam ve ta, a tha te pawh an lo ṭhum ṭan ve mêk chu a ni si a. A vanglai hunte chuan zawi zawiin mual an liamsan ve hret hret a, lal leh khawtlang tân tiin a pên chhuak reng chu a ni si a. He pasalṭha, a ngaihsân êm êm mai hi hmelma hmaah a zâm âwm rêng rêng a la hre lo va, chutih a hnehin indona hmunah a hmatâwngtu leh huaisen taka a naute fuih phûrtu a ni ṭhin. Mahse, tun ṭum chu a mizia a dang ta tlatin a hria a ni.

Zân a rei ṭan ta viau mai. Chiapcha hram ri neuh neuh thâwm pawh a dai ṭan ta. An awmna lai chu a reh vung vung a, a khât tâwkin sarthli tih hriat tak mai hi a rawn thaw leh huk ṭhin a. An râlvên bûk chungte chu a rawn chhêm ri leh sung sung ṭhin. Vawt tih vâng ni hauh si lo hian Darbuta chu a khûr ru der der a! Tunah zawng a tâwpna nî chu a lo thleng ve dâwn ta nge nge em ni ang?

Lalvunga chuan Chhunliana thusawi a hriat veleh a upate chu a kokhâwm nghal zung zung a. Tin, Vâl upa Thangtawna pawh kût thlen in aṭangin an va ko chhuak bawk a. Lal in bahzarah chuan khun khan takin ro an rêl nghal a. Lalvunga chuan, "Hei le, kan pasalṭha Darbuta chuan 'Râl an hnai e' tiin inring tûrin min rawn thâwt lâwk a. Naktûk lama chai chhunzawm zêl kan tum pawh a rem tawh dâwn lo a ni. Zân inah kût chu ṭiak mai se la, tlangval lam pawh lo inrâlring deuh rawh se. Kan hmelmate hi tute nge an nih a, mi engzat nge an nih tih kan la hre lo va, amaherawhchu, lo inrâlrin tluka ṭha a awm lovang e. Nunau tithlabar lo thei ang ber tûrin kan awm dawn nia. Kan chhungte zingah naupang leh tar chak lo deuh te chu zânin lâ lâ pawh hian lo insaseng rih se a pawiin ka ring lo ve," a ti churh churh a.

Lal upamin Hualzakunga chuan, "Ni e, kan lalpa sawi ang chuan kan nupui fanaute hi lo insaseng hmasak tîr chu a ṭha ka ti e. Râlho hian naupang leh hmeichhia pawh an thliar hrang tak tak ngai chuang si lo," a lo ti ve boh boh a. Vâl upa Thangtâwna chuan, "Lalpa, kan thu chu chutiang a nih si chuan, kei chu ka chhuaj leh mai ta ang e. Kan tlangvâlte pawh ka lo hrilh ve loh zawngin," tih pahin a dingchhuak nghal hluai a. 

Lalvunga pawh chuan, "Ni e, an hriatthiam theih dân tûr bera sawi hrâm i tum dâwn nia. An kût hmang an hlim viau laia hetiang thu han hriattîr pawh hi a inthlahrunawm viau mai," a lo ti thuai a. Thangtâwna chuan, "Mai mai a, kan tlangvâlte hi zawng tho thil ang ṭhap hi an nia. Lal leh khawtlang chhan nân chuan mahni nunna hlân phal ṭhiau an ni ang chu le. A nih leh khawnge, ka va kîr tang e," a ti a. Lal in aṭang chuan a chhuak zui nghal a. 

Lalvunga chuan a upate hnenah chuan, "Khai le, kan Sailo unaute hian an Lusei pui hi heti tak maiin hnawk min ti a ni maw? Tun ṭum chu a tâwp thleng rakin ka lo bei lêt ve dâwn a ni. Ka upamin leh mi ṭhenkhat erawh kha chuan lalnu hi lo chhuahpui ula ka duh a ni. Eng thil nge kan tawn dâwn tih pawh hriat a ni si lo va, a ṭhen a zar tal kan lo insaseng loh zawngin kan vanduaina a thuahhnih lutuk palh ang e," a ti charh charh a. 

Hualzakunga chuan, "Lalpa, kum hei leh chen hi i thlazar hnuaiah thlamuang takin ka lo awm tawh a. Zû leh sa chênin kût ni vangthla te pawh hlim takin kan lo chênho tawh ṭhin a nih kha. A thim leh a sûr kârah ka lo zui ve tawh ṭhin che a, i rorêlna chungchângah ni se, phun leh vuivaina tûr rêng ka hre ngai hek lo. Amaherawhchu, tûn ataka min thlauhthlâk i tum ta mai erawh hi chu hriatthiam a har ka ti a ni. Lal leh khawtlang tân chuan ka tha leh zung, ka nunna thleng pawh hian ka hlan phal tih hi min hriatsak la, indona a lo thleng a nih pawhin i kiangah ka ding ve zêl dâwn a ni," a ti boh boh a. Midang pawh chuan an lalpa chu phatsan bik an tum loh thu an sawi chhuak ve sap sap hlawm a. Lalvunga chu a upate rinawmna leh huaisenna avâng chuan a hlim ru hle a ni. A upate hnenah chuan, "Ka mualkîl upate u, nangni tluka ka tâna rinawm leh ka innghahna ni bawk si hi an awm kher lovang e. Kawng engkimah min finchhuaha, huaisenna min petu zawng in ni chiang e. Nangni hi awm lo ula chuan ka khua lehtuite hian mi an pèm bosan zo tawh ngei ang le. Ka tâna in rinawmzia ka hmuh hian ka lâwm takzet a ni.

"Amaherawhchu, kei hi lo boral pawh ni ila, in lalnu hi a baihvai lutuk loh nân tu emaw tal chuan in lo awmpui angai a ni. Sailo lal ten an nawm an maka, sal atâna an kaih mai mai tûr ka ni lo. Anni aia lal ropui leh thiltithei zâwk ka nih hi. Ka khua leh tuite chhan nân chuan a ṭul le ka thi mai a ni ang chu," a han ti charh charh a. A aw chu a puitu ruihin a hmêl pawh a thutak ruih mai.

An lalpa duh dân ang ngeiin a upamin Hualzakunga leh mi ṭhenkhat chuan, an lalnu chu hruai chhuakin, hmun him lamah an insaseng ta nge nge a. Lalvunga chuan a upamin hnenah chuan, "Lalnghenga pa, ka lo boral ta a nih leh in lalnu hi lo ṭawiàwm tlat la, rorêl kawngah pawh i lo finchhuah ṭin dâwn nia. Hêng Sailo lalte lakah hian a duap zâwnin thu lo cheh ngai hauh suh ang che u," tiin a chah nghe nghe a ni.

Vâl upa Thangtawna pawhin a rûkin tlangvâlho chu thil awmzia a hrilh den den hlawm a. An kût hman chu nuam tiin hlim hle mah se; tlangvâl ṭhenkhat chu Zawlbûk lamah an kîr sung sung hlawm a. An râlthuam neih ang angte chu lain an inring ru viau tawh mai. 

Keisata te pawh an inpeih tawh hle a. Mangchhina leh a naute chuan hma ruaiin, zanlai vêl a ni tawh ang tihah chuan an che chhuak ta sang sang hlawm a.

Râlvên bûkah chuan mi pahnih hi an lo ding vang vang a. Mangchhina chuan a naute hnênah chuan eng thu emaw ni hi a han sawi sup a. Chuveleh Pâwih pasalṭha pahnih hian thâwm dim takin râlvên bûk lam chu an pa phei nghal ṭhem ṭhem a. Mase, râlvên bûk an thlen hmâ hret chuan an beisei loh tak maiin silai a rawn puak ṭhuai ṭhuai a. Pâwih pasalṭha pahnihte chu an hlâwm nghâl tawl tawl mai le. Che leh tûr an awm ta lo!

Mangchhina thinrim lutuk chuan, "Kha, keimah Mangchhina ka ni ngai e," tia a hming chhâl chungin kulh kawngkhar chu a han bawh rawk mai a. Mahse, kulh kawngkhar chu a lo inkalh nghet viau mai si. Chuti maia han bawh hawn mai mai chi niin a lang tlat lo. Mahse, an tam hrim hrim a, kulh kawngkhar chu an nawr ta chiam hlawm a. Chutih lai chuan râlvên bûk aṭangin Darbuta te chuan an lo kâp ṭhuai ṭhuai reng a. Pâwih pasalṭhaho chu an hek malh malh khawp mai. 

Mahse, tlânchhiat zawng an tum bîk hauh lo mai a. A tâwpah phei chuan kulh kawngkhar chu an bawh hawng ta nge nge a. Chuveleh Keisata teho pawh kha an rawn che chhuak ve nghal a, kulh chhûngah chuan an inhawr lût tup tup mai le. Darbuta te tân pawh han kahhlum sên chi ziazâng ni hek lo, khawchhûng lam pan chuan an insaseng ve ta nge nge a.

Râlho chuan khawchhûng lam chu an bawh chho nghâl hum hum a. Mahse, an rin ang ngawt zawng a ni hauh lo mai! Khawchhûngah chuan mihring an lo awm tawh mang hauh lo mai a. Silai ri an hriat khân mi tam zâwk chu an lo insaseng fel dêr tawh a. Mahse, tlangvâl leh pa ṭhenkhat chu, râlho lo bei lêt tûrin an lo awm ve tlat mai le. Chûngho chuan a rem lai lai aṭangin râlho chu an lo kâp thawr thawr ta mai a. Râlho pawh an tlu nghâl phawk phawk mai. 

Mahse, an intam hleih êm a, an ṭhiante ruang chu kal kânin râlho chu an rawn lawr ṭiam ṭiam a, silai an hmet puak ve ta. Khawtual lam pawh an thal ve ta pheng phung mai. Hmuntin maiah chuan silai a ri ulh ulh reng a. Silai khû lah chu a zîng chûk mai leh nghal. Thinrim inhrosa chunga lo insât ta chawrh chawrh te, chempui nêna lo inûm kâwi ta zâwr zâwrte pawh an awm nual mai. Mangchhina te lah chuan in cu an hâl nghâl zêl si a. An mi hmuh apiang lah chu an that hmiah hmiah mai a. Khawngaihna zawng lantîr an tum loh hmêl khawp mai!

Darbuta chuan an lalpa leh khawnbawl upate chu, hmun him lama insaseng thuai tûrin a han ngên a. Mahse, Lalvunga chuan tlânchhiat rêng a tum awlh si lo. "Tual khêl râlah Lalvunga hi ka tlân ang maw? Ni lul lo ve, Sailo lalte ang maia tlânchhe tûrin ka piang lo. Ka pasalṭhate an thih mêk laiin ka lo insaseng ang maw? Chu zawng mi dawihzêpte tih chi chauh a ni e. A duh apiang chu in insaseng thei ang. Tumah ka dem lovang che u. Hetah hian in thih ve kher hi a ṭul ka ti lo ania," a han ti a. Mahse, tumahin tlânchhiat chu an tum hauh lo mai. An lalpa kiangah ngei an hun tâwp chu hman an tum rilru vek a, an hmêlmate hmusit tûr khawpa dâwihzep, mahni lal leh ṭhiante phatsana tlânchhiat tum rêng an awm lo.

Râlho chuan mual vêng lam chu an rawn bawh chho ṭan ta a. Chutah meuh chuan pasalṭhate huaisen, tlânchhiat tum rêng rêng lo te chuan hmêlmaho chu an bawh ta hum hum mai le! Hmuntin maiah chuan ruang a tlu kawkalh nelh nulh a, thisen a luang kâwi zêk zûk bawk a. A khawi lam vê vê pawh an hek dûn mawlh mawlh hle mai.

Mangchhina leh a naute kha an huaisen êm a, chuti chu ni lo se chuan Keisata teho ringawt chuan hnehna an chang hauh lovang le. Zolur pasalṭhaten râlho zingah chuan Pâwih pasalṭha an hmu ta nual mai a. Anmahni rûn tûrin Zonuam khua chuan Pâwiho an thurualpui tih an hrethiam nghal a. Chu chuan an thin a tirim ngei mai. Pâwih pasalṭhate lah chuan Lusei pasalṭhate chu an kâp lir hlawl hlawl reng mai a. Nungdama zuah chu an tum lo tih a chiang reng mai. Chutianga an han inpawmchilh rawp rawp takah chuan, Pâwihho tân pawh tu tunge an lamṭang tih hriat hran a lo har ta. Lusei pasalṭhate lah chuan tukkhum lamah sam an zial vek mai si, an ṭhiante ngei ngei pawhin an kut palh an tuar lo thei ta lo a ni.

Darbuta tân pawh eng han tih theih a ni bîk si lo. Hmêlma lam chuan an tam hneh hrim hrim si a. A hmatâwnga a ṭanna lamah silai mu pahnih ngawt chuan a taksaah hmun an khuar phah chu a ni si a. Chutia hliampui tuara a tlu lai chu Challura khân a lo hmu hlauh mai a, rang takin a pan phei nghal a. Lal in lamah chuan a luhpui ta vat a. 

Lal ina lo awmte chuan phâwk hrâin an lo en a. Darbuta ani tih an hriat phei chuan an ngui rawih mai. An pasalṭha chhuanvawr leh an innghahna ber a ni bawk si a. A thih vaih phei chuan an hmabâk chu a duhawm lo hle dâwn a ni.

Challura chuan lal in aṭanga a chhuah dâwn chuan an lalpa hnenah heti hian a han ti a, "Lalpa, kan hmêlmate zingah hian Pâwih hrumzialho an telve tlat mai a. Zonuam khaw lam hian an lo thurualpui tih lah a chiang hlecmai si. Kan chelh lo palh mai ang tih pawh ka hlau hlel lo ve. Hun remchâng a la awm lai hian lo insaseng hrâm ta che u. Ṭul lova thih tum kher hi eng nge a hlâwkna awm chuang le? Pasalṭha tam tak an tlu tawh a, an tlu mêk zêl chu a nih hi. Chutih lai kâra heti laia in thih hun in lo sakuh ser nghah ringawt mai hi chu ka hrethiam lo a ni. Tunah hian insaseng u la, hun ṭha zâwk a la her chhuak ngei ngei ang," a ti a. Rang takin lal in aṭang chuan a chhuak nghâl thurh a.

Zonuam tlangvâl pakhat chuan a ṭhianpa, Pâwih pasalṭhain a kâwlhnâma a sâthlum lai a lo hmu fuh hlauh mai a. A thinrim lutuk chuan engkhaw sawi set set lovin chu Pâwih pa chu a kâp let nghal tawp mai le. Boruak chu a ni lo zawngin a inher nghal hmak a. Pâwih pasalṭhate chuan an bula ding Zonuam pasalṭhate chu an bei ta thut mai, chutah meuh zawng tual leh râl pawh sawi hleihtheih a ni ta lo. Hmun leh hmunah chuan an insâm ta buan buan mai le. 

Mangchhina chu a thin a rim hle mai a, Keisata hnenah chuan, "Eng nge thil awmzia ni ngai? Hetiang hian maw ṭhiante chunga in chêt ṭhin ni le?" a ti a. Keisata lah chuan, "I nauten ka naute kut an thlâk hmasa miau alâwm. I naute kha tâwp tûrin hrilh thuai rawh. A nih loh zawngin he hmun aṭang hian tumah nungdamin in kîr leh tawh lovang," a ti fiak ṭhak mai a. 

Mangchhina chuan a naute chu a han au ṭhawt ṭhawt hlawm a. Keisata pawhin a naute chu tâwp tûrin a hrilh ve bawk a. Eng pawh chu lo ni se, ṭhiante kut tuarin tam tak chu an thi hman ta tho tho mai le. Keisata chuan thil awmzia a han sawi fiah zung zung a, inhai palh vâng mai mai a nihzia te chu a naute hnenah chuan a han sawi a. Tichuan an hmêlmate chu tha tharin an bei ṭha leh ta hlawm a.

Khua chu a kâng alh hluah hluah reng a, in tam tak chu a kâng rêm zo titih hial tawh mai. Boruakah chuan meikhu dum pui pui hi a zâm chho nguai nguai a, vân boruak sáng takah chuan pâr a chhuang tep tup mai. Tunah chuan Zawlbûk pawh a kâng ṭan mêk a, lal in lama awmte pawh loh theih lovin an insaseng a ṭul ta a ni. 

Lalvunga te chu hmanhmawh takin an tlânchhuak thuai thuai a. Chutih lai chuan hmêlma lam pawh an rawn lang ṭan ve nghal a. Lalvunga chuan a upate hnenah chuan, "Kan pasalṭha hi tlanchhuahpui thuai rawh u," a han ti a. Inhnialna hun a ni tawh bawk si lo, tlangval pathum leh upa pali vêlin Darbuta chu dai lamah an insasengpui ta nge nge a. 

Lalvunga chuan a silai chu nghet taka hûm pahin, "Vawiin chu mi huaisente hnung zuiin, Pialral kawng i zawh ve ang aw," a han ti thûm chhak a. Englai pawha a kaihza vêng rengtu Zahnuna pawhin, "Kan thi dâwn a nih rau rau si chuan le, pasalṭha thih dân diktakin aw ni ang," a lo ti ve thuai a. Hmêlmate hmachhawn tûr chuan an pên chhuak ta a.

Zolur pasalṭhate chu hmêlmate kutah an tlu zo ṭhelh tawh mai a! Mi sawmthum bâwr vêl bâk nungdamin an awm tawh lo chu a ni e. An hmêlmate chuan an tam hneh êm a, chubakah an tum a ruhin tlânchhiat tum rêng an awm bawk si lo. An ṭhiante tam tak chu tho leh tawh lo tûrin an tlu hlen ta. An ṭhiante hnungzui tûr chuan an rilru an siam fel vek tawh, insaseng tum an awm hauh lo. Hmêlmate kutah chuan a nung chunga inpêk an tum hauh lo mai. 

Challura pawhin hliampui na tak a tuar mêk a, a malpui veilamah silain an rawn kah sak a, a awmah thalfang a bur vu bawk a. Thisen a hloh hnem êm avângin luhaiin a tlu riai riai a, a thidang zui ta nghal a. Zolur tlangval la dam awmchhunte pawhin intiam rual chungin hmêlmate chu an bawh ta huk mai le. Khawngaihna nei miah lovin an insât ta chawrh chawrh a, a rem lai laiah feiin an inthil phawlh phawlh mai. Silai han hman hleihtheih a ni tawh si lo va, chem, fei leh kâwlhnâm chu an lek ta fur mai a ni. 

A pasalṭhate an tlu zo tih a hmuhin Lalvunga chuan, "Ka mi huaisente an tlu zo ta e. Ka tân pawh dam a sâwt ta lo ve," tih sap pahin a silai chu a han lek chhuak nghal a. Pâwih pasalṭha pakhat chu a han tin vang vang a, chutah a silai chu a hmet puak ta dur a. A tum a ṭhelh lo tih hriat tak maiin Pâwih pa chu a ṭê ṭhawt a, duh loh paih ang thlawrhin leiah chuan a let ta reng a. 

Mangchhina thinrim chuan lal putar chu han kahthluk ve nghâl mai hi a tum a; mahse, Keisata chuan a lo khap vat a, "Saw chu lal a ni a, kan that tûr a ni lo ve, a nung chung ngriin kan man zâwk tûr a ni ang," a lo ti thuai a. Mangchhina pawh chuan phun nuah nuah chungin a silai chu a la thla leh ta riai riai a. Dik tak chuan a hote mi tam tak a chân phah chu a ni si a, a rûk tak chuan a thin a rim ru êm êm a, Keisata te lam lam chuan a haw hluah hluah tawh mai a ni.

Keisata chuan Zolur khaw lalpa chu a han au va, "E khai, lalpa, zahngai, zahngai! Tunah chuan kan hneh ta che u a ni a, ṭha takin rawn inpe mai rawh u. Kutthlâk che u hi kan hreh teh mai ania," tiin. Lalvunga erawh chuan, "Ka mi huaisen tak takte chuan pialralah min lo nghâk mêk a ni a, vawiin hian kei ngei pawh an hnenah ka kal ve dâwn a ni. Inpe tûr khawpa dawihzep kan awm lo ve. In ngam a nih chuan min rawn man han tum chhin u la," tiin a cho lêt ta siah mai a. 

Keisata rilru chu a buai map mai. He Zolur khaw lalpa hi chuti mai chuan a inpe dawn lo tih a chiang hle mai si. A nung chunga man an tum a nih chuan an lo ṭang ve ngei dâwn tih lah hai rual a ni si lo. Chutih nâk alai chuan Mangchhina lah chuan, "An inpe duh lo a nih chuan that nghal law law ila a ni mai alâwm. Ka hote mi tam tak min thahsak tawh a, lal meuh pawh ni se, thi tlâk a ni," a lo ti tumhrang bawk si a. 

Lalvunga chuan a upate hnenah chuan, "Khai le, inring rawh u le. Hmêlma kuta awm a, sala ṭan ai chuan thih ka thlang zâwk e," a han ti sap a. A silai chu lek chhuak leh nghalin a hmet puak leh ta ṭhuai a. Keisata bula ding tlangvâl pakhat chu a lêt nghal hlawl mai a. Chutah zet zawng Keisata tân pawh tihngaihna dang a awm ta lo. Hreh tak chungin an silai chu an lek chhuak ve ta nge nge a. 

Lalvunga leh a khawnbawl upate chuan hmêlmate kuta inpêk ai chuan thih an thlang zâwk miau si a. An duh ang ngei chuan pasalṭha takin an thi ta nge nge a ni. 

Keisata te chu hnehtu zawng an ni ngei mai. Mahse, an ṭhiante tam tak an chân a, tam takin hliam an tuar bawk si. Chu a chhapah Zolur khaw mipui nunau lah chu hmuhtûr rêng rêng an awm bawk si lo. Hnehtu mah ni se, hlâwkna pakhatmah chan tûr an nei lo va, an chipui tam takte chu an kut tuarin an boral chu a ni ta zâwk si. Keisata meuh pawhin hrehawm a ti a ni. Mi ruang tlu kawkalh nelh nulh te chu hmuh hrehawm a ti a, a en thei thlâwt lo mai. 

An râl thahte lû chu tlêm an hawn a, an ṭhiante ruang erawh han hawpui chi rual ni tawh hek lo, an nih nih nitûrin an kalsan ta ngawt a! Hliam tuar zâwn tûr an tam bawk si nen, an buai ngei mai. 

Ngui nghiai mai hian an inzui diah diah a. An ṭhiante tam takin mual an liamsan ta si a, an rilru a nâin hrehawm an ti takzet a ni. Mahni chipuite nêna indo zet chu a mi deh dan a dangin rilru a khawih bîk lehzual emaw tih mai tûr hi a ni a. Hnehtu mah ni se, hlim hmêl pu hmuhtûr an awm hauh si lo. Ṭhenkhat phei chuan khua han luh leh pawh thih hreh takin an hreh rilru hial a ni.